Wejereme 10 - mzwDBL

¹ Koŋɡaahle sewɔ aa, o sɔɔh won nosɔɔhsoma sɔɔh chɔɡa, ɡɛɛ ɡɛnewa tamaa bini do tɔɡre ɡwaa wejema ne jirima.

² Wejereme bɛlbwa bambile cheɡɛ waa aa toɡra ta, kɛ ɡɛne te, wedoŋa ɡboo lɔ o bambile ta.

³ Hale o kpɔ ŋwɛnɛ ta dɛɛ kaa kwaraa naa, o ta liire bɛlbwa dɔe, a ɡel nɛra bwa na o ɡɛna waa ɡɛna.

⁴ Dɛ kooro baah di he nɛɛ aa, bɛ ŋɔ he dɛ vɛh toma waa kpɔa do he nɔn ta. Bambile lawa ɛɛ won sɔɔh he wechɔɡa haa ɛa nyoa.

⁵ N na wedoŋa ane ɡe harɛ nɔ ta, waane kooro bɛl aa koni a ta.

⁶ Gɛnaa ba yon kpɔ chɔ wejena nyoo, dɛ́ kpɔ suuɡa tena chɔ anjeɡre nyoo.

⁷ N na yoma ba so jaɡre ta, asɛ nomonjena ɛɛ valɛ naa ta kɛŋɔ yoma ken.

⁸ Nomɛlbwa waa kwi bɔɔ la, wɛɛ won le o bini, nomɛlbwa waa ku danjwɛɛ dɛ jo la, harɛkon ɛɛ won choɡo.

⁹ Nomɛlbwa waa dɛ paɡre bwea la, bweaa dɛ́ doo bol, nomɛlbwa waa dɛ peɡri daa ɡe la, anee dɛ́ doo bol.

¹⁰ Dɛ kpanfɛ nyoa taŋɔ, ba ta on sarɛ aa, bokpeɡa nee hɛɛ ba o ne toma ɛɛ, kɛ he wejema taa aa ba cheɡa he won tonɛ.

¹¹ Dɛ harɛkon choɡe tɛɛɡa te mɔɔ wɛɛ vɔwɔ kabere aa, dɛ a ta tɔnɔ bɛlbwa dɔe tɛo.

¹² Jirima lɔ wejereme nyoa, kɛ ɡɛne te, o ɡbabir nyoa wobolee dɛɛ chɔɡo.

¹³ Gɛne bol wa aa, a ɛ ɡɛne wobol, a tona bini do kɛ choɡla te wobol.

¹⁴ Gɛne wobol warɔ, aa tonɛ bwa. Nomɛlbwa aa jemɛ waa aa dɛ ba bala kerekere. Umee dɛ́ won baɡle waa aa chiɡ ya seo habɔɔ?

¹⁵ Gɛne dɛ koh o toma ta, waa jemɛ ɡɛ waa ɛ dɛ́ kaa bobɛlbwa.

¹⁶ Harɛ o nɛra kooro aa ɛ bonɔmbi, ba nomonome ɛɛ di kondikonjena, dɛɛ lɛ ba sie jwaana la, ba bwɛɛlɛ!

¹⁷ Kɛ harɛ o nɛra kooro aa ɛ koobie, ba nomonome ɛɛ di kwaa saŋ waa wera ta, dɛ dɔ bokpeɡa ɡwaa kɛ baa nyɔ sen dɛɛ la, ba na som.

¹⁸ Dɛ nomɛl ɛ bɔhwaah dɛ vɛh o dea kwaara aa, wɛɛ luloo, ásɛ o nyundua la ku le o bini.

¹⁹ Kondikonjena dii dɛ ba silɛɛ ne, asɛ sen nyɔe ɡee ba hɛɡra ne, kɛ he ta suuɡa dɔe yaa, haa won ɛ a bini bɛlbwa.

²⁰ Bɛ he liire ɛ kɛŋɔ, hɛɛ bol kooro bwara wechɔɡe bɛlee, kɛɛ dɛ́ taah suuɡate he dea haa chɔ o bini, dɛkalkɛ jumbie bɛl ken ɛɛ kpɔ waa haa bola laanee ka taa baɡ ba.