We-ɛɛla 16 - mzwDBL

Timoti kaa ja Pɔɔl ne Silas nɛ

¹ Pɔɔl baa le Dɛɛbe ne Lestra dɛ ba na asɔre te bɛl baa dɛ yerɔ Timoti la bela. Dɛ o nya ɛ Juu te dɛɛ yarada Yeesu wa. Asɛ o mɛɛ te ɛ Grik te.

² Dɛ asɔre tena baa lɔ Lestra ne Ikooniam la bwa dɛ yerɛ Timoti sɔndɛɛɡe taeh.

³ Pɔɔl sie lɛ Timoti nɛ, asɛ wɛɛ nyin kɛ o teŋɛ o nɛ, dɛ koh Juu tena baa lɔ bela la waa dɛ teŋe Timoti pen, dɛkalkɛŋɔ dɛ ba jemɔ kɛ Grik tee o mɛɛ.

⁴ Baa valɛ bwɛɛre la ta dɛɛ kaa la, ba bol koŋkiila Yeesu toroma la ne Jerusalam asɔre tena nomonome la aa baɡla kɛ nɛ́ra ɛɛ ki la waa bela asɔre tena be.

⁵ Gɛɛ ba ɛ dɛ won cha bela asɔre tena ba do kpeɡri Yeesu waa baa dɛ yarada la ta, asɛ nɛnfala ɡe baa ja ba nɛɛ tɔpere bɛlbwa.

Pɔɔl wepila waa naa

⁶ Ba valɔ dɛ ka kpɔ harɛre baa dɛ yera Frejea ne Galaasia la ta, dɛkalkɛ Korowii Domadɛɛɡe la ta ban ŋwɛnɛ tɛɛ bá bol Yeesu waa la Eesia harɛ.

⁷ Baa dɛ kaa dɛ ka tel Maesea harɛ jaɡa la, ba fe ŋɔ bá jo Bitiinia harɛ ta, kɛ Yeesu Domadɛɛɡe ta ban ŋwɛnɛ tɛɛ,

⁸ asɛ ba berɛ kpɔ Maesea harɛ ta kaa Troas.

⁹ Awola jwaana ne la, Pɔɔl na wepila ane. O nao kɛ Makidoonia harɛ te bɛl aa cheɡa dɛɛ soŋo dɛɛ ŋɔ, “Ba Makidoonia dɛ ba lɛ yaa.”

¹⁰ Pɔɔl aa na wepila la, men maa dɛ chwerɛ tɔn nɔ ne o kpɔ ya te dɛ kaa Makidoonia harɛ, dɛkalkɛŋɔ ya jemɔ kɛ Korowiirii dɛɛ nyin kɛ ya la ka bol Amanesoma la bela tena be.

Liidia liire chara dɛ́ yarada Korowii

¹¹ Anomanta, ya cheɡɛ Troas jo ɡbera ta, dɛ pa sie kaa Samotres. Tɔ aa pera la, ya la Neapolis,

¹² dɛ ka che bela kpɔ harɛ kaa Felepae. Dɛ Felepae nɔɔ ɛ Makidoonia be pera bwɛɛre la bwa bwɛjen. Dɛ koojen waa dɛ nyiŋi Rom harɛ laanee dɔ bela. Ya biɡri bela tama.

¹³ Ona Tɔpere la ta la, ya le dem dɛ la bwɛɛ la moo nyoa. Dɛ ya dɛ lii kɛ Juu tena ɛɛ dɛɛ cheme belaa dɛɛ soŋe Korowii. Dɛ haahna bane cheme bela, asɛ ya so harɛ dɛ bol waa ba be.

¹⁴ Dɛ nɛra baa lɔ bela dɛ no waa yaa bola la, bɛl sɔne Liidia. Yale aa kɔlaa wɛɛ yoɡ, dɛ do bwɛjen Tiatra dɛɛ tomɛ Korowii. Waa dɛ no waa Pɔɔl aa dɛ bol la, Korowii pili o liire, asɛ o noa kɛrɛdɛ dɛ yarada Yeesu dɛ kpɔ o te tɛo.

¹⁵ Ya sɔ o ne o dem tena bwa Korowii ne, asɛ o soŋe yaa ŋɔ, “Dɛ he jemɔ ŋɔ n dɛ tomɛ Korowii kɛrɛdɛ naa, amɔ hé ba so n be.” O soŋe yaa, asɛ ya kaa o dem.

Ba lawɛ Pɔɔl ne Silas do dea

¹⁶ Awola bɛl, ya dɛ la Korowii soŋebɔr moo nyoa bela dɛ ka na bitolo bɛl. Dɛ nɛra bane yomii, asɛ kwaa ɡe ɛɛ ir o nɛ, asɛ o yon dɛɛ voɡɛ. Dɛ o voɡa la ɡelɔ nɛra baa dɔɔ la ɛɛ dɔ suuɡa taeh.

¹⁷ A ɡɛ bitolo la do lɔŋɔre teŋɛ ya ne Pɔɔl nɛɛ dɛɛ ŋɔ, “Nemenɛ Korowii tomɛ nɛra nɔ he be la! Waa haa ɛ ásɛ Korowii lɛ heyaa laanee baa bol la!”

¹⁸ Tɔpera aŋwɛnɛ bwa dɛ ɡɛɛ wɛɛ ɛ, anomanta, a baa pe Pɔɔl, asɛ o berɛ habɔɔ dɛ kpɔ bandia ŋɔ kwaa la aa dɛ ir yomhaah la nɛɛ la be ŋɔ, “Yeesu Kristo sɔn ta, hé le o nɛ!” Buɡ la ta, dɛ kwaa la le o nɛ.

¹⁹ Kwaa la aa lea la, dɛ yomhaah la aa wone dɛɛ voɡɛ kpa. Nɛra baa dɔɔ la aa naa kɛŋɔ o bɛ won voɡa la tɔ ba suuɡa dɔe ŋwɛnɛ la, ba lawɛ Pɔɔl ne Silas dɛ tɛɡ ba kaa ba bela Rom nomonome be bombaah ta.

²⁰ Dɛ a ɡɛ nomonome nɔɔ dɛɛ bol nɛra waa dɛɛ pa bole. Yom la dɔɔranar la ŋɔ ba be ŋɔ, “Juu tenaa nɛra nɔ. Ba hae baa dɛ ha ya bwɛjen nɔ tena la aa were.

²¹ Wefala aa wola toole ya mmara ta kɛ ya Rom tena teŋɛ a ta laanee baa baɡle.”

²² Dɛ nɛnlaa bane lɔ bela dɛɛ chɛɡre Pɔɔl ne Silas, asɛ Rom nomonome la wur Pɔɔl ne Silas laala, dɛ ɡel ba lɔɔ ba chweremi ne.

²³ Ba ɡelɔ ba lɔɔ ba kohona dɛ tɔ ba dea, dɛ ŋɔ nɛn waa dɛ nyiŋi nɛra baa tɔ ba dea nɛɛ la be ŋɔ ó nyiŋi ba nɛɛ ba bɛ ba chwa.

²⁴ Rom nomonome la aa bol ɡɛ la, nomoa waa dɛ nyiŋi nɛra baa tɔ ba dea nɛɛ la kpɔ Pɔɔl ne Silas ka do loŋ ta, dɛ do daa ba nakpale ta.

²⁵ Harambaŋa la, dɛ Pɔɔl ne Silas dɛ soŋe Korowii dɛ ɡo yela dɛɛ kpɛɛ Korowii, asɛ nɛra baa do ba dea ja ba nɛɛ la ɛɛ no ba be.

²⁶ Kerabeŋkpoŋ dɛ harɛ jiɡro kohona, asɛ deene la jiɡri le mun ta ka le nyundua. Kerabeŋkpoŋ dɛ deene la ɡbeni bwa pilo, asɛ jɔɡrɔre baa do nɛra la bwa cha le ba nɔɔra ta.

²⁷ Nomoa waa dɛ nyiŋi nɛra baa do ba dea la iro, dɛ na kɛ ɡbeni la aa pila. Waa na ɡɛ la, o te ŋɔ nɛra la bwa chwao, dɛ laa o kere kpɔ ŋɔ ó kpo o te.

²⁸ Asɛ Pɔɔl do lɔŋɔ kpeɡri nɛɛ ŋɔ, “Bɛ he te kpo! Ya bwa lole!”

²⁹ Belaa nomoa la ŋɔ bá tɛo kandea. Baa ba kandea ne la, o chwao jo Pɔɔl ne Silas be. Dɛ o dɛ ɔmɛ ɔma tenten, asɛ o bwara ɛɛ sa, asɛ o ba ɡuŋi ba sie.

³⁰ O laɡ ba le buse dɛ bɔɔ ba ŋɔ, “Nomonome, ɛrɛɛ mɛɛ ba ɛɛ ásɛ Korowii lɛɛ mɛ nɔ?”

³¹ Belaa ba ŋɔ, “Yarada ya Dɔɔ Yeesu dɛ́ kpɔ he te tɛo. He ɛ ɡɛ naa, wɛɛ lɛ he ne he dem tena bwaa.”

³² Ba bol Yeesu waa la baɡle o ne nɛra baa lɔ o dem la bwa.

³³ Awola harambaŋa la ne la, nomoa la yaɡle chal la aa ɛ Pɔɔlwa bwara la. Dɛ lɔɔraa Rom nomonome baa dɛ bol nɛra waa dɛ́ pa bole la ɡel ba lɔɔ ba, asɛ chal ɛ ba bwara. O ne o dem tena bwaa ba sɔ Korowii nee awola,

³⁴ asɛ o kpɔ ba ba o dem, dɛ ba tɛɛ ba kondikwaa ba di. Ate, o ne o dem tena bwa sie lɛ kɛŋɔ baa yarada Korowii dɛ kpɔ ba te tɛo la.

³⁵ Tɔɔ aa pera chɔɔ ne la, Rom nomonome la tomɛ nɛra ŋɔ bá ba ŋɔ nomoa la be ŋɔ ó ɡel Pɔɔl ne Silas kaa.

³⁶ Belaa o ŋɔ Pɔɔl be ŋɔ, “Rom nomonome tomɛ nɛra ŋɔ bá ba le he ne Silas dea. Anomanta, hé le, dɛ́ kaa. Kórowii ka do heya.”

³⁷ Anee Pɔɔl ŋɔ toroma la be ŋɔ, “Rom tenaa ya bwa, kɛ ba lɔɔ yaa pɛɛpɛɛ bombaah ta dɛ tɔ yaa dea, dɛ ba ta ya waa bolɛ dɛ na wechɔɡa bɛlbwa ya nɛ. Aah taraken nɔ sɔeh ba berɛ dɛɛ nyin dɛ sɔh ta yaa nɔ naa? Aa maɡre! Hé ɡel Rom nomonome la ɡbaɡba ba lawɛ yaa le!”

³⁸ Toroma la kaa bol Pɔɔl waa waa bola la Rom nomonome la be. Nomonome la aa noa kɛŋɔ Pɔɔl ne Silas ɛ Rom tena la, ba ɔmɔ.

³⁹ Anomanta, ba baa do ba jaŋɡbare, dɛ laɡ ba le bela baa do ba dea la, dɛ soŋ ba ŋɔ bá le bwɛɛ la ta.

⁴⁰ Pɔɔl ne Silas aa le bela la, ba la Liidia dem. Ba kaa na bwɛɛ la asɔre tena la bela, dɛ bol waa baɡ ba, dɛ do ba ɡbemba dɛ kaa.