We-ɛɛla 17 - mzwDBL

Pɔɔl ne Silas Tesalonika laŋa

¹ Pɔɔl ne Silas aa ira dɛɛ kaa la, ba kaa kpɔ bwɛɛre ane baa dɛ yera Amfepɔles ne Apolonia ta dɛ ka le Tesalonika. Dɛ Tesalonika Juu tena dɔ cheremi dea bela.

² Pɔɔl la cheremi dea bela ɡɛ o yon dɛɛ ɛ bwɛɛre bwa ta la. Waa lɔ bela la, o yawanyoa atoro bwa dɛ o ne Juu tena la dɛ bol waa dɛɛ tɔŋle dɔŋa Korowii waa baa chwera la ta.

³ Dɛ o dɛ baɡ ba Kristo la Korowii aa baɡɛ nyoa ŋɔ wɛɛ tomɔɔ ó ba lɛ nɛwɛnyina la waa Korowii Tɔn bini, ásɛ ba jemɛ kɛ Korowii keamere fa baɡlɔ kɛŋɔ Kristo la ɛɛ na wahalaa dɛ́ sewɛ, dɛ́ ir seo ta. Gɛ baa chwera la chɛ kɛ a ɛ. Waa bol ɡɛ tonɛ la, o ŋɔ ba be ŋɔ, “Yeesu nɔ n yon dɛɛ bol o waa nɔ, onee Kristo la.”

⁴ Bane yarada Pɔɔl waa la, dɛ ba ja o ne Silas nɛ. Bela haahna baa ɛ nɛnjena la ɡalɡa, ne bela Grik tena baa dɛ tomɛ Korowii la ɡalɡa ɡe baa ja ba nɛ.

⁵ Nɛra baa yarada Pɔɔlwa waa la, dɛ baa ja asɔre tena la nɛɛ la aa dɛ warɛ la, dɛ aa somɛ Juu tena la be, asɛ ba ka nyin nɛŋkasale baa wola toma dɔe dɛ yon do dembaah dɛɛ ɡaaɡe ɡbo la, dɛ ir ba bwaawee, asɛ ba ne ba valɛ dɛɛ do ɡbɔɡa bwɛɛ la bwa. Ba la Jasen dem ŋɔ bá fe ka lawɛ Pɔɔl ne Silas ba tɛ bwɛɛla la.

⁶ Baa wola ban dɔe lawɛ la, ba tɛɡre Jasen ne asɔre tena la bane ka tɛ bwɛɛ la nomonome, dɛ nyɛɡ dɛɛ ŋɔ, “Nɛra nɔ, ban chɔɡ nɛra liire bobɛlbwa dɛɛ valɛ dɛ ɡel bobɛlbwa ɛɛ ɛ yeŋyeŋ la. Taraken ba ba ya bwɛɛ nɔ ta,

⁷ asɛ Jasen ɡe lɛɛ ba do o dem. Waa ya Koojen Siisa aa wola nyin laanee baa ɛ. Ba ŋɔ Koojen bɛl ɡe berɔ do le ja ya Koojen nɔ nɛ. Dɛ o sɔne Yeesu.”

⁸ Bwɛɛ la tena ne ba nomonome aa no waa nɔ la, a ɡelɔ ba liire ɛ sakaa.

⁹ Nomonome la ɡelɔ Jasen ne asɔre tena la kpɔ suuɡa cheɡ ajinamuu kɛŋɔ baa wobɛlbwaa ɛ kpa. Jasenwa waa baa ɛa laanee ba nyiŋi dɛ lɛɛ ba suuɡa dɛ ta ba.

Pɔɔl ne Silas Bɛrea laŋa

¹⁰ Bɔr aa baa jo la, asɔre tena la kpɔ Pɔɔl ne Silas kaa Bɛrea. Baa la bela la, ba kaa jo bela cheremi dea bini.

¹¹ Dɛ bela Juu tena la waa do kɛrɛdɛ ɡwaa Tesalonika Juu tena, dɛkalkɛŋɔ ba lɛ Yeesu waa la silɛɛ ne, dɛ won dɛɛ nyiŋi Korowii Tɔn bini tɔpere bɛlbwa dɛ́ɛ na, dɛ́ jemɛ kɛ waa Pɔɔl aa dɛ bol la, kpelaa kɛɛ nyosonee yɔ.

¹² Nɛra la kɛrɛdɛ yarada Yeesu dɛ kpɔ ba te tɛo. Grik haahna baa ɛ nɛnjena la kɛrɛdɛ ne ba baala bwa yarada Yeesu.

¹³ Juu tena baa lɔ Tesalonika aa noa kɛŋɔ Pɔɔl kaa bol Korowii Waa Bɛrea ɡe la, ba ba bela dɛ ba do ba, asɛ ba bwaawee ir Pɔɔlwa nɛ.

¹⁴ Belaa asɔre tena la ɡel Pɔɔl kaa mpo nyoa buɡ ta, asɛ Silas ne Timoti te so Bɛrea.

¹⁵ Nɛra la baa tɔ Pɔɔl sie dɛɛ kaa o ne la, ba la o ne ka tel Atens, dɛ berɛ kaa Bɛrea. Baa dɛ kaa la, Pɔɔl ŋɔ ba be ŋɔ bá ka ŋɔ Silas ne Timoti be ásɛ ba ba o be warane.

Pɔɔl ne Silas bwɛjen Atens laŋa

¹⁶ Pɔɔl aa soɡe bwɛjen Atens bela dɛɛ kpa Silas ne Timoti la, o nao kɛ voɡa su bwɛɛ la bwa. Waa na ɡɛ la, o tea bini chɔɡɔ.

¹⁷ Anomanta, dɛ o dɛ la bela cheremi dea o ne Juu tena, ne Grik tena baa dɛ tomɛ Korowii ɡɛ Juu tena aa dɛ tomɔ la kaa nyiŋi Korowii waa la bini. Dɛ tɔpere bɛlbwaa wɛɛ so bwɛɛ la fɔɡbaah, asɛ dɛɛ bol waa nɛra baa dɛ ba bela la be, asɛ o ne baa nyiŋi Korowii waa la bini.

¹⁸ Dɛ nɛra bane hweli bela wejema baa dɛ yera Epikuria ne Stoik la, dɛ ɡe ɛ ɡɛ wejema la chachaɡla bela. Dɛ a ɡɛ nɛra nɔ ɡe dɛ tɔŋlo dɛɛ ŋɔ, “Ɛrɛɛ wobobala te nɔ ɡee bol nɔɔ?” Asɛ bane ɡe ŋɔ, “Jamɔ harɛ bɛl voɡa waa wɛɛ bol nɔ.” Pɔɔl aa dɛ bol Yeesu ne seo ta ira waa ba lii ɡɛ la.

¹⁹ Anomanta, ba kpɔ Pɔɔl kaa bela nomonome baa dɛ yer ba Areɔpaɡos tena la, dɛ ka ŋɔ o be ŋɔ, “Baɡle he wefala haa kpoŋa dɛɛ ɡaaɡe la bini yá no.

²⁰ Ya ta he waa nɔ te dɔŋa noɛ bwa, anomanta, ya dɛ nyin kɛ he baɡle yaa a mun.”

²¹ Dɛ Atens tena ne ba hɔɔhra tomaa wefala bola ne wefala pɛɛra dɛ́ no.

²² Pɔɔl aa cheɡɛ nomonome la sie la, o ŋɔ ba be ŋɔ, “N nao kɛŋɔ he Atens tena dɛ tomɛ voɡa kɛrɛdɛ,

²³ dɛkalkɛŋɔ maa dɛ ɡaaɡe he bwɛɛ nɔ ta dɛ na bɔra haa dɛ tomɛ la, n na kon haa dɛ ɛ saraha o ta, dɛ na kɛŋɔ baa chwerɛ bobɛl ŋɔ, ‘Ya dɛ tomɔ, kɛ yaa on jemɛ.’ Kon haa wola on jemɛ dɛ ɡee tomɔ la, o waa mɛɛ bol he be la. O sɔne Korowii.

²⁴ Korowiirii ta harɛ ne kwaa aa lɔ o ta bwa. On dɔ nyundua ne harɛ bwa. O waane laa chɔɔbɔra nɛwɛnyini aa maa tɛo la wa.

²⁵ Nɛwɛnyini kondikwaa waa laa o do le, waa nɛwɛnyini komɛlbwa nyin, dɛkalkɛŋɔ on dɛɛ tɛ yaa mkpa ne hweera ne komɛlbwa.

²⁶ Nɛmbeŋkpoŋii o ta, asɛ a ɡɛ nɛn la lolɛ harɛ bɛlbwa nɛra, asɛ ba ya perɛ harɛ bwa. Waa ta nɛwɛnyini la, o do bɛlbwa tɔpera ne ya dobɔra.

²⁷ On saahna ɛa ɡɛ, ásɛ nɛwɛnyini ɛɛ laɡre dɛɛ nyin o bɔr kɛ nyoŋa ken, ásɛ o bɔr nyina bini la, bá nao. Kɛ kasinteŋ, Korowii toole bojaŋ. O ne ya bɛlbwa baah aa jaŋɛ.

²⁸ Nomɛl te kompɛɛ, ‘Korowii alaworomɛɛ ya bwa do le, dɛɛ hwee, dɛɛ ɛ ya tomare.’ He nɛra baa dɛ chwerɛ wobobeela la ɡba di ɡɛ waa nɔ danseɛ dɛ ŋɔ, ‘O biirii ya ɡbabir.’

²⁹ Korowii biirii yan, anomanta, ya bɛ on kpɔ maɡɛ suuɡaswɛm ne suuɡapoŋ ne bwea koŋkwaare nɛwɛnyini ɡbaɡba aa kpɔ ba liire maa la.

³⁰ Saŋ la nɛwɛnyini fa aa wola Korowii ŋwɛnɛ jemɛ kɛrɛdɛ la, o laa sie kpɔ ba wechɔɡa ta. Kɛ taraken te, o ŋɔ hárɛ ta bobɛlbwa nɛra charɛ ba liire, dɛ́ le ba wechɔɡa ta,

³¹ dɛkalkɛŋɔ o do tɔpere waa dɛ ba nɛwɛnyini bwa waa bola kasinteŋ ne la. O le nɛn wɛɛ ba waa la bola. O ir naate seo ta ásɛ nɛra jemɛ kɛŋɔ kpelaa o waa la.”

³² Pɔɔl aa bol seo ta ira waa la, dɛ ba dɛ mamɔ, asɛ bane ɡe ŋɔ, “Ya dɛ nyin kɛ he bol he waa la yá no ja.”

³³ Belaa o le ba bini, dɛ kaa.

³⁴ Nɛra la bane te yarada Yeesu waa la, dɛ ba ja o nɛ. Nɛra baa yaradaa la bini bɛl sɔne Daneseɔs. Dɛ Areɔpaɡos nomonome la bɛlee on. Haah bɛl baa dɛ yerɔ Damaris ne nɛra bane yarada Yeesu waa la.