We-ɛɛla 10 - mzwDBL

Pita ne Kɔnɛɛleɔs

¹ Dɛ baa bɛl lɔ Sisaaria baa yerɔ Kɔnɛɛleɔs. Itali harɛ soojare bane nomoaa on.

² O ne o dem tena bwa dɛ tomɛ Korowii. Dɛ o dɛ cha Juu tena baa ɛ nyaara la taeh, dɛɛ soŋe Korowii saŋ bɛlbwa.

³ Awola bɛl, o na wepila ane wekee saŋ. O nao kɛŋɔ nyundua torome bɛl aa baa jo o be dɛ yerɔ ŋɔ, “Kɔnɛɛleɔs!”

⁴ Asɛ o ha sie nyiŋu ɔmee ne dɛ ŋɔ, “Ɛrɛɛ yɔ? A som aa, n Dɔɔ?” Asɛ nyundua torome la ŋɔ, “He soŋa haa dɛ soŋe Korowii, ne he chae haa dɛ cha nɛra la lɛ o sie, o dɛ ba he chae.

⁵ Tomɛ nɛra ba la Jopa dɛ́ ka yerɛ Seemɔn Pita ba.

⁶ O ɛ hɔɔh dɛ do ɡbansaba te bɛl waa soɡe mpo nyoa baa yerɔ Seemɔn la dem.”

⁷ Nyundua torome la aa bol waa tonɛ la, o kaalɔ, asɛ Kɔnɛɛleɔs yerɛ o bonɔɔna banɛ ne sooja bɛl waa dɛ tomɛ Korowii kohona dɛɛ teŋɛ o Kɔnɛɛleɔs nɛɛ saŋ bɛlbwa la,

⁸ dɛ bol waa la bwa chaɡ ba, dɛ tom ba Jopa.

Pita wepila waa naa

⁹ Tɔ aa pera baa kaa dɛ ka tel bwɛjen Jopa la, Pita teeh sal dea webaŋa dɛɛ ba Korowii soŋa. Dɛ wee cheɡɛ nyufala.

¹⁰ Dɛ lɔr lawɔ, asɛ wɛɛ nyin kwaa dɛ́ di, kɛ dɛ ba ta dɛ ɛ o kondikwa. Belaa o na wepila ane.

¹¹ O nao kɛŋɔ nyundua aa pera, asɛ ba lawɛ komɛl kɛŋɔ yajen o nyoo bɔre anaarɛ bwa, kwaane do o ta a saɡɛ jɛɛhjɛɛh dɛ le nyundua dɛɛ ba harɛ.

¹² Dɛ naa anaarɛ tena ne ola aa lɔ harɛ ta dɛɛ tuuɡi tea ta ne anɔ la aa dɛ huuh, dɛ jumbii aa dɛ ɡah bwa lɔ yal la ta.

¹³ Belaa Pita no kɛŋɔ nomɛl aa ŋɔ o be ŋɔ, “Pita! Ir dɛ́ kpo chwe!”

¹⁴ Asɛ Pita ŋɔ, “Ei! N Dɔɔ, ɡɛ aa won maɡre. N ta a ɡɛ koŋkiila dii bwa.”

¹⁵ Anee naate berɛ ŋɔ o be nɛɛtena ŋɔ, “Kon Korowii aa laa o doŋa kpɔ o nɛɛ la, bɛ on kondoŋ yerɛ kpa.”

¹⁶ A ɡɛ waa nɔ ɛo kera atoro mɔɔ kon la berɛ kaa nyundua.

¹⁷ Pita aa wola waa la mun jemɛ dɛ so sakaa la, kerabeŋkpoŋ dɛ nɛra Kɔnɛɛleɔs aa tom ba la balɔ. Ba bɔɔ Seemɔn dem dɛ ka che dem la doonyoa,

¹⁸ dɛ yerɛ nomɛl dɛ bɔɔro ŋɔ, “Seemɔn la baa dɛ yerɔ Pita la lɔ dem nɔ ta kɛɛ?”

¹⁹ Pita liire aa lɔ waa la ta o ta ɛɛ lii la, Korowii Domadɛɛɡe ŋɔ o be ŋɔ, “Nɛra batoro bane dɛ nyin he bɔr,

²⁰ anomanta, bɛ ɔmɛ. La ba be, dɛkalkɛŋɔ menee tom ba.”

²¹ Anee Pita ir la nɛra la be dɛ ka ŋɔ ba be ŋɔ, “Men nɔ, a som aa?”

²² Asɛ ba ŋɔ, “Soojare nomoa Kɔnɛɛleɔs laanee tomɛ yaa. O ɛ nɛndɛɛɡe waa dɛ tomɛ Korowii, asɛ Juu tena bwa ɛɛ duuru. Nyundua torome bɛlee ŋɔ o be ŋɔ ó yerɛ ba o dem dɛ no waa haa dɛ ba o be bola.”

²³ Belaa Pita ŋɔ ba be ŋɔ bá chɔ o be, ásɛ tɔɔ per ba kaa. Tɔ aa pera la, Pita bala asɔre tena baa lɔ Jopa la bane ja o nɛɛ asɛ ba ne toroma la kaa.

²⁴ Baa lea la, tɔɔ perɔ mɔɔ ba tel Sisaaria. Dɛ Kɔnɛɛleɔs yerɛ o lolanar ne o daamanar cheme dɛ so dɛɛ kpa Pita.

²⁵ Waa tel Kɔnɛɛleɔs dem bela dɛɛ ba dem la bini joe la, Kɔnɛɛleɔs baa chemo dɛ ɡuŋi harɛ.

²⁶ Anee Pita lawɔ ir dɛ ŋɔ, “Ir harɛ, he nɛwɛnyini dɔŋee men.”

²⁷ Pita ne o bol waa ka jo dem bela. Belaa Pita na kɛŋɔ nɛra cheme bela pirim,

²⁸ asɛ o ŋɔ ba be ŋɔ, “He ɡbabir jemɔ kɛŋɔ ya Juu tena aa nɛra baa wola Juu tena ɛɛ bini jo. Kɛ Korowii berɔ ŋɔ n be ŋɔ n bɛ nomɛlbwa nɛndoŋ yerɛ.

²⁹ A waa he yer mɛ n ba warane la. N dɛ bɔɔ heyaa ŋɔ ɛrɛɛ he ŋɔ ń ba ɛɔ?”

³⁰ Belaa Kɔnɛɛleɔs ŋɔ, “Tɔpera anaarɛɛ nɔ, maa lɔ n dem saŋ nɔ bɔr tenten dɛɛ soŋe Korowii wekee saŋ la, kerabeŋkpoŋ dɛ baa bɛl waa do laalapoŋa kpelkpel cheɡɛ n sie

³¹ dɛ ŋɔ, ‘Kɔnɛɛleɔs! Korowii no he soŋa haa dɛ soŋo dɛ na he chae haa dɛ cha nyaara la bwa.

³² Tomɛ nomɛl Jopa baa bɛl baa dɛ yerɔ Seemɔn Pita la be ó ka yerɔ ba. O ɛ hɔɔh dɛ do ɡbansaba te bɛl waa soɡe mpo nyoa baa yerɔ Seemɔn la dem.’

³³ A waa n tomɛ nɛra he be warane la. He ɡe ɛ waa kɛŋɔ haa bala nɔ. A waa ya bwa cheme Korowii sie bonɔ la. Ya dɛ nyin waa Korowii aa ŋɔa hé ba bol ya be la dɛ́ no.”

³⁴ Belaa Pita pa o wobol mun dɛ ŋɔ, “Taraken te n nao kɛŋɔ kpela, nɛwɛnyini bɛlbwa ta o dɔŋ ɡwaalɛ Korowii be.

³⁵ Kɛ harɛ bɛlbwa ta la, nomɛlbwa waa dɛ ɔmɛ Korowii dɛ jemɔ la, Korowii sie dɛ lɛ o nɛ.

³⁶ He jemɛ waa waa ŋɔa bá ka bol Israel tena be dɛ baɡle Yeesu Amanesoma aa dɛ tɛ bosɔɔhna la. Yeesuu komɛlbwa Dɔɔ.

³⁷ Jɔn o fa aa dɛ sɔ nɛra Korowii nee la toma la habɔɔ Yeesu waa che, dɛ perɛ Juda harɛ bwa la. Galilia harɛɛ a pa mun.

³⁸ He jemɛ ɡɛ Korowii aa kpɔ o Domadɛɛɡe ne o kpeɡri tɛ Yeesu waa le Nasarɛt la wa. Dɛ Korowii teŋɛ Yeesu nɛ, asɛ o valɛ dɛɛ ɛ wedɛɛɡa dɛɛ chah nɛra Bɔnsam aa lɔ ba bil la.

³⁹ O waa waa ɛa Juda harɛ ta ne Jerusalam la bwaa ya na dɛɛ di a danseɛ. Ba kpaaro pɛl daɡaɡre ta dɛ kpoo.

⁴⁰ Asɛ o seo habɔɔ tɔpetooro wee la ta la, Korowii iru seo ta, dɛ ɡel o kpɔ o te ba chaɡle yaa.

⁴¹ Korowii ta ɡelɛ o kpɔ o te chaɡle nomɛlbwa ka ja ya nɛra waa le yaa ŋɔ yá di o danseɛ nɔ nɛ. Ya ɡɛ nɛra nɔ ne o pɛ nɔn di kwaa o seo ta ira la habɔɔ.

⁴² Onee le yaa dɛ ja yaa ŋɔ yá bol o waa baɡle nɛra bwa, dɛ́ di danseɛ kɛŋɔ onee Korowii le ŋɔ ó ba di weera ne lala bwa wa.

⁴³ Korowii keamere la bwa bol Yeesu waa ŋɔ nomɛlbwa waa yarada o waa la, o nomanta, Korowii ɛɛ kpɔ naate wechɔɡaa kɛo.”

⁴⁴ Pita ta aa dɛ bol waa la, dɛ Korowii Domadɛɛɡe baa so nɛra baa dɛ no o wobol la bwa nɛ.

⁴⁵ Juu tena baa ɛ asɔre tena ba ne Pita le Jopa ba aa na ɡɛ la, ba nyoa kpoo kɛŋɔ Korowii aa ɡela o Domadɛɛɡe la ba so nɛra baa wola Juu tena ɛɛ ɡba nɛ,

⁴⁶ dɛ ɡel baa bol wobofala dɛɛ jam Korowii la. Belaa Pita ŋɔ,

⁴⁷ “Gɛ tenten Korowii aa tɛ yaa o Domadɛɛɡe laanee o tɛ nɛra nɔ ɡe la. Aah aa do ɡɛ nɔ, umee dɛ́ won vɔm ba Korowii nee sɔe yɔ?”

⁴⁸ Belaa Pita ŋɔ bá sɔ ba nee Yeesu Kristo sɔn ta. Baa sɔ nɛra la nee tonɛ la, ba ɡelɔ Pita so ba be tɔpera anɛ.