We-ɛɛla 11 - mzwDBL

Pita baɡle o we-ɛɛla mun Jerusalam

¹ Yeesu toroma la ne ba bala asɔre tena baa lɔ Juda harɛ ta la noɔ kɛŋɔ nɛra baa wola Juu tena ɛɛ la bwa no Korowii waa la dɛ yarada.

² Pita aa la Jerusalam la, ba bala Juu tena baa dɛ maŋkura penteŋ waa la pwaoh ŋɔ,

³ “Ɛrɛ waa he ka choɡ nɛra baa wola Juu tena ɛɛ, baa wola ba pena teŋni dem dɛ saah di kwaa bela nɔɔ?”

⁴ Baa ŋɔ ɡɛ la, anee Pita le waa la mun ta dɛ baɡle waa la bwa aa bala o di ba kondikwaa la.

⁵ O ŋɔ ba be ŋɔ, “Bwɛjen Jopaa n do dɛɛ soŋe Korowii, dɛ na wepila ane. N nao kɛŋɔ baa lawɛ komɛl kɛŋɔ yajen nyoo bɔre anaarɛ bwa, kwaane do o ta, a saɡɛ jɛɛhjɛɛh dɛ le nyundua dɛɛ ba harɛ.

⁶ Maa nyiŋi o ta la, n na ola, a bini anɔ la aa dɛ di ol ne anɔ la aa dɛ chwe kpɔɡa bwa, ne anɔ la aa dɛ tuuɡi harɛ ne anɔ la aa dɛ huuh bwa, dɛ jumbii bwa.

⁷ Asɛ n no kɛŋɔ nomɛl aa ŋɔ n be ŋɔ, ‘Pita, ir dɛ́ kpo chwe.’

⁸ Belaa n ŋɔ, ‘Aa maɡre, n Dɔɔ! N ta a ɡɛ koŋkiila nɔ dii bwa. A ɛ doŋa tɛ mɛ kɛrɛdɛ.’

⁹ Asɛ naate berɛ kwaa ŋɔ n be nyundua bela ŋɔ, ‘Kon Korowii aa laa o doŋa kpɔ o nɛɛ la, bɛ on kondoŋ lii kpa.’

¹⁰ A ɡɛ waa nɔ ɛo kera atoro, asɛ kon la berɛ kaa nyundua kwaraa.

¹¹ Buɡ la ta, dɛ baala batoro bane baa le Sisaaria ba tom ba n be denɔ ba jo dem maa lɔ o ta la ta.

¹² Belaa Korowii Domadɛɛɡe la ŋɔ n be ŋɔ n bɛ ɔmɛ, kɛ ń teŋɛ ba nɛɛ kaa. Yabala banumɛl nɔ baa le Jopa nɔ ɡe teŋɛ n nɛɛ la Sisaaria, asɛ ya bwa ka jo Kɔnɛɛleɔs dem.

¹³ Belaa o ɡe baɡle ɡɛ o ɡe aa na nyundua torome o dem, asɛ o ŋɔ o be ŋɔ, ‘Tomɛ nɛn Jopa, ásɛ o la Seemɔn Pita be.

¹⁴ Wɛɛ bol waa he bee ásɛ he ne he dem tena bwa che a ta dɛ́ dɔ he nyu.’

¹⁵ Maa la o be la, maa pa mun dɛɛ bol waa la, dɛ Korowii Domadɛɛɡe la baa so o ne o dem tena nɛɛ kɛŋɔ waa baa so ya nɛɛ loɡla la.

¹⁶ Belaa n lii ɡɛ ya Dɔɔ fa aa ŋɔa ŋɔ, ‘Nee nee Jɔn faa sɔ nɛra Korowii ne, kɛ he te, Korowii Domadɛɛɡe nee baa ba he sɔe la.’

¹⁷ Yaa baa yarada Yeesu la, kon Korowii aa kpɔa tɛ yaa laanee o tɛ nɛra nɔ la. Aah dɛ n ɡee umeo dɛ́ tɔŋle Korowii ɔ?”

¹⁸ Baa no ɡɛ la, ba nyoa sɔɔhnɔ, asɛ ba jam Korowii dɛ ŋɔ, “Amɔ te Korowiirii tɛ nɛra baa wola Juu tena ɛɛ la ɡe ŋwɛnɛ, ásɛ ba charɛ ba liire, dɛ́ le ba wechɔɡa ta, dɛ́ dɔ ba nyu!”

Asɔre tena baa lɔ Anteɔk

¹⁹ Steeven seo la habɔɔ fiiɡa baa fiiɡi asɔre tena asɛ ba peɡre la ɡelɔ bane kaa bojaŋa tenten. Hale bane la Finiisia ne Saepros dɛ Anteɔkwa bwa. Baa dɛ valɛ a ɡɛ harɛre nɔ ta la, ba ta Yeesu waa la bolɛ nomɛlbwa be ka ja Juu tena nɛ.

²⁰ Kɛ Saepros ne Sairini baala bane ba ɡe aa ɛ asɔre tena la te iro, dɛ la Anteɔk dɛ ka bol ya Dɔɔ Yeesu Amanesoma la waa Grik tena be.

²¹ Dɛ Korowii dɛ cha ba o kpeɡri ne, asɛ nɛra no Yeesu waa la dɛ yaradaa, dɛ charɛ ba liire, dɛ kpɔ ba te tɛ Yeesu. A ɡɛ nɛra nɔ warɔ kɛrɛdɛ.

²² Asɔre tena baa lɔ Jerusalam la baa no a ɡɛ waa nɔ, dɛ tomɛ Banabas ŋɔ ó la Anteɔk asɔre tena la be, dɛ́ ka na ɡɛ ba Korowii toma aa doa.

²³ Waa la bela dɛ ka na ɡɛ Korowii aa nyin ba dɛɛ cha ba la, o sie lɛo. Anomanta, o ja ba dɛ do ba ɡbemba ŋɔ báa teŋɛ Yeesu ŋwɛnɛ ta ba bambile bwa ne.

²⁴ Dɛ Banabas ɛ nɛndɛɛɡe asɛ Korowii Domadɛɛɡe ɡe so o nɛɛ kpeɡri nɛ. Dɛ o dɛ yarada Yeesu taeh dɛ kpɔ o te tɛo. Anomanta, nɛra charɛ ba liire pirim dɛ ba tomɛ Yeesu.

²⁵ Banabas la Taasos dɛ ka ɡaaɡe Sɔɔl bɔr.

²⁶ Waa nao la, o kpɔɔ kaa Anteɔk. Baa lɔ bela la, ba benanyobir bwa, dɛ ba ne bela asɔre tena dɛ cheme. Ba baɡle nɛra pirim Yeesu waa bela. Anteɔk belaa ba tɔ sie yerɛ nɛra baa yarada Yeesu la Kristo tena.

²⁷ A ɡɛ saŋ la, Korowii keamere bane le Jerusalam la Anteɔk.

²⁸ Dɛ ba bini bɛl sɔne Aɡabus. Korowii Domadɛɛɡe la ir o nɛ, asɛ o ir che dɛ na chaahna dɛ ŋɔ lɔrchɔɡe bɛl dɛ́ ba ba harɛ la ta bala. Kpela, a ɡɛ waa nɔ balɔ Klɔdeɔs kara dii saŋ.

²⁹ Belaa Yeesu habɔteŋra la ŋɔ baa pu siee ta suuɡa ɡɛ ba bɛlbwa aa wona laanee, dɛ́ ka tɛ ba bala asɔre tena baa lɔ Juda harɛ la mɔɔ lɔr la ba.

³⁰ Ba ta a ɡɛ suuɡa la, dɛ kpɔ tɛ Banabas ne Sɔɔl ba ka tɛ Juda harɛ asɔre tena la nomonome.