Wejereme 4 - mzwDBL

Fiiɡa ne koeh ne chamene nyae wa

¹ N berɔ nyiŋi dɛ na fiiɡa nɛra aa dɛ fiiɡi ba dɔŋa harɛ nɔ ta. N na nɛra baa dɛ fiɡ ba siniire, kɛ nɛn toole dɛ́ larawe ba bwara, dɛkalkɛ, nɛra baa dɛ fiɡ ba la nɔn taa kpeɡri ka di.

² Asɛ n bol ŋɔ, nɛra baa serewa la, ba na som dɛ ɡwaa banɔ la ba taa soɡe le.

³ Kɛ nɛra baa wola ban lolɛ, baa wola wechɔɡa bɛlbwa harɛ nɔ ta nae mɔɔ la, ba na som.

⁴ Ate, n na kɛŋɔ toma nɛra aa dɛ ɛ dɛ́ dɔ kwaa bwa, le o dɔŋ bɛl komɛl waa dɔa, o na o siwi beɡre la ta. Anɔ ɡe ɛ wepuu, a do kɛŋɔ nɛn waa dɛ loo vii habɔɔ dɛ ɡel o bini la ken.

⁵ Gɛnee yon fɔɔ o nɔɔra so ŋɔ, waa tomaa ɛ, lɔr ɛɛ kpoo ó sewɛ.

⁶ He dɔ kondikwaa nɔndel di deŋnesɔɔhna ta, ɡwaa haa koah kohona, dɛ dɔa nɔndela anɛ di. A bwa ɛ wepuu, kɛŋɔ nɛn waa dɛ loo vii habɔɔ, dɛ ɡel o bini la ken.

⁷ N berɔ na waane ɡe aa wola mun dɔe harɛ nɔ ta.

⁸ Dɛ baa bɛl ɡboo soɡa, o ta bibaa kɛɛ nime dɔe. Dɛ tɔpere bɛlbwaa wɛɛ koh, kɛ o siwi aa o kondɔɔh su. Ate, o bɔɔ ŋɔ, “Ume waa mɛɛ koh maa wola won lɛ n sie nɔɔ?” Anɔ ɡe ɛ wepuu, bosɔɔhna aa wola toole a ta.

⁹ Banɛ wer ɡwaa beŋkpoŋ, dɛkalkɛ ba nyoa ɛɛ won pɛ, ásɛ ba ɛ toma kɛrɛdɛ, dɛ́ dɔ ɡɛ baa dɛ nyin.

¹⁰ Beŋkpoŋ baa chole aa, o dɔŋ ɛɛ won chao ó ir. Kɛ nɛn waa chole o ta nɛn dɔe o lawɔ ir la na wa!

¹¹ Nɛra banɛ pɛo chɔ aa, ba dɛ wɔrɔbe dɔŋa bwara. Kɛ nɛmbeŋkpoŋ ɡbo aa won chɔ o bwara wɔrɔbe.

¹² A lole kɛŋɔ nɛmbeŋkpoŋ bɛl ɛɛ won yo, dɛ́ pɔ o dɔŋ nɛ, kɛ ba pɛ nɛra banɛ naa, baa won lɛ ba te. Ŋwɛn baa pɛra atoro chae kpeɡri.

¹³ Bonɔɔ waa nyaa dɛ jemɛ waa la, ɡwaa kooro waa hwɛɛhra, dɛ ɡɛn waa wola jae no.

¹⁴ A ɡɛ bonɔɔ la, ba ken lawɔ do dea mɔɔ o ba di kora, kɛɛ ba lolɔ nyaa bini o do o harɛ ta.

¹⁵ N nao kɛŋɔ nɛra baa soɡe harɛ nɔ ta bwa, teŋɛ bonɔɔ baa lawɔ o ba chiɡ kooro naa ta la nɛ.

¹⁶ Nɛra kooro aa dɛɛ di kora ba nɛɛ ta nyoa dɔe, kɛ dɛ o baa sewaa, nomɛlbwa sie aa o waa waa ɛa taa lɛ. Anɔ ɡe ɛ wepuu, a do kɛŋɔ nɛn aa dɛ loo vii habɔɔ, dɛ ɡel o bini la ken.