Wejereme 7 - mzwDBL

Wejema wa

¹ Sɔndɛɛɡe wer ɡwaa nosɔɔhsoma, ɡɛɛ seo tɔpere ɡe do wer ɡwaa lola tɔpere.

² A wer kɛŋɔ nɛn la lwe mun, dɛ ɡwaa kɛ waa la bela baa dɛ di kondikonjena, dɛɛ lɛ ba sie, dɛkalkɛ nomɛlbwa ɛɛ sewɔɔ. A chɛ kɛ nomɛlbwa ɛɛ do waa nɔ dɛɛɡɔ.

³ Suna dii ɡwaa mama, dɛkalkɛ suna dii ɡelɔ yaa hweli waa aa wera.

⁴ Wejereme soɡo waa, o dɛ́ lii seo wa, kɛ ɡɛne te, o sie dɛ́ lɛ tɔpere bɛlbwa.

⁵ Wejereme dɛ́ kaeh naa, no o be, ɡwaa kɛ ɡɛne aa dɛ ɡo yela dɛɛ kpɛɛre.

⁶ Gɛne mama do kɛŋɔ, baa kpɔ sɔɔhne do nii ta aa parame. Anɔ ɡe ɛ wepuu.

⁷ He ɛ wejereme dɛɛ faah nɛra aa, he do kɛŋɔ ɡɛne. He sɛoh baa yawɛ sen ɡe aa, nɛnchɔɡee hɛɛ ɛ.

⁸ Komɛlbwa tona wer ɡwaa o mumpar, asɛ bambile lawa ɡe ɡwaa kɛ haa dɛ ɛ mbarafo.

⁹ Bɛ ɡel he baah ɛɛ di warawara, ɡɛnee lɛ o dɔŋ waa dɛɛ do o bini.

¹⁰ Bɛ ŋɔ, “Ɛrɛɛ saŋ la wobɛlbwa do wer ɡwaa fini nɔɔ?” A ɛ ɡɛnewaa kɛ he bɔɔ ɡɛ.

¹¹ Wejema wer kɛŋɔ haa dɔ kapɛrɛ kon bɛl dɛɛ cha nɛra baa lɔ harɛ nɔ ta.

¹² Wejema dɛ tɔ nɛn nɛ, kɛŋɔ suuɡa aa won nɛn lɛɛ la ken. Wejema dɔe kohona ɛɛ won ɡel naate la so sodɛɛɡa, dɛ́ dɔ mkpa.

¹³ Nyiŋi waa Korowii aa ɛa. Umee dɛ́ won toɡre kon waa ɡela o ɡoloo?

¹⁴ Waane kaalɔ dɛɛ tɛɛ kɛrɛdɛ naa, ɡel he sie lɛ, kɛ dɛ wenaale bɛlee tenaa, lii kɛŋɔ, Korowiirii ba silɛɛ ne, dɛ berɛ ba wenaale ɡe ne. Anomanta, nomɛlbwa aa won jemɛ ɡɛ aa chiɡu kerekere.

¹⁵ N soɡa maa soɡa aa wola mun dɔe nɔ, webele anɛ aa teŋa nɔɔ n na, nɛn o wa aa toɡra dɛ́ sewɛ o wedɛɛɡa ɛɛ wa, ásɛ nyubinikpeɡ te so dɛ́ biɡri o wechɔɡa ta.

¹⁶ Bɛ ɛ kɛŋɔ he waa toɡrɔ kohona, kɛɛ he jemɛ waa kohona, dɛ́ chɔɡ he te.

¹⁷ Dɛɛ berɛ nyubinikpeɡ ɛɛ kohona, dɛɛ berɛ ɡɛna ɡe kohona. Ɛrɛɛ chɛ kɛ he sewɛ, dɛ he saŋ ta tele mɔɔ nɔ?

¹⁸ Lawɛ a bwa bini kpoŋe, dɛ bɛ ɡel bɛlbwa le he nɔn ta. Naate waa dɛ ɔmɛ Korowii ɛɛ won le ɡɛ waa nɔ bwa nyoa.

¹⁹ Wejema ɛɛ won ɡel nɛmbeŋkpoŋ di kpeɡri, dɛ́ ɡwaa koranar fi baa lɔ bwɛjen ta.

²⁰ Nɛn o wa aa toɡra beŋkpoŋ kwaraa toole harɛ nɔ ta, dɛɛ ɛ wa aa toɡra waa wola wechɔɡa ɛ.

²¹ Bɛ deŋne cheɡ dɛɛ no waa bwa nɛra aa dɛ bol, ɡɛ laa aa, hɛɛ ba noo kɛŋɔ he bonɔɔ kwaraa taahne,

²² dɛkalkɛ he ɡbabir jemɔ kɛŋɔ ɡɛɛ he taah nɛra bane.

²³ N cheɡɛ n wejema ta dɛ nyiŋi, dɛ daah a bwa na dɛ ŋɔ, “N siwi beɡrɔ kɛ ń dɔ wejema,” kɛ dɛ a berɔ ɡwaa n liire ta.

²⁴ Gɛ bɛlbwa wejema aa doa bwa, o bini luŋri kɛrɛdɛ, o ta jaɡa dɔe, dɛ do kpeɡri kɛŋɔ yá won jemɛ a mun.

²⁵ Anomanta, n kpɔ n liire bwa do a ta, dɛ́ won jemɛ a mun, dɛ́ nyiŋi wejema ne ŋwɛnɛ aa cheɡɛ a ta waanee yon dɛɛ ɛ, dɛ́ na ɡɛnewaa aa lɔ nyubinikpeɡ ne ɡɛna ta.

²⁶ N na waane aa dɛ we dɛ ɡwaa seo, haah bɛl do kɛŋɔ bel baa dɛ harɔ. O bambile do kɛ nafuɡe, asɛ o nɔɔra do kɛŋɔ jɔɡrɔre, o kpɔ dɛɛ harɛ nɛra. Wejereme bɛlbwa o wa aa dɛ su Korowii siwi la, ɛɛ won chwa le o nafuɡere la ta, kɛ ɡɛne te, wɛɛ lawɔɔ.

²⁷ Wejereme la ŋɔ, “Hé na, waa maa naa laanee nɔ, n nyiŋi waane bini beŋkpoŋa beŋkpoŋa, dɛ jemɛ ŋwɛnɛ aa cheɡɛ a ta waane yon dɛɛ ɛ.

²⁸ N taa dɛ nyiŋi a bini n ta wobɛlbwa nae mɔɔ la, babeŋkpoŋ o wa aa toɡra ɡboo n na nɛra kaɡboŋ bini, kɛ haah o wa aa toɡra beŋkpoŋ kwaraa toole ba bini.

²⁹ Waa aa teŋa nɔɔ n hweli le a ta, Korowii fe ta nɛwɛnyina bwa ba waa toɡre, kɛ ba berɔ kpɔ ŋwɛnɛfale ta dɛ chɔɡ ba te.”