Wejereme 9 - mzwDBL

Nyokala beŋkpoŋii chɔ le tɛ nomɛlbwa

¹ N lii anɔ bwa kɛrɛdɛ, dɛ na kɛŋɔ nɛra ba wa aa toɡra, ne wejerema waa baa dɛ ɛ bwa, lɔ Korowii nɔn ta. Kɛ bɛlbwa aa jemɛ kɛ wedɛɛɡa, kɛɛ wechɔɡa chɔ le dɛɛ kpaa ba.

² Nyokala beŋkpoŋii chɔ le dɛ tɛ ba bwa, nɛra ba wa aa toɡra ne wechɔɡ-ɛɛra, nɛndɛɛɡa ne nɛnchɔɡa, banɔ la baa kah doŋa, ne banɔ la baa wola doŋa kaeh, dɛ banɔ la baa dɛ ɛ sarahare, dɛ banɔ la baa wola sarahare ɛ bwa. Waa aa chɔ le tɛ nɛndɛɛɡe la, ɡɛɛ a chɔ tɛ wechɔɡ-ɛɛ ɡe, ɡɛ aa doa dɛ tɛ nɛra baa dɛ ŋwɛɛ ntam la, ɡɛɛ a do tɛ banɔ la baa dɛ ɔmɛ ŋwɛɛra.

³ Waa aa ɛ wechɔɡa, dɛ do wobɛlbwa aa lɔ harɛ nɔ ta laanee nɔ. Webeŋkpoŋ laanee chɔ le tɛ nɛwɛnyina bwa. Wechɔɡa su nɛra bambili ɡɛ saŋ ba taa soɡe le dɛɛ ɡɛn, ásɛ mɔɔ bá piɡri sewɛ.

⁴ Kɛ nomɛlbwa waa wola sewɛ mɔɔ, dɛ ta so harɛ nɔ ta dɔ hwɛɡa. Nyoate waa wola sewɛ ɡwaa nyujente waa sewa.

⁵ Weera jemɔ kɛ baa sewɔɔ, kɛ nɛra baa serewa aa wobɛlbwa jemɛ, ba ta kembɔr bɛlbwa dɔe, nɛra aa ba waa kwaraa lii kpa.

⁶ Ba dɔŋa nyina ne dɔŋa haeh, dɛ ba meera waa bwa nyoɡrɔ, baa komɛlbwaa dɔ le wobɛlbwa aa lɔ harɛ nɔ ta kpa.

⁷ Kaa ka di kondikwaa dɛ́ nyɔ sen silɛɛ ne, kɛ taraken Korowii sie dɛ lɛ waa haa dɛ ɛ ta.

⁸ Gel he sie ɛɛ lɛ hɛɛ hɛɡre saŋ bɛlbwa.

⁹ He ne he haah haa dɛ nyinu so sodɛɛɡa dɛɛ lɛ he sie, tɔpera aa teŋa baa kaa Korowii kpɔ tɛɛ harɛ nɔ ta nɔ. Dɛkalkɛ anee chɔ le tɛɛ, he le koeh haa dɛ koh harɛ nɔ ta nyoa.

¹⁰ Do sie dɛɛ ɛ toma bokpeɡa bwa ne, dɛkalkɛ lalabwɛɛ haa dɛ ba kaala la, toma ɛɛ kɛɛ waane vɔrɔwa, kɛɛ waa mun noe, dɛ wejema toole bela.

¹¹ N berɔ na waane ɡe harɛ nɔ ta. Nɛra baa won chwae kohona laa chwaa dɛɛ tɔ sie, banyoola bwa laa wona yo laa dɛɛ pɔ nɛra nɛ. Wejema laa dɛɛ tɛ kondikwa, kɛɛ nɛn o liire bini aa chaahna laa dɛɛ dɔ kondɔɔh. Nɛn waa hweli tɔn kaa sie bwa laa dɛ́ won ɛ nomonjen. Kɛ wedɛɛɡa ne wechɔɡa dɛ ba ba bwa nɛ.

¹² Ane a bwa, nomɛlbwa aa o tɔpere jemɛ, ɡɛ ba yon kpɔ asau lawɛ pɛŋe, kɛɛ dɛ́ kpɔ bel lawɛ jumbie la, ɡɛɛ ba yon harɛ nɛra bela dɛ́ piɡri laɡ ba tɔpechɔɡe wee.

Wejema dɔe ɡwaa ɡɛna

¹³ N berɔ na waane aa ɛ wejemwaa aa lɛ n sie harɛ nɔ ta.

¹⁴ Dɛ bwɛjen bɛl waa wola kanɛ kohonaa fa lole, nɛra baa lɔ o ta ɡe aa kanɛ. Kɛ kooro bɛl waa kpeɡa kohona kpɔ o laa tena ba chɔ baro, dɛ ma kwaa baa che a ta jo bwɛjen la ta.

¹⁵ Dɛ baa bɛl soɡe a ɡɛ bwɛjen la ta dɛ nya, kɛ dɛ o dɔ wejema. O cheɡɛ o wejema ta, dɛ lɛ bwɛɛ la. Kɛ a habɔɔ la, nomɛlbwa ta o waa liire kpa.

¹⁶ Anomanta, n ŋɔ, “Wejema ɡwaa kpeɡri.” Kɛ baa la waa nyaa dɛ dɔ wejema la, nɛra ta on bui, nomɛlbwa ta o waa kwaraa liire kpa.

¹⁷ A wer kɛ ya no wobopwɛra wejereme aa dɛ bol, ɡwaa kooro waa kpɔ nyɛɡa bol waa dɛɛ baɡle ɡɛna.

¹⁸ Wejema wer ɡwaa dɔmkwaa baa dɛ yo ane, kɛ ɡɛne beŋkpoŋ ɛɛ won chɔɡ waa aa wera kohona.