Wepila 10 - mzwDBL

Nyundua torome ne tɔnjeɡa bɛl wa

¹ Anɔ bwa habɔɔ la, n berɔ na nyundua torome bokpeɡa te bɛl, o le nyundua dɛɛ tu. O kpɔ baama tɔ kɛŋɔ yal ken. Bwaala deŋɡare bar o nyu, o siebɔr ɛɛ chaah kɛŋɔ wee, asɛ o nakpale ɡe do kɛŋɔ nii.

² O dɔ tɔnjeɡa bɛl waa pila do o nɔn ta, dɛ kpɔ o nadiɡ do mpo ta, o naɡal ɡe che baŋ,

³ dɛ si kpeɡri nɛɛ kɛŋɔ nyujente yon dɛɛ si la. Waa sia la, bwaala kɔra anuanɛ la ɡe sɛoh.

⁴ Bwaala kɔra la aa dɛ bol waa la, n fe dɛ nyin n chwerɛ, dɛ berɛ no taa bɛl nyundua o ŋɔ, “Gel waa bwaala kɔra anuanɛ la aa bola la do he ɡbo nyu bini. Gel a chwera!”

⁵ Asɛ n berɛ na nyundua torome la n fa aa nao o naa bɛl do mpo ta, bɛl ɡe che baŋ la aa tɛr o nɔndiɡ pa nyundua,

⁶ dɛ ŋwɛɛ Korowii waa lole saŋ bɛlbwa dɛ ta nyundua ne harɛ ne kwa aa lɔ a ta bwa, dɛ ta mpo ne kwa aa lɔ o ɡe ta la, dɛ ŋɔ, “Aa biɡri kpa.

⁷ Nyundua torome nuanɛte la bɛla la hoeh saŋee Korowii wesɔɔhla waa baɡle o bonɔɔna baa ɛ o keamere la bwa ɛɛ ba ɛɛ tonɛ.”

⁸ N berɛ no taa la waa le nyundua dɛ bol waa n be la. O ŋɔ, “La ka lɛ tɔn la waa pila dɛ do nyundua torome la o naa bɛl aa lɔ mpo ta, bɛl che baŋ la nɔn ta.”

⁹ N la o be dɛ ŋɔ ó kpɔ tɔnjeɡa la tɛ mɛ. O ŋɔ, “Lɛ dɛ́ chwe. Wɛɛ do somee kɛŋɔ tooh ken he nyoa bini, dɛ́ berɛ do kpeli he tea bini o ɛɛ haŋŋ ken.”

¹⁰ Asɛ n lɛ tɔnjeɡa la le o nɔn ta, dɛ kpɔ chwe, o do som n nyoa bini kɛŋɔ tooh ken. Maa lilo la, o berɔ do kpeli n tea bini o ɛɛ mɛ haŋŋ ken.

¹¹ Anee ba ŋɔ n be ŋɔ, “A chɛ kɛŋɔ hé baɡle waa aa dɛ ba nɛndamanta baa lɔ harɛre bwa ta ne wobol bwa soo siwi dɛ koranar bwa ɛɛ kerekere la ja.”