Wejereme 11 - mzwDBL

Gel he tea do som hɛɛ kɛ kwa

¹ Kpɔ he paanoo ta nee sie, tɔpera ane habɔɔ la, wɛɛ berɔ ba he be.

² Bɔne he kwaa haa dɔa bini ane tɛ nɛra banuanɛ kɛɛ banuatoro, dɛkalkɛ haa jemɛ saŋ chɔɡa aa ba harɛ la ta.

³ Baama biro kohona naa, anee ɡela bwaala ɛɛ nɛ harɛ ta. Daa cholo chɔ weekaŋle nyundua, kɛɛ weekaŋle harɛbɔr aa, buɡ ta bela waa chola laanee wɛɛ chɔ.

⁴ Paa bɛlbwa waa so nyiŋi dɛ́ na ɡɛ peu aa dɛ ta la, jemɛ saŋ aa wola chɛ kɛ ó du kwa. Nomɛlbwa waa dɛ nyiŋi baama ɡe, aa won dɔ komɛlbwa komɛ.

⁵ Haa wola luɡe peu aa dɛ kpɔ o ta jemɛ, kɛɛ ɡɛ nɛn aa dɛ kpeɡ o nya tea bini nɔ, ɡɛɛ haa wola won no Korowii we-ɛɛla waa mun.

⁶ Hɛɛ du kwaa yaa, he dua chɔɔ dɛ bɛ so pɛɛpɛɛ jɔmɔra ɡe. Haa won jemɛ anɔ la aa do wer, chɔɔ kɛɛ jɔmɔra kwaa laanee yoo. A laa ɡe aa, a bwa ken ɛɛ won do wer.

Lii Korowii waa tae he bonɔɔne saŋ

⁷ Bɔr chaahnɔ nɛn na naa, dɛ silɛɛ balɔ.

⁸ Dɛ nomɛl wono so dɛ biɡri aa, a chɛ kɛ o sie lɛ o tɔpera la bwa ta. Kɛ ó lii kɛŋɔ tɔpechɔɡa ane lole, dɛ warɛ ɡwaa anɔ la waa kpɔa so. Wedɛɛɡa ane bɛlbwa toole dɛ do a habɔɔ kpa.

⁹ He ta ɛ bonɔɔ naa, ɡel he sie lɛ, dɛɛ di he bwara he bonɔɔne saŋ. Dɛɛ teŋɛ waa he bambile aa dɛ nyin, ne komɛlbwa haa na ta. Kɛ jemɛ kɛŋɔ Korowii ɛɛ ba bol a bwa waa, dɛ́ pa bole.

¹⁰ Anomanta, bɛ ɡel wobɛlbwa hae, kɛɛ he na weweele bɛlbwa, dɛkalkɛ bonɔɔne saŋ waa teŋo baa kaa, dɛ bwa ɛ wepuu.