We-ɛɛla 12 - mzwDBL

Pita le dea baa doo nɛra nyoa kpo

¹ A ɡɛ saŋ la, dɛ Juu tena kooro bɛl baa dɛ yerɔ Hɛrɔd la larawe asɔre tena bane dɛɛ fiɡ ba.

² O ɡelɔ ba teŋe Jɔn dɔɔ Jems nyu.

³ Waa ɛ ɡɛ dɛ na kɛŋɔ a lɛ Juu tena sie la, belaa o ɡel ba lawɛ Pita ɡe. Paanoo Iisi Aa Wola Toole a ta Tɔpejen dii taa a ɡɛ waa nɔ chiɡ.

⁴ Kooro Hɛrɔd aa lawɛ Pita la, o doo dea dɛ ɡel soojare bananaarɛ bele banaarɛ ɛɛ daahno. Dɛ o fe dɛ lii kɛ dɛ ba di Galekaa Tɔpejen la tonaa, o fee bol Pita waa nɛnfuuh baah ta dɛ́ pa bole ásɛ nomɛlbwa na.

⁵ Gɛɛ a do ba do Pita dea. Kɛ dɛ o bala asɔre tena la pɛpɛo dɛ soŋe Korowii dɛɛ tɛo tenten.

⁶ Kooro Hɛrɔd fe lawɛ tɔpere bɛl, dɛ́ fe bol Pita waa la dɛ́ pa bole. Jwaana la tɔɔ aa per ásɛ tɔpere la tel la, dɛ Pita chɔ soojare baa dɛ daahno la banɛ baah ta dɛɛ chɔ dom, asɛ jɔɡrɔre anɛ do o nɔɔra. Dɛ soojare banɛ lɔ dea la doonyoa dɛɛ daah bela.

⁷ Kerabeŋkpoŋ dɛ Korowii nyundua torome cheɡɛ dea la bini, asɛ bela chaah. O baa lɔ Pita dɛ chumu, dɛ ŋɔ o be ŋɔ, “Ir warane!” Buɡ la taa, Pita nɔɔra jɔɡrɔre la foo le.

⁸ Asɛ nyundua torome la ŋɔ, “Do he laala ne he naŋɡawa.” Pita aa ɛ ɡɛ nyundua torome la aa ŋɔa la, o berɔ kwaa ŋɔ o be ŋɔ, “Kpɔ he yal tɔ, dɛ́ teŋɛ n nɛ.”

⁹ Belaa Pita teŋɛ o nɛɛ le dea la bini. Waa teŋɛ o nɛɛ dɛɛ le la bwa, dɛ o ta jemɛ kɛŋɔ wekpelaa o na la. Dɛ o dɛ lii kɛ wepila anee wɛɛ na.

¹⁰ Ba baa ɡarɛ boloɡle soojare aa dɛ daah la, dɛ ba ɡarɛ nɛɛte ɡe ja, dɛ ba tel doonyoa o ɡbera aa ɛ buni asɛ ba che o ta le buse dɛɛ jo bwɛjen la bini la. Baa dɛ tel ɡbera la bɔr, dɛ o ɡbo yao, asɛ ba le dɛ kpɔ ŋwɛnɛ bɛl ta dɛɛ kaa. Buɡ la taa, nyundua torome la den nyoɡre.

¹¹ Belaa Pita ta na waa aa ɛo la, dɛ ŋɔ, “Namee n ta jemɛ kɛ N Naa Korowiirii ɡela o nyundua torome nɔ ba lɛɛ mɛ le Kooro Hɛrɔd nɔn ta, dɛ lee mɛ waa Juu tena bwa fe aa dɛ lii kɛ mɛɛ nao la ta.”

¹² Waa na ɡɛ la, o la haah bɛl baa dɛ yerɔ Mɛɛre la dem. A ɡɛ Mɛɛre nɔ biee Jɔn Mak. Dɛ nɛra cheme bela pirim dɛɛ soŋe Korowii.

¹³ Pita lɔ dem la ɡbera, asɛ tolo bɛl baa dɛ yerɔ Roda ba dɛ fe ba yao.

¹⁴ Waa no taa la kɛŋɔ Pitaa la, silɛɛ kohona ɡelɔ o ta berɛ ya ɡbera la, dɛ berɛ chwa la ka ŋɔ asɔre tena la be ŋɔ Pita cheɡɛ buse.

¹⁵ Ate, ba ŋɔ, “Choɡlaa hɛɛ we kɛɛ?” Baa dɛ tɔŋlo la bwa, dɛ o nyoa kpeɡri kɛrɛdɛ wɛɛ baɡle kɛ kpelaa wɛɛ bol la. Anee ba ŋɔ, “Amɔ te o lalee.”

¹⁶ Ate, dɛ Pita ta dɛ lɔ ɡbera la. Baa yaa dɛ nao la, ba nyoa kpoo.

¹⁷ Anee Pita kpɔ nɔn ɛɡ ba ŋɔ bá bwa tɔ nyoa, asɛ dɛ baɡle ɡɛ Korowii aa leo o dea doe la ta bwa. O ŋɔ ba be ŋɔ bá ŋɔ Jems ne ba bala la kar la be, dɛ le kaa bobɛl.

¹⁸ Tɔ aa pera la, sibeɡra chole soojare baa dɛ daah bela la nɛɛ taeh, asɛ baa nyin Pita bɔr yalayala ken, dɛkalkɛŋɔ ba ta wone jemɛ bela waa kpɔa.

¹⁹ Kooro Hɛrɔd aa baa no kɛŋɔ Pita nyoɡrɔ la, o ɡelɔ ba nyin o bɔr, kɛ ba ta on nae. Anomanta, o ɡelɔ ba bɔɔ soojare la waa kɛrɛdɛ, dɛ ŋɔ bá kpoo ba. A habɔɔ la, Kooro Hɛrɔd le Juda harɛ dɛ ka so Sisaaria tama.

Kooro Hɛrɔd seo wa

²⁰ Dɛ o baah di bwɛɛre baa dɛ yera Taaya ne Sidon la tena nɛɛ taeh. Bela bwɛɛre nɔ tena nyoa pɛo, asɛ ba ba dɛ ba na Kooro bonɔɔna nomoa bɛl baa dɛ yerɔ Blastus la ŋɔ ó cha ba, dɛ́ larawe Kooro ásɛ ba ne o pɛ, dɛkalkɛŋɔ dɛ Kooro Hɛrɔd harɛ taa a ɡɛ nɛra nɔ ɛɛ yawɛ ba kondikwa.

²¹ Kooro Hɛrɔd tɛɛ ba tɔpere báa berɛ kpɔ ba o be ja. A ɡɛ tɔpere la aa tela la, o do o koolaala dɛ so o kookara ta, dɛ bol waa baɡle nɛra la.

²² Waa bol waa la, nɛra la kooɡaɔ, dɛɛ ŋɔ, “Nɛwɛnyini laa bol waa nɔ. Voɡee berɛ nɛn dɛ bol waa la.”

²³ Kooro Hɛrɔd aa wola ɡelɛ ba kpɛɛ Korowii, dɛ lɛ kpɛɛra la tɛ o te la, kerabeŋkpoŋ dɛ Korowii nyundua torome baa lɔɔ bil, asɛ kpaloɡlare diu o sewɛ.

²⁴ Anɔ bwa aa dɛ ɛ la, dɛ nɛra dɛ yarada Korowii waa la, asɛ aa perɛ bobɛlbwa.

²⁵ Banabas ne Sɔɔl aa ɛ toma baa tom ba ŋɔ bá la Jerusalam ka ɛ tonɛ la, ba ne Jɔn Mak kaa Anteɔk.