Wepila 9 - mzwDBL

¹ Nyundua torome waa teŋa nue la hoh o bɛla, asɛ n na wewee bɛl le harɛ. Korowii tɛo Bɔnsam bɔluŋ la safoa.

² Asɛ o laa bɔluŋ la pili. Waa pilu la, chuu leɔ puul kɛŋɔ nijena chuu aa dɛ le la, asɛ wee bir, bɔr bwa ɛ jwumaa ken.

³ Asɛ tontombɛre le chuu la bini dɛ ba harɛ ta. Korowii tɛa kpeɡri a doma ɛɛ we kɛŋɔ nɔm ken,

⁴ dɛ ŋɔ a be ŋɔ a bɛ harɛ nɔ ta kpɔɡa kɛɛ papooni kɛɛ daa bɛlbwa chɔɡ, kɛ á dorome nɛra baa wola Korowii nso la dɔe ba tili ta la.

⁵ O ta an kpeɡri tɛɛ a dom ba dɛ́ kpoo ba, kɛ á dom ba dɛ́ wee ba ɡɛ nɔm aa dɛ we la, dɛ́ ka tel korobie anue.

⁶ Ásɛ ɡɛ saŋ baa nyin kɛ seo ba kpoo ba, kɛ baa dɔ, ásɛ seo chwa le ba be.

⁷ Tontombɛre la le jaɡre baa kpɔa dɛɛ la ka yo laa. A dɔ kwaane a nyuune ta aa le suuɡaswɛm kooɡbɛrɛre, asɛ a siebɔr le nɛn.

⁸ A dɔ nyumpona kɛŋɔ haah, a nyena le nyujente nyena ken.

⁹ Kwaa tɔ a bambili kɛŋɔ laa batakaare bune aa dɛ bɔle bambile la, asɛ a kena ɛɛ ɡbɔɡre kɛŋɔ torɔɡore aa wara ba vɔwa pɛl jaɡre dɛ chwa dɛɛ kaa laa la.

¹⁰ A dɔ dini kɛŋɔ nɔrɔme ken dɛɛ domɛ. A dini taa á dɔ kpeɡri, dɛ́ domɛ nɛn, dɛ́ weo korobie anue.

¹¹ A dɔ a kooro. O ɛ Bɔnsam torome waa dɛ nyiŋi Bɔnsam Bɔluŋ la ta. Hibru tena dɛ yerɔ Abadɔn, Grik tena ɡe ɛɛ yerɔ Apoleɔn. O sɔn la munii “Nɛn waa dɛ chɔɡ kwa.”

¹² Wekpeɡa aa tɔ sie la tonɔ, dɛ ta ka a bele anɛ habɔɔ a ta ɛɛ ba bala.

¹³ Nyundua torome waa jaa numɛl la hoh o bɛla, asɛ n no taa bɛl le kon baa dɛ fuh konsɔɔhsoma o ta ba kpɔ suuɡaswɛm ɛo o che Korowii sie dɛ dɔ loŋkoni anaarɛ la ta. Loŋkoni anaarɛ la bwa taa lɔŋɔ la le.

¹⁴ O ŋɔ nyundua torome waa jaa numɛl dɛ dɔ bɛla la be ŋɔ, “Pur Bɔnsam toroma banaarɛ la baa vɔɡ ba Yufretis Moo nyoa la ta.”

¹⁵ Asɛ ba pur Bɔnsam toroma banaarɛ la Korowii fa aa vɔɡ ba dɛɛ kpa awola tɔpere la. O do dɔŋhwere la ne tɔpere la ne korobie la ne bena la baa kpɔ pur ba bá kpoo nɛra. Ba bɔne harɛ ta nɛra bini bɔre atoro naa, banɔ la baa dɛ ba kpoora la ɛɛ tel bɔr beŋkpoŋ nɛraa.

¹⁶ Ba baɡlɔ kɛŋɔ Bɔnsam toroma la dɔ soojare kaɡboŋa bele kaɡboŋ ɡe bele lafraanɛ dɛ so jaɡre ta.

¹⁷ N na jaɡre la kɛ chaahna ken, a dɔɔranar so a ta, dɛ do laa batakaare bune aa dɛ bɔle bambile la, asɛ a swɛɛ kɛŋɔ chal, ane do kɛŋɔ burum, asɛ ane ɡe kɔl kɛŋɔ solmen. Asɛ jaɡre la nyuune do kɛŋɔ nyujentena nyuune. Asɛ nii ne chuu ne jebɔrɔwe ninlao ɛɛ le a nyoo.

¹⁸ Ba bɔne harɛ bini nɛra bwa bini bɔre atoro naa, banɔ la nii ne chuu ne jebɔrɔwe ninlao aa dɛ le jaɡre la nyoo la aa kpoora la ɛɛ tel bɔr beŋkpoŋii.

¹⁹ Jaɡre la kpeɡri lɔ a nyoo ne a dini bwa ta. A dini la do kɛŋɔ harɛkwa, dɛ dɔ nyuune dɛɛ choɡri.

²⁰ A ɡɛ waa nɔ kwaraa ta la, nɛra baa kaa baa wola sewɛ a ɡɛ waa la ta la ta ba liire charɛ, dɛ le ba tonchɔɡa ta, dɛ ta ɛɛ tomɛ Bɔnsam toroma ne voɡa. Suuɡaswɛm ne suuɡapoŋa ne bwea ne daa baa kpɔa ɛ voɡa la aa na, aa waa no, aa won ir valɛ ɡe, kɛ ba dɛ toma.

²¹ Ba ta ba liire charɛ ba nɛŋkpoa ne sɔm we-ɛɛla ne jwamane ne ŋwɛɛ ta.