Wejereme 3 - mzwDBL

Komɛlbwa dɔ o saŋ

¹ Komɛlbwa dɔ o saŋ Korowii aa lea cheɡ, asɛ wobɛlbwa ɡe dɔ o tɔpere harɛ nɔ ta.

² Bie lola dɔ o tɔpere, seo ɡe dɔ o tɔpere, kwaa dui saŋ lole, a fuɡra ɡe dɔ a saŋ,

³ kpoe dɔ o tɔpere, chaeh ɡe tɔpere do le, danjwɛɛ taɡa dɛ́ ɡo saŋ lole, o kwaara dɛ́ ma ɡe saŋ do le.

⁴ Wii tɔpere lole, mama ɡe dɔ o tɔpere, suna dii tɔpere lole, silɛɛ ne hɛɡra ɡe dɔ a tɔpera,

⁵ dɔŋa nyina dɔ a tɔpere, dɔŋa bɛ nyina ɡe dɔ a tɔpere, dɔŋa ɡbaara dɛ́ pɛl dɔ a tɔpere, dɔŋa baah peɡra ɡe tɔpere do le.

⁶ Kwaa bɔr ɡaaɡa dɛ́ naa dɔ a tɔpere, a bɔr bɛ ɡaaɡa tɔpere ɡe do le, kwaa nyoa boara tɔpere lole, a pae dɛ́ viɡri ɡe tɔpere do le,

⁷ yal kɛɛra saŋ lole, o tae dɛ́ pɛ saŋ ɡe do le, nɛn hela dɛ́ so tɔpere lole, tɔpere waa bol waa la ɡe do le.

⁸ Dɔŋa nyina dɔ a tɔpere, dɔŋa haeh tɔpere ɡe do le, laa yoi tɔpere lole, deŋnesɔɔhna dɔe tɔpere ɡe do le.

⁹ Bɔkwaa nɛn waa dɛ ɛ toma, ɛɛ ba dɔe le o koeh waa dɛ koh ta nɔ?

¹⁰ N na wekpeɡa Korowii aa kpɔa ba dawɛ nɛwɛnyina nɛ.

¹¹ O ɡelɔ komɛlbwa do wer o saŋ ta. O ɡelɔ ya jemɛ ya liire bini waa aa lole saŋ la, ne anɔ la aa chiɡ kerekere saŋ bɛlbwa dɛɛ la, kɛ yaa won no waa bwa Korowii aa ɛa le mumpar kaa a jaɡa mun.

¹² Anomanta, n nao kɛŋɔ waa nɛwɛnyina aa won ɛ laanee kɛŋɔ, yá ɡel ya sie lɛ dɛɛ ɛ wedɛɛɡa ya soɡa bini harɛ nɔ ta.

¹³ Nomɛlbwa di kondikwaa dɛ́ nyɔ sen, ásɛ o sie lɛ kwaa waa koah dɛ dɔ la ta, a ɛ Korowii koŋkɛɛla waa kpɔa kɛ yaa.

¹⁴ N jemɔ kɛŋɔ komɛlbwa Korowii aa ɛ la, ɛɛ do lee saŋ bɛlbwa dɛɛ la. Nɛn aa won kpɔ ane ja kɛɛ dɛ́ laa ane kpɔ a ta. Korowiirii ɛa ɡɛ, ásɛ nɛwɛnyina kpɔ duure tɛo.

¹⁵ Wobɛlbwa aa chiɡa ka la, ne anɔ la aa chiɡ ɡe fa chiɡo ka. Korowiirii ɡela ɡɛ waa la bwa berɛ dɛɛ chiɡ.

¹⁶ N berɔ na waane harɛ nɔ ta ja, nyubinikpeɡ chiɡ kasinteŋ bole pae naa ta, wechɔɡa ɡe chiɡ waa aa toɡra naa ta.

¹⁷ N lii n nyu bini ŋɔ, “Korowii ɛɛ ba bol nɛra ba wa aa toɡra, ne nyubinikpeɡ tena bwa waa dɛ́ pa ba bole, dɛkalkɛ wobɛlbwa ɛɛ dɔ o saŋee, we-ɛɛla bɛlbwa ɡe dɔ o tɔpere.”

¹⁸ N berɔ lii ŋɔ, “Kɛ nɛwɛnyina te, Korowii daah ba dɛɛ na, dɛ́ ɡel bá jemɛ kɛŋɔ ba do kɛŋɔ ola ken.

¹⁹ Webeŋkpoŋii chɔ le dɛ tɛ nɛwɛnyina ne ola bwa, ɡɛ bɛl aa sewɛ la, ɡɛɛ o dɔŋ ɡe ɛɛ ba sewa. Hweera beŋkpoŋii lɔ a bwa bini. Nɛwɛnyina ta ola ɡwaalɛ. Wobɛlbwa ɛ wepuu.

²⁰ Bobeŋkpoŋii Korowii kontaala bwa ɛɛ kaa. Teeraa Korowii kpɔ taa, anomanta, teera binii a bwa berɛ ɛɛ ba kaala.

²¹ Umee dɛ́ won jemɛ kɛŋɔ nɛwɛnyina doma dɛ kaa nyundua, asɛ ola doma ɡe dɛɛ ka harɛ bini nɔ?”

²² Anomanta, n nao kɛŋɔ waa nɛwɛnyini aa ɛ laanee kɛŋɔ, ó ɡel o sie lɛ toma waa ɛa dɛ dɔ kwaa la ta, dɛkalkɛ anee ɛ kembɔr aa chɛ kɛ ó dɔ. Umee dɛ́ won jemɛ o seo habɔɔ wa ɔ?