We-ɛɛla 15 - mzwDBL

Jerusalam chema wa

¹ Baala bane le Juda harɛ ba Anteɔk dɛ baa baɡle nɛra baa yarada Yeesu waa la dɛɛ ŋɔ, “Dɛ he ta he pena teŋe ɡɛ Mosis Mmara la aa baɡla la aa, haa Korowii mkpa dɔe ba.”

² Pɔɔl ne Banabas ne ɡɛ nɛra la tɔŋle dɔŋa kɛrɛdɛ. Anomanta, ba tomɛ o ne Banabas ne Anteɔk asɔre tena la bane Jerusalam ŋɔ bá ka na Yeesu toroma la ne asɔre tena nomonome la a ɡɛ waa la wa.

³ Baa tom ba la, ba kaalɔ. Baa dɛ kaa la, ba kaa kpɔ harɛre ane baa dɛ yera Finiisia ne Samaria ta dɛɛ kaa, dɛɛ bol bela asɔre tena be ɡɛ nɛra baa wola Juu tena ɛɛ la aa bera dɛɛ yarada Yeesu dɛ kpɔ ba te tɛo. Ba ɡe aa no ɡɛ la, ba sie lɛo taeh.

⁴ Baa tel Jerusalam la, Yeesu toroma la ne bela asɔre tena ne ba nomonome lɛɛ ba kɛrɛdɛ. Pɔɔlwa baɡle toma Korowii aa cheɡɛ ba nɛɛ dɛ ɛ bwa.

⁵ Dɛ asɔre tena la bane ɛ Farisii tena. Ba iro dɛ ŋɔ, “A chɛ kɛ nɛra baa wola Juu tena ɛɛ dɛ baa yarada Yeesu taraken la ɛɛ teŋe ba pena dɛɛ teŋɛ Mosis Mmara ɡe ta.”

⁶ Belaa Yeesu toroma la ne asɔre tena nomonome la cheme dɛ nyiŋi waa la ta.

⁷ Ba bol waa dɛ tɔŋle dɔŋa la sie, asɛ Pita ir che dɛ ŋɔ, “Yabala, he jemɔ kɛ Korowiirii fa lee mɛ he bini ŋɔ ń bol o Amanesoma la baɡle banɔ la baa wola Juu tena ɛɛ la, ásɛ ba ɡe no o waa dɛ yarada.

⁸ Korowiirii jemɛ nomɛlbwa nyu bini, dɛ tɛɛ ba o Domadɛɛɡe ɡɛ waa tɛ yaa la, dɛ baɡle kɛ o nɛraa ba ɡe.

⁹ O ta baɡlɛ kɛŋɔ ba korɔ ya korɛ. Baa yarada Yeesu waa la waa Korowii laa ba wechɔɡa kpɔ ba nɛ.

¹⁰ Aah dɛ ɛrɛ waa hɛɛ nyin kɛ he daah Korowii dɛ na nɔɔ? Dɛ bontɔɡa ya ne ya naawa bwa fa aa wola wone che la laa hɛɛ nyin he kpɔ choɡ ba nɔ naa?

¹¹ Aa maɡre! Yarada yaa yarada ya Dɔɔ Yeesu la waa o na ya sum dɛ cha yaa, dɛ lɛ yaa. Gɛ tentenee ba ɡe yaradao o lɛɛ ba.”

¹² Nɛra baa cheme bela la bɛlbwa ta berɛ tɔŋle kpa, dɛ tɔ nyoa dɛɛ no Pɔɔl ne Banabas be. Pɔɔl ne Banabas baɡle nyokpowaa ne wekpeɡa Korowii aa kpɔ ba ɛ nɛra baa wola Juu tena ɛɛ la bini.

¹³ Baa bol waa tonɛ la, Jems ɡe bol waa ŋɔ, “Yabala, hé no n be!

¹⁴ Seemɔn Pita baɡle ɡɛ Korowii aa tɔ sie ɛ dɛ baɡle kɛ o dɛ nyin nɛra baa wola Juu tena ɛɛ la taeh. O baɡlɔ ŋɔ Korowii le ba bini bane ŋɔ ba ɛ o nɛra.

¹⁵ Korowii keamere la bwaa fa bol a ɡɛ waa nɔ dɛ chwerɛ Korowii Tɔn bini ŋɔ,

¹⁶ ‘A habɔɔ la, mɛɛ berɔɔ ba nyiŋi Devid kora waa ɡua kɛŋɔ dea waa kua chole la ta. Mɛɛ berɔɔ ir ba kora la kɛŋɔ dea waa chola ba kwaa mao la, dɛ́ tɛ ba naa bɛl kpeɡri ásɛ o di kora ja,

¹⁷ ásɛ harɛ ta nɛra baa kaa baa wola Juu tena ɛɛ la bwa ba nyin n bɔr, dɛ́ tom mɛ. Men lee ba ŋɔ ba ɛ n nɛra. N Naa Korowiirii ŋɔ ɡɛ.

¹⁸ A saŋ la bwaa o ɡel nɛra na ɡɛ waa nɔ.’

¹⁹ Gɛ n te aa naa laanee kɛ, ya bɛ Mosis Mmara nɔ kpɔ dɛɛ ha nɛra baa wola Juu tena ɛɛ dɛ charɛ ba liire dɛɛ teŋɛ Korowii ŋwɛnɛ ta la,

²⁰ kɛ yá chwerɛ ba tɔn ŋɔ ba bɛ voɡa kwaa dɛɛ di, dɛ laa ba te kpɔ jwamane waa ta, dɛ bɛ kon baa wola o baŋa teŋe o sewɛ la dɛɛ di, dɛ bɛ chal dɛɛ di,

²¹ dɛkalkɛŋɔ Mosis Mmara nɔ yaa baɡle a waa nɔ, bwɛɛre bɛlbwa taa nɛra baa dɛ baɡla la do. Ona Tɔpere te bɛlbwa taa baa kure Mosis Mmara waa nɔ cheremi deene ta, dɛ le saŋ la bwa ba le fini.”

Tɔn baa chwera ka tɛ nɛŋhɔɔhra baa yarada Yeesu la

²² Belaa Yeesu toroma la ne asɔre tena la ne ba nomonome bwa ɛ ba liire kɛŋɔ, baa le ba bini banee, ásɛ dɛ tomɛ ba ne Pɔɔl ne Banabas Anteɔk. Judas baa bera dɛɛ yerɔ Basabas la ne Silasee ba le. Dɛ a ɡɛ nɛra nɔ ɛ asɔre tena la nomonome baa dɛ tɔ ba sie la bane.

²³ Asɛ ba chwerɛ tɔn tɛɛ ba ŋɔ bá kpɔ kaa. Tɔn la bini waa nɔ, “Yabala haa lɔ Anteɔk ne Siiria harɛ ne Silisia harɛ haa wola Juu tena ɛɛ la, Yeesu toroma la ne ya asɔre tena ne ya nomonome yaa ɛ he bala Jerusalam la bwa dɛ na heya.

²⁴ Ya noɔ kɛ ya bini bane ba dɛ baɡle heyaa waane, asɛ he liire ɛ heyaa sakaa ken. Ya laa tom ba.

²⁵ Anomanta, ya chemo ya nyoa pɛ, asɛ ya ŋɔ yaa le nɛraa ásɛ ba ne Banabas ne Pɔɔl ba wa aa too ya tea kohona la ba he be.

²⁶ Bambile bwa nee Pɔɔl ne Banabas ɛɛ ɛ ya Dɔɔ Yeesu Kristo toma nɔ. Dɛ baa dɔ sewee toma nɔ ɛɛ ta noo, ba waane laa.

²⁷ Ya ŋɔ Júdas ne Silas ɡe ja ba nɛɛ dɛ ba bol tɔn nɔ bini waa tenten hé no.

²⁸ Waa ya ne Korowii Domadɛɛɡe la aa naa laanee kɛ, aa were kɛ ya ɡel hɛɛ ki komɛlbwa ka ja anɔ aa dɛ ba wona cha heyaa nɔ ta.

²⁹ Anee kɛ, he bɛ voɡa kwaa dɛɛ di, he bɛ chal dɛɛ di, he bɛ ol baa wola o baŋa teŋe o sewɛ dɛɛ di, hé laa he te kpɔ jwamane waa ta. Dɛ he wono dɛɛ ki anɔ bwa naa, he wobɛlbwa ɛɛ maɡroo tɛ heya. Kórowii cha heya.”

³⁰ Ba kpɔ tɔn la do Pɔɔl ne Banabaswa nɔn ta, dɛ ta ba ŋwɛnɛ, asɛ ba kaa Anteɔk. Ba kaa yerɛ bela asɔre tena bwa cheme, dɛ kpɔ tɔn la tɛɛ ba.

³¹ Baa kure tɔn la, ba sie lɛo, dɛkalkɛŋɔ tɔn la do ba ɡbemba.

³² Dɛ Korowii keameree Judas ne Silas. Ba bol waa taeh dɛ kpɔ do ba ɡbemba, dɛ ja ba.

^33-34 Ba soɡe Anteɔk tama, asɛ ba bala la ŋɔ bá berɛ la nɛra baa tom ba la be, dɛ ŋɔ Kórowii la ba ne sɔnɔnɔɔ.

³⁵ Pɔɔl ne Banabas te soɡe Anteɔk tama, asɛ ba ne ba bala bane ɛɛ bol Amanesoma la dɛɛ baɡle ya Dɔɔ Yeesu waa nɛra be.

Pɔɔl ne Banabas dɔŋa baah peɡra

³⁶ A habɔɔ la, Pɔɔl ŋɔ Banabas be ŋɔ ó ɡel ba berɛ la bwɛɛre baa baɡle nɛra Yeesu waa a ta la bwa ta, dɛ́ ka na ɡɛ ba bala baa baɡ ba Yeesu waa la aa doa.

³⁷ Dɛ Banabas dɛ nyin kɛ Jɔn Mak ja ba nɛɛ dɛ la.

³⁸ Dɛ Pɔɔl ɡe be la, a ta maɡrɛ kɛ Jɔn Mak la bɛl, dɛkalkɛŋɔ o fa teŋɛ ba nɛɛ toma la ta, dɛ ka tel baah ta, dɛ chwa ɡel ba Pamfilia.

³⁹ Pɔɔl ne Banabas beɡre wa, dɛ a nyoa kpeɡri, asɛ ba peɡri. Banabas kpɔ Jɔn Mak ja o nɛɛ ba jo ɡbera ta kaa Saepros,

⁴⁰ asɛ Pɔɔl ɡe kpɔ Silas. Baa dɛ ba kaala la, asɔre tena la kpɔ ba do Korowii nɔn ta ŋɔ wɛ́ɛ nyiŋi ba nɛ.

⁴¹ Baa dɛ kaa la, ba kpɔ Siiria ne Silisia harɛ ta dɛɛ ja bela asɔre tena, dɛɛ do ba ɡbemba.