Wejereme 6 - mzwDBL

¹ N berɔ na wechɔɡa ane harɛ nɔ ta, aa do tɔɡre kohona kɛŋɔ bone, dɛ dawɛ nɛra nɛ.

² Korowiirii dɛɛ tɛ nɛn kondɔɔh ne jirima, ɡɛ aa ɛ o bɛ komɛlbwa waa dɛ nyin nya o soɡa bini. Kɛ Korowii aa ɡel ó dɔa di, nɛmpɛɛ bɛlee yon berɛ ba kpɔ. Anɔ ta mun dɔe, a ɛ wedoŋa.

³ Dɛ nomɛl soɡo biɡri dɛ dɔ bii lafa, kɛ o soɡa dɛ biɡri bwa habɔɔ, dɛ o ta wone dɔ silɛɛ o kondɔɔh waa dɔa ta, dɛ sewɛ ba huɡo kɛrɛdɛ naa, amɔ dɛ bie baa haro ta kwaraa ɡwaalo.

⁴ A ta mun dɔe kɛŋɔ bá lolɛ a ɡɛ bie la, o waa dɛ le nɛra liire bini kwaraa, ásɛ ba soh o wa.

⁵ A lole kɛŋɔ bie la ta wee nae kɛɛ dɛ jemɛ komɛlbwa te, kɛ o bwara sɔɔhno dɛ ɡwaa a ɡɛ nɛn la,

⁶ hale ɡɛ nɛn waa dɔ kondɔɔh la soɡo bene kaɡboŋa anɛ kwaraa naa, silɛɛ bɛlbwa aa a taa do. Ane a bwa, bobeŋkpoŋii bie la ne nɛn la bwa ɛɛ kaa.

⁷ Kondikwaa nɛn aa di waa wɛɛ koh, kɛ waa vaɡɛ bwa.

⁸ Gwaala besoo wejereme ɡwaa ɡɛne ɔ? Dɛ nɛn nyao waa, o jo nɛra bini naa, o jemɛ ɡɛ waa dɛ lawɛ o te.

⁹ A wer kɛ he sie lɛ anɔ la haa dɔa ta, ɡwaa anɔ la haa kpɔ sie dawɛ kɛŋɔ hɛɛ dɔɔ ta. Anɔ ɡe ɛ wepuu, dɛ do kɛ nɛn waa dɛ loo vii habɔɔ, dɛ ɡel o bini ken.

¹⁰ Wobɛlbwa aa chiɡa saŋ la dɔ sɔn, asɛ ya jemɛ ɡɛ nɛwɛnyini ɡe aa doa. Ya jemɔ kɛŋɔ nomɛlbwa ne nɛn, waa do kpeɡri ɡwaalo aa won cheme.

¹¹ Nɛn wobol warɔ kohona naa, aa mun kohona dɔ. Ɛrɛɛ aa ba wona dɔ tɔnɔ tɛ bɛlbwa nɔ?

¹² Dɛkalkɛ umee dɛ́ won jemɛ waa aa wera tɛ nɛn, ya tɔpera tama aa wola tɔnɔ dɔe dɛ teŋe baa kaa kɛ lileo nɔ ta nɔ? Umee dɛ́ won baɡle waa aa chiɡ harɛ nɔ ta o seo habɔɔ?