We-ɛɛla 19 - mzwDBL

Pɔɔl la Ɛfesos

¹ Apolos aa lɔ Kɔrent la, Pɔɔl kpɔ harɛ la bwe doa bɔr dɛ ka le Ɛfesos. Waa la bela la, o kaa pu nɛra baa dɛ teŋɛ Yeesu nɛɛ la bane bela,

² dɛ pɛɛ ba ŋɔ, “Haa kpɔ he te tɛ Yeesu la, Korowii tɛ heyaa o Domadɛɛɡe la aa?” Asɛ ba ŋɔ, “Ɔɔhɔh, ya te ta Korowii Domadɛɛɡe la waa noɛ kwaraa bwa.”

³ Anee Pɔɔl berɛ kwaa pɛɛ ba ŋɔ, “Aah dɛ bɔkwa waa he sɛh ŋɔ hɛɛ ɛo mɔɔ ba sɔ heyaa Korowii nee laɔ?” Asɛ ba ŋɔ, “Jɔn waa o fa aa dɛ chaɡle laanee ya sɛh.”

⁴ Belaa o ŋɔ ba be ŋɔ, “Nɛra baa charɛ ba liire dɛ le ba wechɔɡa ta laanee Jɔn sɔ Korowii ne. Jɔn fa aa dɛ baɡle nɛra waa la, o ŋɔ ba be ŋɔ naate o taa lɔ sie dɛɛ ba bala la baa ba naa, bá yaradao dɛ́ kpɔ ba te tɛo. A ɡɛ saŋ la, Yeesu waa wɛɛ bol la.”

⁵ Baa no ɡɛ waa nɔ la, ba ɡelɔ ba sɔ ba Korowii nee dɛ baɡle kɛ ba ɛ ya Dɔɔ Yeesu nɛra.

⁶ Pɔɔl kpɔ o nɔɔra dawɛ ba nɛ, asɛ Korowii Domadɛɛɡe ba so ba nɛ, asɛ baa bol wobofala, dɛɛ bol Korowii Wa.

⁷ Dɛ baa tel baala fi dɛ banɛɛ.

⁸ Pɔɔl di korobie atoro bwa bela, dɛɛ bol Korowii Waa bela tena be bansua ne ba cheremi dea bini. O laɡ ba dɛɛ so, o ne baa bol Korowii Kora la wa. O takapɔ kɛ wɛɛ berɛ ba liiree, ásɛ ba fe teŋɛ o kon ta.

⁹ Ba bini bane deŋne kpeɡri baa waa la yarada kwara, dɛɛ bol Yeesu nɛɛ teŋa la waa aa wola were kwara nɛnlaa la bwa baah ta. Anomanta, Pɔɔl ɡel ba, dɛ lawɛ nɛra baa yarada Yeesu waa la, asɛ tɔpere bɛlbwa o ne ba kaa cheme bobɛl baa dɛ yerɛ bela Teraanɔs Sukuu la ta.

¹⁰ Gɛ Sukuu la ta laŋa dɛ kaa hweli Korowii waa tɔpere bɛlbwa la, ba ɛ ɡɛ bene anɛ. Anomanta, Juu tena ne Grik tena ɛɛ dɛ do Eesia harɛ ta bela bwaa no Yeesu waa la.

¹¹ Dɛ Korowii cheɡɛ Pɔɔl nɛɛ dɛɛ ɛ nyokpowaa aa do kpeɡri dɛ berɛ ɡwaa loɡla kwaa la.

¹² Dɛ nɛra kpɔ dukure ne yakwane waa leɡa dɛɛ la weela tena be, asɛ ba weelare ɛɛ le ba nɛ, asɛ ba bini banɔ la kwaa aa dɛ ir ba nɛɛ la ɡe kwaa la ɛɛ le ba nɛ.

¹³ Dɛ Juu tena bane lɔ bela dɛ yon ɡaaɡe dɛɛ doŋi kwaa aa dɛ ir nɛra nɛ. Ba ɡe fe dɛ nyin dɛ kpɔ ya Dɔɔ Yeesu sɔn dɛɛ doŋi a ɡɛ kwaa nɔ dɛ yon dɛɛ kɔɡra ŋɔ, “Yeesu Pɔɔl aa dɛ bol o waa la sɔn ta, hé le kɛ yaa dɛ ŋɔ he be nɔ!”

¹⁴ Dɛ Juu tena Sɔfonomoa bɛl baa dɛ yerɔ Skiiva la bibaala banuanɛɛ dɛɛ ɛ ɡɛ.

¹⁵ Awola bɛl, baa ŋɔa ba kpɔ Yeesu sɔn doŋi kwaa nomɛl nɛɛ la, a ɡelɔ o ŋɔ ba be ŋɔ, “N jemɛ Yeesu, dɛ jemɛ Pɔɔl ɡe. Asɛ he ɡe, heyaa bamewaɔ?”

¹⁶ Ate, dɛ baa la kwaa aa dɛ ir o nɛɛ la ɡuɡ ba dɛ lɔɔ ba, dɛ a ɔma. O do ba bola, dɛ kɛɛ ba laala dɛ wur ba, asɛ ba chwa le o dem bela.

¹⁷ Juu tena ne Grik tena baa lɔ Ɛfesos la bwa no ɡɛ waa nɔ, asɛ ɔmee laɡ ba kɛrɛdɛ. Gɛ waa nɔ aa chiɡa la, bela tena ta Yeesu waa la wesale liire kpa. Ba ɔmɔ kɛrɛdɛ.

¹⁸ Name nɛra baa yaradaa la kɛrɛdɛ le bombaah dɛɛ bol wechɔɡa baa ɛa, dɛɛ sɛh ba chɔɡre.

¹⁹ Asɛ ba bini bane baa ɛ dobodobo ka mɔɔ dɛ ɛ asɔre tena la le ba tɔne baa nyiŋi a bini dɛɛ ɛ dobodobo la ne, dɛ kpaa nii do a ta bombaah bela. Baa kari tɔne la suuɡa la, aa do kanee. Aa tel suuɡapoŋa kaɡboŋa fifraanuee.

²⁰ Gɛ ŋwɛnɛkpeɡ nɔ taa a che Korowii waa la perɛ, dɛ won do kpeɡri kohona.

²¹ Gɛ waa nɔ habɔɔ la, Pɔɔl ɛ o liire kɛŋɔ wɛɛ la Makidoonia harɛ ne Akaya harɛ taa, dɛ ka kaa Jerusalam, dɛ ŋɔ dɛ o la a bwa ta naa, a chɛ kɛ o la Rom ɡba.

²² O tomɛ o bonɔɔna banɛ baa dɛ yer ba Timoti ne Erastos la, asɛ ba tɔ o sie kaa Makidoonia harɛ. Kɛ o te soɡe Eesia harɛ ta tama.

²³ A ɡɛ saŋ la, dɛ Ɛfesos tena baa wola asɔre tena ɛɛ la lɛ ɡaeh nɛra baa dɛ teŋɛ ŋwɛnɛfale la ta la nɛ.

²⁴ Gwine te bɛl lɔ bela baa yerɔ Demetreɔs. O kpɔ suuɡapoŋa dɛɛ kwaa bela voɡ bɛl baa dɛ yerɔ Aatemes la dea chaa, asɛ ɡɛ toma la ɛɛ tɛ o ne o bala tom-ɛɛra tɔnɔ tenten.

²⁵ O yerɛ o tom-ɛɛra la bwa ne nɛra o ne baa dɛ ɛ tonsiwi beŋkpoŋ la bwa, dɛ ŋɔ ba be ŋɔ, “Yabala, he jemɔ kɛ toma nɔ taa a che ya do wer la.

²⁶ Kɛ taraken, he ɡbabir na waa Pɔɔl nɔ aa dɛ ɛ, dɛ no waa waa dɛ bol. Ɛfesos bonɔ ɡbo laa wɛɛ ɛ o waa nɔ. Eesia harɛ kɛrɛdɛ bwaa wɛɛ ɛa. O wono berɛ nɛndamanta bwa liire baa teŋɛ waa waa dɛ baɡle la ta. O waa waa dɛ bol laanee kɛ voɡa nɛwɛnyini ɡbaɡba aa kpɔ nɔn dɛɛ ɛa la ta kasinteŋ dɔe.

²⁷ Waa dɛ ɛ ɡɛ nɔ, n dɛ ɔmɛ kɛŋɔ ya toma nɔ sɔn bɛ ba chɔɡ. Ya toma nɔ ɡbo sɔn laa dɛɛ ba chɔɡa. Ya voɡjen Aatemes dea nɔ nɛra aa dɛ maŋkurao nɔ, baa on komɛlbwa yera ba kpa, ásɛ o sɔn sewɛ, ásɛ dɛ kpo voɡ baa dɛ tomɔ Eesia harɛ ne bobɛlbwa la sɔn kwaraa! Baa on ɔmɛ kpa.”

²⁸ Nɛra la aa no ɡɛ waa nɔ la, ba bwaawee iro, asɛ baa dooɡe lɔŋɔre dɛɛ ŋɔ, “Ya Ɛfesos tena voɡ Aatemes nɔ dɔŋ toole!”

²⁹ Ate, dɛ ɡbɔɡa tɔ bwɛjen la bwa, asɛ nɛnlaa la aa dɛ do ɡbɔɡa la lawɛ nɛra bane baa dɛ yer ba Gayos ne Aristakus la. Makidoonia harɛ tenaa ban, asɛ ba ne Pɔɔl ɛɛ valɛ. Nɛra la tɛɡ ba la bela ba bwɛɛ tena aa chema dɛɛ bol waa dɛɛ pa bole la.

³⁰ Pɔɔl fe dɛ nyin nɛra la be bela laŋa, kɛ nɛra baa dɛ teŋɛ Yeesu nɛɛ la ta on ŋwɛnɛ tɛɛ.

³¹ Dɛ o daamanaree Eesia harɛ nomonome la bane. Ba tomɛ nɛra ŋɔ bá ka kaoh ŋɔ o bɛ lii kɛŋɔ wɛɛ tire nɛra la baah belaa.

³² Nɛnlaa la kɛrɛdɛ aa jemɛ waa la waa baa cheme bela. Dɛ ba bwa aa wesiwi beŋkpoŋ bol. Bane nyɛɡa tɔɔ ba bol waa chaɡɛ bonɔ, dɛ bane ɡe bol ba kwaa chaɡɛ le. Dɛ ba bwa dɛ bol waa saɡasaɡa ken, asɛ ɡbɔɡa tɔ bela bwa.

³³ Bela Juu tena fe ɡelɔ ba bini bɛl baa dɛ yerɔ Alɛksanda la ir che, dɛ fe tɔh ba nyoa ŋɔ ba laa ba waa la ne. Anee o kpɔ nɔn ɛɡ ba ŋɔ bá tɔ nyoa, ásɛ o fe tɔh o bwɛɛ tena nyoa.

³⁴ Nɛra la te ne o nae kɛ Juu tee on, dɛ ba pɛo dɛɛ bol kohona ŋɔ, “Ya Ɛfesos tena voɡ Aatemes nɔ dɔŋ toole!” Ba si ɡɛ naaa dɔŋhwere anɛ bwa.

³⁵ Belaa ba bwɛjen karake nomoa waa chɔ ba nyoa la le dɛ ɡel ba tɔ nyoa. Baa tɔ nyoa la, o ŋɔ ba be ŋɔ, “Yabala Ɛfesos tena, nomɛlbwa jemɔ kɛŋɔ ya bwɛɛ nɔɔ dɔ ya voɡjen Aatemes voɡ dea dɛɛ nyiŋi o ta. Yanee dɔ Aatemes bwe la aa le Korowii doa ba le harɛ la ɡe.

³⁶ Tɔŋla toole ɡɛ waa nɔ te ta. Aa do ɡɛ nɔ, a chɛ kɛ he tɔ nyoa dɛɛ nyiŋi. A ta chɛ kɛ he ɛ waane dɛ ba le waa nɛ.

³⁷ Nɛra nɔ ta ya voɡ nɔ komɛlbwa ŋwɛɛ, ba ta on sisa wobol ɡe bolɛ. Aah dɛ bala haa ba ba ne bonɔ nɔ mun ɔ?

³⁸ Nomɛl ɛ Demetreɔs ne o bala waane aa, kɔɔto deene lole, nomonome baa dɛ bol waa a ta la ɡe lole. Bá ka samane dɔŋa bela.

³⁹ Gɛ ɡe laa aa, dɛ waane ta lole naa, tɔɔ la wee bwɛɛ nɔ nomonome aa cheme la, bá kpɔ bil ba sie.

⁴⁰ Yaa dɛ do ɡbɔɡa ken nɔ, ya ta kɛrɛdɛ nyiŋaa, baa koh a waa lawɛ yaa. Ba lawɛ yaa ɡe aa, yaa wobɛlbwaa dɔ bol, dɛ́ baɡle ɡbɔɡa nɔ mun.”

⁴¹ Waa bol waa nɔ ɡɛ la, o ɡelɔ nɛra la peɡre.