Wejereme 5 - mzwDBL

Kpɔ ɔmee tomɛ Korowii dɛɛ duuru

¹ He dɛ la Korowii Dea aa, nyiŋi he vala bini kɛrɛdɛ. Do sie no o waa kɛrɛdɛ, dɛ́ ɡwaa ɡɛna saraha ba yon dɛɛ ɛ, baa wola jemɛ kɛ ba dɛ ɛ wechɔɡa la.

² Dɛɛ lawɛ he nyoa, he dɔ waane dɛ́ bol aa, nyiŋi a bini kɛrɛdɛ dɛ bɛ too, dɛ́ bol baɡle Korowii. Korowii te, nyundua o do, asɛ he do harɛ, anomanta, bɛ ɡel he wobol do kan.

³ Liire waraa ɡela nɛn ɛɛ dee deera, ɡɛɛ dɛ nɛn dɛ́ bol waa kohona, dɛ o ta nyiŋe kɛrɛdɛ naa, wɛɛ bol ɡɛnewa.

⁴ Saŋ bɛlbwa he dɛ baɡɛ Korowii nyoa aa, bɛ ɡel a biɡri he ɛ ɡɛ haa ŋɔa hɛɛ ɛo la, dɛkalkɛ Korowii sie aa nɛn waa ɡɛna waa wola o nyobaɡa ta teŋɛ nɛɛ lɛ.

⁵ A wer kɛ nɛn ɡel nyoa baɡa, ɡwaa kɛ waa baɡɛ nyoa, dɛ vɛh a ta teŋa.

⁶ Bɛ ɡel he nyoa wobol kaa he ne wechɔɡa ta, ásɛ dɛ ŋɔ sɔfo be ŋɔ, sibeɡra ta laa he baɡɛ nyoa. Bɛ ɡel Korowii baah di he nɛ he nyoa wobol wa, dɛ́ chɔɡ kwaa haa koah dɛ dɔ.

⁷ Deera kohona ne wobol kohona ta mun dɔe. Anomanta, a chɛ kɛ hɛɛ ɔmɛ Korowii.

Kondɔɔh ɛ wepuu

⁸ He na nomɛl waa nyaa, baa wola o waa bolɛ dɛɛ tɛo aŋwɛnɛ ta, dɛɛ fiiɡu harɛ la ta naa, bɛ ɡel á kpo he nyoa. Nomoa bɛlbwa lɔ o dɔŋ waa ɡwaalo lɔɡa, asɛ ba bwa habɔɔ, nomonome bane ɡe ɡwaa ba.

⁹ Komɛlbwa aa le harɛ la ta la, nɛra baa lɔ o ta la bwaa dɛɛ dia, waa aa chɛ kooro laanee kɛŋɔ, wɛɛ nyiŋi harɛpare la ta, dɛkalkɛ o ɡe ɛɛ dɔ anee di kohona.

¹⁰ Nomɛlbwa o sie aa beɡre suuɡa laa an dɔ kohona, nomɛlbwa waa dɛ nyin kondɔɔh kohona la sie aa a ta lɛ. Anɔ ɡe ɛ wepuu, a do kɛŋɔ nɛn waa dɛ loo vii habɔɔ, dɛ ɡel o bini la ken.

¹¹ Nɛn dɔ kondɔɔh kohona naa, nɛra baa dɛ dia ɡe dɛ warɛ. Bɔkwa tɔnɔɔ naate la ɛɛ ba dɔe? O sie ɡbo laa dɛɛ ba a ta lɛɛ yaa?

¹² Tom-ɛɛ chɔe dɛ do o som, hale o di kondikwaa tama kɛɛ kohona noo. Kɛ kondɔɔh kwaa waa dɔa kohona nomanta, waa won dom chɔ.

¹³ N na wedoŋa ane ɡe harɛ nɔ ta, nɛra yon pa ba kondɔɔh sɔh kɛ aa ban cha,

¹⁴ kɛ a yon che waane ta bá paŋɛ ba kondɔɔh la, ásɛ dɛ ba dɔ bibaala bane kwaraa naa, baa komɛlbwaa dɔ, dɛ́ kpɔ ja ba.

¹⁵ Ba lolɛ bie ba harɛ nɔ ta naa, waa komɛlbwa ne ba, ɡɛ tentenee o sewaa wɛɛ ba kaala. Waa won kpɔ komɛlbwa waa koah dɔ harɛ nɔ ta kaa.

¹⁶ Waa aa teŋa nɔ ɡe ɛ wedoŋa kohona. Gɛ baa lolɛ nɛn o ba harɛ nɔ ta la, ɡɛɛ wɛɛ kaalo. Bɔkwa tɔnɔɔ wɛɛ ba dɔe, o koeh waa dɛ koh pɛɛpɛɛ ta nɔ?

¹⁷ O soɡa bini bwa do kɛŋɔ nɛn waa soɡe biro ta ken, o liire chɔɡ, dɛɛ na wenaale kohona o baah di.

¹⁸ Ate, n na kɛŋɔ a wer kɛ nɛn di kondikwa, dɛ́ nyɔ sen, ásɛ o sie lɛ koeh waa dɛ koh tɔpera tama, Korowii aa kpɔa tɛo harɛ nɔ ta. Waa aa chɔ le tɛo laanee la.

¹⁹ Kɛ ane a bwa, dɛ Korowii tɛ nomɛl kondɔɔh dɛ ɡel o sie ɛɛ lɛ a ta, asɛ o jemɛ kɛŋɔ anee chɔ le tɛo waa, anee Korowii kpɔ kɛo.

²⁰ Korowii aa ɡela o dɔ silɛɛ nomanta, waa o tɔpera tama waa di harɛ nɔ ta waa liira ba.