Wepila 21 - mzwDBL

Nyundufale ne harɛfale wa

¹ Belaa n na nyundufale ne harɛfale bɛl. Dɛ nyundua ne harɛ la a fa aa lole la te nyoɡrɔ, asɛ mpo ɡe nyoɡre.

² N berɔ na Korowii bwɛjen Jerusalamfale o le Korowii be dɛɛ ba harɛ. Korowii kwaaro kɛrɛdɛ kɛŋɔ hanfale yon kpɔ o te dɛɛ ba o jaa be la.

³ Asɛ n no takpeɡ bɛl o le kookara la ta, dɛ ŋɔ “Hɛ́ɛ no! Taraken Korowii dobɔree nɛwɛnyini bini. O ne banee dɛ́ so, bá ɛ o nɛra ásɛ o ɡe ɛ ba Korowii, ba ne o so.

⁴ Wɛɛ fee ba sinii bwaa ta baa wola wi kpa. Seo aa lee do kpa. Lokua ne wii ne bwadabii wee aa lee do kpa, dɛkalkɛ webena la bwa toole kpa.”

⁵ Anee naate waa soɡe kookara la ta la ŋɔ, “Taraken n ɡelɔ wobɛlbwa berɛ anfala.” Dɛ berɛ ŋɔ, “Chwerɛ ɡɛ waa nɔ, dɛkalkɛŋɔ n wobol nɔ ɛ kpela, neɡra toole a ta.”

⁶ Asɛ dɛ ŋɔ, “A tonɔ! Menee komɛlbwa Sitɔɔ ne a Muŋkaa, menee wobɛlbwa Mumpar ne a Jaɡa. Dɛ nomɛlbwa dɛ wi nyɔɡre aa, mɛɛ ɡeloo o la bela mkpa nee aa bula dɛɛ le, dɛ́ ka nyɔ ane pɛɛpɛɛ.

⁷ Naate waa wona yo le la ɛɛ dɔ kwaa nɔ bwaa. Mɛɛ ɛ Korowii waa dɛ tom mɛ, ásɛ o ɡe ɛ n bie.

⁸ Kɛ ɔmeera ne nɛra baa wola men yarada, ne nɛra baa dɛ ɛ waa maa kia, ne nɛra baa dɛ kpoo nɛra, ne nɛra baa dɛ bɔ jwamane, ne nɛra baa dɛ ɛ bebeewa, ne voɡtoroma dɛ nyosonteŋna. Ba bwa bɔree nii ne jebɔrɔwe aa yɛɛra chɔ kɛŋɔ moo dɛɛ fuh la ta. Anee seo nɛɛtena la.”

⁹ Belaa nyundua toroma banuanɛ la ba fa aa kpoŋe loɡa hɔhɔrɔwa bele anuanɛ aa ka mun la aa su a bwa la bɛl ba, dɛ ba ŋɔ n be ŋɔ, “Ba ń baɡle Pebie la hanfale la.”

¹⁰ Anee Korowii Domadɛɛɡe ir n nɛ, asɛ nyundua torome la kpɔ mɛ kaa bwejen bɛl doa. O kpeɡo kɛrɛdɛ. Belaa o baɡ mɛ Korowii bwɛjen Jerusalam la kɛ waa le Korowii be nyundua dɛɛ ba harɛ.

¹¹ Dɛ Korowii jirima ɡelɔ o bwa ɛɛ nyɛɡle kɛŋɔ bwedɛɛɡe baa dɛ yerɔ jasepa o do wer kohona dɛ do ɡereŋ la.

¹² Danjwɛjen bɛl waa kpeɡa kohona baro cheme. O doonyoone lɔ fi dɛ anɛ, asɛ nyundua toroma fi dɛ banɛ ɡe cheche a ta. Ba chwerɛ Israel deene fi dɛ anɛ la sɔna dawɛ doonyoone la ta.

¹³ O doonyoone la, atoro lɔ wee leebɔr, atoro do weekaŋle nyunduabɔr, atoro do wee cholibɔr, asɛ atoro ɡe do weekaŋle harɛbɔr.

¹⁴ Bwea baa ma danjwɛɛ la chɔŋɛ a ta la lɔ fi dɛ anɛ, asɛ Pebie la toroma fi dɛ banɛ la ɡe sɔna dawɛ bwea la ta.

¹⁵ Nyundua torome waa bol waa n be la kpoŋe suuɡaswɛm daa baa dɛ maɡɛ o ne kwa, dɛɛ ba bwɛɛ la ne o doonyoone dɛ danjwɛɛ la maɡa.

¹⁶ Bwɛjen la ɛ fɔɔskwɛɛ. O paɡri ne o jaŋne bwa kɛrɛdɛ. O kpɔ daa la dɛ maɡɛ bwɛɛ la, o jaŋne lɔ kwansini kaɡboŋ lafraanue. O paɡri ne o jaŋne, ne o nyundua kpeɡa bwa beŋkpoŋ.

¹⁷ O maɡɛ danjwɛɛ la. O kpeɡa del ɡe lɔ naɡale lafraanɛ dɛ fi dɛ anumɛl. Gɛ nɛwɛnyini aa dɛ maɡɛ kwaa la, ɡɛɛ o maɡa.

¹⁸ Bwɛɛ la danjwɛɛ la, bwedɛɛɡa baa yera jasepa la ɡboo ba kpɔ mao. Asɛ bwɛɛ la tenten ɡe, suuɡaswɛm tenten aa do ɡereŋ kɛŋɔ diɡii ba kpɔ mao.

¹⁹ Bwea fi dɛ anɛ baa ma danjwɛɛ la chɔŋɛ a ta la ɛ bwedɛɛɡa bwa soo siwi a yoɡ aa kpeɡa. A ɡelɔ o do wer. Bweloɡle la sɔne jasepa, nɛɛte la ɡe sɔne safaya, asɛ toorote la ɡe sɔne aɡat. Onɔ la waa teŋa naarɛ la ɡe sɔne ɛmeral.

²⁰ Onɔ la waa teŋa nue la sɔne onis, numɛlte la sɔne kanɛɛleɔn, nuanɛte la ɡe sɔne kwats, nuatorote la ɡe bɛrel, nuanaarɛ topas, asɛ onɔ la waa teŋa fi la sɔne chalsedone, fi dɛ beŋkpoŋ te la ɡe sɔne tɛɛkoes, asɛ fi dɛ anɛ te la ɡe sɔne ametes.

²¹ Doonyoone fi dɛ anɛ la ɡe la, bwedɛɛɡa baa dɛ yera pɛɛlre laanee ba kpɔ kwaa a bwa ɡbeni, bɛlbwa di ombir. Bwɛɛ la fɔɡbaah ɡe ɛ suuɡaswɛm tenten dɛ do ɡereŋ kɛŋɔ diɡi ken.

²² Korowii Dea baa cheme o bini dɛɛ tomɔ toole bela. Korowii Waa Ɛ Kpeɡri Bwa Dɔɔ la ne Pebie laanee cheɡa tɛ dea la.

²³ A ta hiaih kɛŋɔ wee ne korobie chaah bela. Korowii jirima dɛ chaah bela, asɛ Pebie la ɡe ɛ kandea bela.

²⁴ Harɛ nɔ ta nɛra ɛɛ ba valɛ o bochaah la taa, ásɛ koranar baa lɔ harɛ nɔ ta ɡe kpɔ ba jirima baa dɔa la ba jo o ta.

²⁵ O doonyoone yao che, aa wola tɔ saŋ bɛlbwa, dɛkalkɛ bɔr aa bela jo.

²⁶ Harɛ nɔ ta nɛra ɛɛ kpɔ ba jirima baa dɔa, ne ba kondɛɛɡa bwaa jo bela.

²⁷ Kɛ komɛlbwa doŋa te bɛlbwa aa lɔ o nɛɛ la aa won jo bela, ɡɛɛ nomɛlbwa ɡe waa dɛ ɛ sihihwaa dɛɛ teŋe nyosone la bɛlbwa ɡe aa wola won jo bela. Nɛra baa chwerɛ ba sɔna do Pebie Mkpa Tɔn la bini la, banee dɛ́ won jo bela.