Wejereme 2 - mzwDBL

Pɛlchɔɡa waa bɛlbwa ɛ wepuu

¹ N ɛ n liire kɛŋɔ mɛɛ teŋɛ pɛlchɔɡa waa taa, dɛ́ kpɔ daah n te na, dɛ́ na ɡɛ silɛɛ aa doa. Kɛ a bwa ɡe ɛ wepuu.

² N nao kɛŋɔ mama ɛ ɡɛnewa, pɛlchɔɡa ɡe aa wedɛɛɡa ne ba.

³ N cheɡɛ n wejema ta dɛ ŋɔ mɛɛ nyɔ senee dɛ́ di n nyu. N liiro kɛŋɔ ɡɛɛ nɛra ɛɛ ba wona di ba nyuune, tɔpera tama baa dɛ ba dii harɛ nɔ ta.

⁴ N ɛ wejena taeh. N do deene dɛ parɛ daa kooni tɛ n te.

⁵ Mɛɛ ɛ bodɛɛɡee dɛ́ du daa bwa soo siwi aa dɛ nɔnɛ.

⁶ N kwi taama nee le bela palɛ kaa jo daa la mune, ásɛ a won kpeɡ kɛrɛdɛ.

⁷ N yawɛ yoma baala ne haahna bwa, asɛ ba lolɛ ba bini bane ɡe n dem. N berɔ dɔ nae ne peera, dɛ ɡwaa nɛra baa tɔ n sie dɛ so Jerusalam bwa.

⁸ N lɛ suuɡapoŋa ne suuɡaswɛm kohona, ne kwaa a yoɡ aa kpeɡa dɛ le harɛre koranar baa lɔ n lɔɡa be. N dɔ haahna ne baala ɡe, ba ɡo yela dɛɛ lɛ n sie, asɛ n nyin haahna ɡe kohona.

⁹ N baa ɛ nɛnjen kohona, dɛ ɡwaa nɛra baa tɔ n sie Jerusalam. Anɔ bwa habɔɔ, dɛ n ta dɔ wejema kohona.

¹⁰ N ta n te laa kpɔ kwaa n sie a dɛ lɛ a ta nɛ, n vɛh wobɛlbwa n bambile aa dɛ nyin. N bambile lawɛ tomare bwa maa ɛa, anee ɛ kembɔr tɛ mɛ a bwa ta.

¹¹ Kɛ maa kari waa bwa maa ɛa, ne kwaa maa koah dɛ dɔ la, dɛ komɛlbwa ɛ wepuu, dɛ do kɛŋɔ nɛn aa dɛ loo vii habɔɔ, dɛ ɡel o bini ken, komɛlbwa ta tɔnɔ dɔe harɛ nɔ ta.

Wejema ne ɡɛna bwa ɛ wepuu

¹² Belaa n berɛ kpɔ liire, dɛ nyiŋi ɡɛ wejema aa doa, ne ɡɛ choɡla ne ɡɛnewaa ɡe aa doa. Bɔkwaa kooro waa baa chiɡ o dɔŋ naa ta, ɛɛ ba wona ɛ á ɡwaa anɔ la sitɔte la aa ɛa ta nɔ?

¹³ N nao kɛŋɔ wejema wer ɡwaa ɡɛna, ɡɛ bɔr chaahna aa do wer ɡwaa biro la.

¹⁴ Wejereme bɛlbwa dɛ na bela waa dɛ kaa, kɛ ɡɛne te, biro binii o do dɛɛ ɡaaɡe, waa jemɛ bela waa dɛ kaa. Kɛ ane a bwa, n nao kɛŋɔ, sewee chɔ le tɛ ba bwa.

¹⁵ Belaa n lii kɛŋɔ, “Waa aa pu ɡɛne la ɛɛ won ba n ɡe nɛ. Amɔ dɛ ɛrɛɛ n wejema maa dɔa la dɔ tɔnɔ tɛ mɛ nɔ?” Asɛ n ŋɔ, “Anɔ bwa ɡe ɛ wepuu, a ta mun dɔe.”

¹⁶ Baa wejerema ne ɡɛna bwa waa liira ba, baa soh ba bwa waa, tɔpera a taa dɛ ba bala ta. Gɛ ɡɛne aa sewɛ la, ɡɛɛ wejereme ɡe ɛɛ ba sewa.

Koeh ɛ wepuu

¹⁷ A ɡelɔ n ta silɛɛ bɛlbwa n soɡa bini dɔe kpa, dɛkalkɛ wenaale ɡboo a kpɔ ba ta n nɛ. A bwa ɛ wepuu, dɛ do kɛŋɔ nɛn aa dɛ loo vii habɔɔ, dɛ ɡel o bini ken.

¹⁸ N sie ta kwaa maa ɛ toma dɛ nyina harɛ nɔ ta lɛɛ, dɛkalkɛ n dɛ ba a ɡela tɛ nomɛl waa ba di n kwa.

¹⁹ Umee dɛ́ won jemɛ kɛ naate ɛ wejereme kɛɛ ɡɛne ɔ? Kɛ onee dɛ́ di kpeɡri kondɔɔh maa koah, dɛ nyina cheɡ harɛ nɔ ta bwa ta. Anɔ bwa ɡe ɛ wepuu.

²⁰ Anomanta, n bambile pa mun chɔɡ, koeh bwa maa koah harɛ nɔ ta la wa.

²¹ Nɛn ɛɛ che o wejema ne o liire waa dɔa taa ɛ toma dɛ́ nyin kwa, dɛ́ ɡel a bwa habɔɔ tɛ nomɛl waa wola a toma ɛɛ. Anɔ ɡe ɛ wepuu.

²² Bɔkwaa nɛwɛnyini ɛɛ ba dɔe, dɛ́ le o koeh bwa waa swɛɛ siwi dɛɛ koh harɛ nɔ ta nɔ?

²³ Toma waa dɛ ɛ o soɡa bini bwa ɛ weweele ne suna dii ɡbo. Hale jwaana bwa, dɛ o ta dɛ lii wa, waa wola won chɔ. A nɔ bwa ɡe ɛ wepuu.

²⁴ Waa aa wera tɛ nɛwɛnyini bwaa kɛŋɔ, o di kondikwa dɛ́ nyɔ sen lɛ o sie, ásɛ o bwara sɔɔhno o toma waa ɛa ta. Anɔ ɡe kwaraa la, Korowii bee aa le,

²⁵ dɛkalkɛ dɛ o laa aa, umee dɛ́ won dɔ kondikwa di, dɛ́ lɛ o sie ɔ?

²⁶ Korowiirii dɛɛ tɛ nɛn o wa aa dɛ lɛ o sie wejema ne liire dɛ silɛɛ, kɛ wechɔɡ-ɛɛ te, o ɡelɔ wɛɛ ɛ toma dɛɛ boa o kondɔɔh nyoa cheɡ tɛ nɛn o wa aa dɛ lɛ Korowii sie. Anɔ bwa ɡe ɛ wepuu, dɛ do kɛŋɔ nɛn aa dɛ loo vii habɔɔ, dɛ ɡel o bini la ken.