Wepila 15 - mzwDBL

Nyundua toroma banuanɛ ne hɔhɔrɔwa bele anuanɛ

¹ N berɔ na wejena ane Korowii doa, a do kan dɛ baɡle waane. A ɛ nyokpoa taeh. N na nyundua toroma banuanɛ ba kpoŋe hɔhɔrɔwa bele anuanɛ. Anee hɔhɔrɔwa aa ka mun ba ɛ, dɛkalkɛŋɔ anee dɛɛ ba ɛɛ mɔɔ Korowii baah sɔɔh.

² N na bobɛl o do kɛŋɔ mpo aa chɔa dɛ do ɡereŋ asɛ nii do o ta. Asɛ nɛra baa pɔ olchɔɡe la ne kon la baa mao la nɛɛ dɛ vɛh o namba waa cheɡa tɛ o sɔn la kpoŋe Korowii janjelare dɛ che nee la jwɛh,

³ dɛɛ ɡo Korowii bonɔɔ Mosis ne Pebie la yel ŋɔ, “Oo, Korowii Haa Ɛ Koranar Bwa Kooro, he we-ɛɛla kan ɡa. Harɛ nɔ bwa Kooro, he ŋwɛnɛre toɡrɔ dɛ ɛ kasinteŋ.

⁴ Oo, n Naa Korowii, umee lole waa wola hen ɔmɔɔ? Umee wola hen sɔnee tɛɔ? He ɡboo do ɡoroŋ ka tonɛ. Harɛ ta nɛn te bɛlbwa ɛɛ ba ɡuŋi he siee dɛ́ tomɛ, dɛkalkɛŋɔ waa haa ɛa la toɡrɔ nomɛlbwa jemɛ.”

⁵ Anɔ habɔɔ la, n berɔ na Korowii Dea waa lɔ nyundua la baa pilu cheɡ. Korowii Dea Cheremibɔr baa baŋro wɛɛ baɡle kɛŋɔ Korowii lɔ o nɛra bini laanee.

⁶ Asɛ nyundua toroma banuanɛ baa kpoŋe hɔhɔrɔwa bele anuanɛ la le Korowii Dea la bini. Ba laala baa doa la wer dɛɛ nyɛɡle. Ba kpɔ suuɡaswɛm kirisore vɔrɔwe ba bambile.

⁷ Asɛ hweera kwaa anaarɛ la bɛl kpɔ suuɡaswɛm loɡa anuanɛ tɛɛ ba. Korowii waa lole saŋ te bɛlbwa la bandia su a bwa.

⁸ Korowii jirima ne o kpeɡri ɡelɔ chuu su o Dea la bini, nomɛlbwa aa wola won jo bela, atane kɛŋɔ hɔhɔrɔwa bele anuanɛ nyundua toroma banuanɛ la aa kpoŋa la aa ɛa tonɛ mɔɔ.