Wejereme 12 - mzwDBL

¹ He taa lɔ he bonɔɔne saŋ ta la, dɛɛ lii Korowii waa tae wa, mɔɔ tɔpechɔɡa haa wola won ɛ wobɛlbwa la ba. Ásɛ tɔpere bɛl habɔɔ mɔɔ he lii ŋɔ, “N sie aa n soɡa ta lɛ kpa,”

² mɔɔ wee ne bɔrchaahna, ne korobie dɛ weweela kaa biro ta, ásɛ baama aa dɛ nɛ bwaala la ba tɔ nyundua,

³ mɔɔ nɛra baa dɛ daah he dem ɛɛ chel, ásɛ nɛra ba fa aa kpeɡa la ɡwɛɡre, mɔɔ haahna baa dɛ namɛ kwaa la ɡel nama, dɛkalkɛ baa kanɛ. Ásɛ nɛra baa kpɔ sibie pi tokorore ta, dɛɛ nyiŋi la bɛ won dɛɛ na kpa.

⁴ Berɛ lii mɔɔ saŋ tel ba tɔɔɡe doonyoo aa lɔ fɔɡbaahna ɡbeni, ásɛ manikare aa dɛ namɛ kwaa ɡel sii, ásɛ mɔɔ jumbii sii ɡel nɛra ir dom ta, kɛɛ yela ɡoe ɡbɔɡa bwa ba a jaɡa,

⁵ ɡɛ saŋ nɛra aa dɛɛ ɔmɛ bwejaŋa dor laŋa, ne ɔmee aa lɔ fɔɡbaahna, ne ɡɛ saŋ daa bɛl waa dɛ fe fepoŋa. Ásɛ hɔɔhre jah dɛɛ kaa tama tama, pɛlchɔɡa bwa ba a jaɡa, dɛkalkɛŋɔ nɛra boa ba nyoa, dɛɛ ba ba kaa lalabwɛ.

⁶ Lii Korowii waa tae waa mɔɔ suuɡapoŋ jɔɡrɔre cha, kɛɛ loɡ baa kpɔ suuɡaswɛm ɛo, ne vii baa dɔ nee dɛɛ do o bini paɡre, kɛɛ buni kɔlɔŋ ŋwɛn aa dawɛ o ta, ba tɛr nee dɛɛ kpɔ o ta la ku.

⁷ Ya bwadabii ɛɛ berɔɔ kaa teera ta, ásɛ ya doma kaa Korowii waa kpɔa tɛ yaa la be.

⁸ Wejereme la ŋɔ, “A bwa ɛ wepuu, Wobɛlbwa ta mun dɔe.”

Waa la tona

⁹ Wejereme la aa dɔ wejema nomanta, o baɡle bane ɡe ba dɔ wejema. O hweli wobosɛɡla, dɛ na a bini kasinteŋ kɛrɛdɛ ken.

¹⁰ O takapɔ ŋɔ wɛɛ dɔ bolarawa wobolee, kɛ o waa waa chwera la a ɛ kasinteŋ dɛ do wer.

¹¹ Wejereme wobol do kɛŋɔ, daa peteɡre aa kpɔa dɛɛ teɡɛ peera ken. O wobosɛɡla ɡe do kɛŋɔ, baa lɔ dadowɛre do kon ta, a lawɔ kpoŋe. Korowiirii ɛ Peteɡre beŋkpoŋ waa lole dɛ tɛ ya bwa.

¹² N bie, nyiŋi kɛrɛdɛ dɛ bɛ wobɛlbwa kpɔ ja a ta. Tɔne chwera ta jaɡa dɔe, kwaa hwela kohona ɡelɔ nɛn ɛɛ ɡwɛɡre.

¹³ No waa la bwa name, a jaɡa bwaa kɛŋɔ, ɔmɛ Korowii dɛɛ teŋɛ o Mmarare ta, waa aa chɛ kɛ nɛwɛnyina bwa ɛ laanee.

¹⁴ Wobɛlbwa yaa dɛ ɛ la, Korowii ɛɛ bol a waa, dɛ́ pa bole, andɛɛɡa ne anchɔɡa bwa, hale anɔ la aa sɔah bwa.