Wejereme 8 - mzwDBL

¹ Umee ɛ wejereme ɔ? Umee dɛ won baɡle waa mun ɔ? Wejema dɛ kwaa nɛn siebɔr, dɛ ɡel wɛɛ dɔ silɛɛ.

Kooro duura wa

² Dɛ kooro bol wa aa, nyiŋi kɛrɛdɛ dɛ́ ɛ ɡɛ waa ŋɔa, dɛkalkɛ he ŋwɛɛrɔ baɡle Korowii a wa.

³ Bɛ too ŋɔ hɛɛ le kooro sie kaa. Bɛ on deŋnekpeɡ ɛ, dɛkalkɛ wɛɛ won ɛɛ ɡɛ bɛlbwa waa dɛ nyin.

⁴ Kooro aa dɛ di kpeɡri nomanta, dɛ o bol waa, umee dɛ́ won tɔŋlo wɔ?

⁵ Nomɛlbwa waa no o waa waa dɛ bol la, aa wahalaa na, kɛ wejereme te ɛɛ won jemɛ saŋ waa wera ne ɡɛ waa ɛ.

⁶ A lole kɛŋɔ nɛwɛnyini wenaale ɡwaa o nɛɛ te, kɛ wobɛlbwa dɔ saŋ waa wera ne ŋwɛnɛ baa ɛa.

⁷ Nomɛlbwa aa wola kere waa jemɛ nɔ, umee dɛ́ won baɡlo waa aa dɛ ba bala ɔ?

⁸ Nomɛlbwa ta kpeɡri dɔe o doma nɛ, nomɛlbwa aa jemɛ tɔpere waa dɛ ba sewa. Gɛ baa wola won lawɛ nɛn le laa ta la, ɡɛɛ wechɔɡa aa wola nɛra baa dɛ ɛ wechɔɡa bini le.

⁹ N na a ɡɛ waa nɔ bwa, asɛ n lii waa baa dɛ ɛa harɛ nɔ ta bwa. Nɛra bane dɛ di kpeɡri, asɛ bane ɡe do ba lɔɡa ba bwara ɛɛ nyɛɡ.

¹⁰ N berɔ na nyubinikpeɡ tena baa huɡ ba, kɛ nɛra le huɡribɔr bela ba naa, ba yon berɛ dɛɛ kpɛɛ ba bwɛjen la bini baa soɡa dɛ ɛ wechɔɡa la. Anɔ bwa ɡe ɛ wepuu.

¹¹ Nɛn ɛ wechɔɡa ba ta o deŋnetɛra kpɔe tɛo warane naa, nɛra dɛ dɔ liifala dɛ kpɔ dɛɛ ɛ wechɔɡa.

¹² A lole kɛŋɔ wechɔɡ-ɛɛ ɛɛ won ɛ wechɔɡa kera lafa dɛ́ ta so biɡri. Kɛ n jemɔ kɛŋɔ nɛra baa dɛ ɔmɛ Korowii dɛɛ duuru la, wobɛlbwa ɛɛ do werii tɛɛ ba.

¹³ Kɛ wechɔɡ-ɛɛra aa wola Korowii ɔmɛ nomanta, aa wer doe ba dɛ́ tɛɛ ba. Ba tɔpera aa jaŋnee do kɛŋɔ, lileo yon teŋe ba kaa la ken.

¹⁴ Waane ɡe lole aa wola mun dɔe harɛ nɔ ta ja. Nɛra ba wa aa toɡra dɛ dɔ wechɔɡ-ɛɛra deŋnetɛra, asɛ wechɔɡ-ɛɛra ɡe ɛɛ dɔ kembɔr aa chɛ nɛra ba wa aa toɡra. Anɔ ɡe ɛ wepuu ja.

¹⁵ Anomanta, n liiree kɛŋɔ a wer kɛ nɛwɛnyini di kondikwaa dɛ́ nyɔ sen lɛ o sie harɛ nɔ ta. Gɛɛ dɛ́ ɡel o dɔ silɛɛ o toma ne o tɔpera Korowii aa kpɔa tɛo o so harɛ nɔ ta bwa.

¹⁶ N siwi beɡrɔ n nyiŋi ɡɛ wejema aa doa, dɛ na nɛwɛnyini koeh waa dɛ koh harɛ nɔ ta. N nao kɛŋɔ nɛn aa wone dɛɛ chɔ dom chɔɔ ne jwaana,

¹⁷ asɛ n na waa Korowii aa ɛa bwa. Nomɛlbwa aa won jemɛ waa aa lɔ harɛ nɔ ta ka tonɛ bwa. Hale anɔ bwa habɔɔ, nɛwɛnyini ta wone jemɛ a mun. Wejereme waa ŋɔa o jemɔ kwaraa la, waa won jemɛ bwa.