Wepila 16 - mzwDBL

Korowii bandia aa lɔ loɡa anuanɛ ane bini wa

¹ N berɔ no takpeɡ bɛl o le Korowii Dea la bini, dɛ ŋɔ nyundua toroma banuanɛ la be ŋɔ, “Hé kaa dɛ́ ka fuɡe Korowii bandia la aa lɔ loɡa anuanɛ bini la ta harɛ.”

² Nyundua torome waa tɔ sie la kaalɔ, dɛ ka fuɡe o kwaa ta harɛ. Asɛ ŋwɛrchɔɡa aa dɛ we kohona lee nɛra baa dɔ olchɔɡe la nso dɛɛ tomɛ kon la baa mao la nɛ.

³ Asɛ nɛɛte ɡe ka fuɡe o kwaa do mpo ta. Asɛ mpo nee chɔɡ, dɛ do kɛŋɔ lale chal, asɛ kwaa aa lɔ mpo ta bwa serewe.

⁴ Asɛ toorote ɡe le dɛ ka fuɡe o kwaa do moo bɛlbwa ne neerare bwa ta, a beɡre chal.

⁵ Asɛ n no nyundua torome la waa chɔ neerare nyoa la kɛ waa ŋɔa, “Hen haa lole saŋ la bwa dɛ ba le fini, henee ɛ Korowii Waa Do Goroŋ dɛ ka tonɛ la, he waa haa bola dɛ pa nɛra bolchɔɡe la toɡrɔ,

⁶ dɛkalkɛŋɔ ba fa ɡelɔ he nɛra ne he keamere chal fuɡe. Anomanta, he tɛɛ ba chal ba nyɔ. Gɛɛ ba chɛ.”

⁷ Asɛ n no taa bɛl konsɔɔhsoma fuih bɔr, o ŋɔ, “Korowii Haa Ɛ Koranar Bwa Kooro la, he waa haa ɛa dɛ tɛr ba deŋne toɡrɔ dɛ ɛ kasinteŋ.”

⁸ Nyundua torome naarɛte la ɡe leɔ, dɛ ka fuɡe o kwaa ta wee ta, asɛ a tɛo kpeɡri wɛɛ nyaa kɛŋɔ nii ken,

⁹ dɛɛ nyaa nɛra, dɛkalkɛŋɔ o nyɛɡre taeh, asɛ baa bol Korowii waa dɔ kpeɡri hɔhɔrɔwa la nɛɛ nɛnhɛlwa. Ba ta ba liire charɛ dɛ le ba wechɔɡa ta. Ba ta on jirima tɛɛ.

¹⁰ Onɔ la waa teŋa nue la ɡe leɔ, dɛ ka fuɡe o kwaa ta olchɔɡe la kookara ta, asɛ bɔr bir nɛra waa dɛ di kora ba nɛɛ la bwa nɛ, asɛ baa menɛ nyoa ba bonyɛɡa la wa,

¹¹ dɛɛ chɛɡre Korowii waa lɔ nyundua ba bonyɛɡa ne ŋwɛra aa lɔ ba nɛɛ la wa. Ba ta liire charɛ dɛ le ba tonchɔɡa ta.

¹² Nyundua torome waa teŋa numɛl ɡe leɔ, dɛ ka fuɡe o kwaa ta Yufretis Moo ta, asɛ o bwa hweeh dɛ chɔ ŋwɛnɛ tɛ koranar baa le wee leebɔr dɛɛ ba la.

¹³ N berɔ na kwaa aa dɛ ir nɛra nɛɛ atoro a do kɛŋɔ sapone ken, bɛl le kontuuɡi damanta la nyoa, anɛ aa kaa la ɡe le olchɔɡe la ne keamechɔɡe la nyoa bini.

¹⁴ Bɔnsam kwaa, asɛ a won dɛɛ ɛ nyokpowa. A leɔ dɛɛ kaa harɛ nɔ ta koranar bwa be, dɛ́ ka lawɛ ba bwa cheme bá yo Korowii Waa Ɛ Kpeɡri Bwa Dɔɔ laa o tɔpejen la ta.

¹⁵ Hɛ́ɛ no. Mɛɛ piɡri heyaa kɛŋɔ ŋwɛɛ ken. Naate waa wola dom chɔ dɛ do o laala dɛ so dɛɛ kpa la na som. N balaa, waa mumɡbalee valɛ nɛra nao ásɛ sihiih kpoo.

¹⁶ Kwaa aa dɛ ir nɛra nɛɛ la lawɛ koranar bwa cheme bobɛl Hibru tena aa dɛ yerɛ bela Amaɡɛdɔn la.

¹⁷ Asɛ nyundua torome waa teŋa nuanɛ la ɡe fuɡe o kwaa do peu ta. N no takpeɡ bɛl le kookara la te be Korowii Dea bela, o ŋɔ, “A tonɔ.”

¹⁸ Asɛ bwaala ɛɛ nyɛɡle pelɔpelɔ bobɛlbwa, dɛɛ jiɡri, dɛɛ kɔɡre, asɛ harɛ jiɡri kohona. Korowii aa ta nɛwɛnyini bwa, harɛ ta ɡɛ jiɡre bwa. O jiɡra la ɔma.

¹⁹ Bwɛjen la peɡri atoro, asɛ harɛ nɔ ta bwɛɛre bwa paɡre. Korowii lii Babelɔnjen tena wechɔɡa la wa, dɛ ɡel ba nyɔ o danana nee a nyoa aa kpeɡa kohona kɛŋɔ seŋkpeɡa la.

²⁰ Ekwie aa lɔ neerare baahna, ne bwejena nyoɡrɔ, ba nyin a bɔr kahonɛ.

²¹ Tombwejena le nyundua dɛ do tɔɡre kɛŋɔ paanoo men bɔɡtɔ del dɛ ba lee nɛra nɛɛ dɛ a ɔma. Asɛ nɛra koh a waa dɛ chɛɡre Korowii.