Wepila 3 - mzwDBL

Tɔn Jɔn aa chwera ka tɛ Saades asɔre tena

¹ Tɔn nɔ dɛ kaa nyundua torome waa cheɡa tɛ asɔre tena baa lɔ Saades la be. “Men maa dɔ Korowii Domare anuanɛ ne weweela anuanɛ la ŋɔ, N jemɛ he we-ɛɛla. Nɛra jemɔ kɛŋɔ he soɡe le bokpeɡa ta, kɛ he sewɔ. He kpeɡri haa dɔa dɛɛ teŋɛ n nɛɛ la nyoa dɛ sɔɔh.

² Anomanta, hé ir nyu ne dɛ́ kwaa a ɡɛ waa a nyoa aa dɛ sɔɔh la, á won che kɛrɛdɛ, dɛkalkɛŋɔ n ta he we-ɛɛla bɛlbwa nae a do wer dɛ toɡre n Mɛɛ Korowii be.

³ Hɛ́ɛ lii ɡɛ ba fa aa baɡle heyaa ne waa haa noa la, dɛ́ lawɛ a bini, dɛ́ charɛ he liire le he wechɔɡa ta. Dɛ he ta nyu ne iraa, mɛɛ piɡri heyaa kɛŋɔ ŋwɛɛ ken, haa wola jemɛ ɡɛ saŋ maa ba he be.

⁴ He ta dɔ nɛra tama baa wola ɡelɛ a do kɛŋɔ wechɔɡa doŋa do ba nɛ. Mɛɛ tɛɛ ba yapoŋaa bá tɔ, n ne ba valɛ, dɛkalkɛŋɔ ba chɛ ɡɛ.

⁵ Naate waa won yo le la, mɛɛ tɔɔ yapoŋee kɛ ban. Maa o sɔnee fee le Mkpa Tɔn la bini bwa. Mɛɛ bol o waa n Mɛɛ ne o nyundua toroma la bee, kɛŋɔ n nɛnee on.

⁶ Nomɛlbwa waa dɔ deŋna la, ó no waa Korowii Domadɛɛɡe la aa dɛ bol asɔre tena be la.”

Tɔn Jɔn aa chwera ka tɛ Feladɛlfea asɔre tena

⁷ Tɔn nɔ dɛ kaa nyundua torome waa cheɡa tɛ asɔre tena baa lɔ Feladɛlfea la be. “Kenii men maa do kaih, dɛ ɛ kasinteŋ te, dɛ dɔ Devid safoa, dɛ o pili komɛl nomɛlbwa aa wola won tɔɔ, dɛ o tɔ komɛl ɡe aa, nomɛlbwa aa wola won pilu la ŋɔ,

⁸ N jemɛ he we-ɛɛla. Hɛ́ɛ no! N pili ŋwɛnɛ tɛ heya, nomɛlbwa aa won tɔɔ, dɛkalkɛŋɔ he kpeɡri aa kanɛ. Kɛ he wono dɛɛ teŋɛ n webaɡla ta. He ta tɔeh kɛ n ne he laa. He ta n nɛɛ teŋa ɡelɛ.

⁹ Hɛ́ɛ no! Bɔnsam habɔteŋra baa dɛ teŋe nyosone, baa wola Juu tena ɛɛ dɛɛ yerɛ ba te Juu tena la, mɛɛ ɡeloo bá ba ɡuŋi he sie, dɛ́ jemɛ kɛŋɔ n dɛ nyin heya.

¹⁰ Haa noa tɛ mɛ, dɛ lawɛ bambile dɛ na wahala nomanta, mɛɛ lɛ heyaa le wahala aa dɛ ba harɛ nɔ ta nɛra bwa nɛɛ dɛ́ ba daah ba la ta.

¹¹ N dɛ ba taraken. Hé lawɛ waa haa jema la bini kiŋkiŋ, ásɛ dɛ bɛ ɡel nomɛlbwa won neɡre heyaa he paŋɛ kompoŋ baa dɛ ba heyaa vɔwa he yoi dɛ le ta la.

¹² Naate waa won yo le la, mɛɛ ɡeloo ó ɛ kɛŋɔ pila n Mɛɛ Korowii Dea bini, waa wola belaa le kpa bwa. Mɛɛ chwerɛ n Mɛɛ Korowii sɔn ne o bwɛjen Jerusalam sɔnee dawɛ o nɛ. Jerusalamfale waa dɛ ba n Mɛɛ Korowii be nyundua lee dɛ́ ba he be la sɔnee mɛɛ ba chwera dawɛ o nɛ, dɛ́ berɛ chwerɛ n sɔnfale dawɛ o nɛ.

¹³ Nomɛlbwa waa dɔ deŋna la, ó no waa Korowii Domadɛɛɡe la aa dɛ bol asɔre tena be la.”

Tɔn Jɔn aa chwera ka tɛ Laodisia asɔre tena

¹⁴ Tɔn nɔ dɛ kaa nyundua torome waa cheɡa tɛ asɔre tena baa lɔ Laodisia la be. “Kenii men maa ɛ Aamen, dɛ che tɛ Korowii, n waa dɔ kasinteŋ, Korowii che n nɛɛ ta komɛlbwa la ŋɔ,

¹⁵ N jemɛ he we-ɛɛla. Haa wɔbɛ, haa sɔnɛ ɡe. Dɛ wɔrɔbe kɛɛ sɔnee he den do aa, a fe bɔ.

¹⁶ Kɛ haa do ywɛlɛywɛlɛ haa wola wɔbɛ, haa wola sɔnɛ ɡe la, mɛɛ poo heyaa ta.

¹⁷ He ŋɔ he dɔ kwa, dɛ ɛ dɔɔhna, komɛlbwa ta heyaa nyae. Kɛ haa jemɛ kɛŋɔ he waa dɔ sinyana, dɛ do sum. He ɛ nyaara, dɛ nyoŋe, dɛ che mumɡbal.

¹⁸ Hé ɡel n ŋɔ he be. A wer kɛ hé yawɛ suuɡaswɛm maa kpɔ nii laa o doŋa bwa kpɔ o ta la, ásɛ dɛ dɔ kwa, dɛ́ yawɛ yapoŋa n be dɛ́ tɔ, ásɛ dɛ laa sihiih kpɔ he nɛɛ he mumɡbal cheɡa ta. Hé ba yawɛ tɛɛɡa ɡe n be, dɛ́ ka do he sibie ta dɛ́ won dɛɛ na.

¹⁹ Nɛra maa dɛ nyin ba la, n dɛ ja ba, dɛɛ tɛr ba deŋne. Anomanta, hé swɛɛ siwi dɛ́ charɛ he liire le he wechɔɡa ta.

²⁰ Hɛ́ɛ no! N cheɡɛ doonyoa dɛɛ lɔ ɡbera. Naate waa no n taa dɛ́ ba yaa mɛ la, mɛɛ jo o bee, n ne o pɛ nɔn di kwa.

²¹ Naate waa won yo le la, mɛɛ ɡeloo n ne o ka so n kookara ta, ɡɛ n fa aa yoa le dɛ ka so n Mɛɛ be o kookara ta la.

²² Nomɛlbwa waa dɔ deŋne la, ó no waa Korowii Domadɛɛɡe la aa dɛ bol asɔre tena be la.”