Wejereme 1 - mzwDBL

Komɛlbwa ɛ wepuu

¹ Waa Wejereme bɛl, waa ɛ Kooro Devid bie dɛ di kora Jerusalam, aa bola laanee nɔ.

² “Komɛlbwa ɛ wepuu. Wobɛlbwa ta mun dɔe.” Wejereme laanee dɛɛ bol! “Wobɛlbwa sese ta mun dɔe.”

³ Bɔkwa tɔnɔɔ nɛn ɛɛ ba dɔe dɛ́ le koeh bwa waa dɛ koh harɛ nɔ ta nɔ?

⁴ Nɛra dɛ sewɛ, baa lolɛ banfala, kɛ harɛ nɔ ta do ɡɛ waa doa.

⁵ Wee dɛ le dɛɛ chole, dɛ́ berɛ ɛ warane ba kaa bela waa dɛ le.

⁶ Peu dɛ ta baa kaa weekaŋle nyunduabɔr, dɛ́ berɛ ta baa kaa weekaŋle harɛbɔr, o dɛ ta bar ɡɛ naa dɛ ba cheme, dɛ́ berɛ ba kaa o buɡ ta.

⁷ Neerare bwa palɔ kaa jo mpo ta, kɛ waa su bwa. A bwa berɔ dɛɛ kaa bela aa lea, dɛ́ palɛ ba kaa ja.

⁸ Wobɛlbwa ɛ koeh tenten, nɛn aa wola won bola ka tonɛ. Siwi aa won ɡel nyiŋa, deŋne ɡe aa a noe ɡel.

⁹ Waane a fa aa chiɡa ka la ɛɛ berɔ chiɡ ja, waa Korowii aa ɛa ɡe, ɛɛ berɔ ɛ, wobɛlbwa ta wefala ɛɛ harɛ nɔ ta.

¹⁰ Waane lole ásɛ nomɛl na dɛ́ ŋɔ, “Anɔ te ɛ wefala aa?” Akai, a bwa fa lole, a lole saŋ la bwa mɔɔ ba lolɛ yaa.

¹¹ Nomɛlbwa aa saŋ la baala waa lii kpa, hale banɔ la ba taa dɛ ba ba lola, nɛra baa lol ba, ba ɡe habɔɔ la, aa ba waa lii.

Wejema ɛ wepuu

¹² Men maa ɛ wejereme la, dɛ n fa ɛ Israel kooro dɛ so Jerusalam.

¹³ N siwi beɡrɔ kɛ ń jemɛ, dɛ le n te cheɡ dɛ hweli waa bwa nɛra aa dɛ ɛa harɛ nɔ ta. Na wekpeɡa Korowii aa kpɔa ba dawɛ ya nɛ!

¹⁴ N na komɛlbwa nɛra aa dɛ ɛa harɛ nɔ ta, a bwa ɛ wepuu, dɛ do kɛŋɔ nɛn aa dɛ loo vii habɔɔ, dɛ ɡel o bini ken.

¹⁵ Kon waa ɡola la, baa won toɡro. Kwaa toole naa, nɛn aa an na dɛ́ kura.

¹⁶ N lii n nyu bini ŋɔ, “N kpeɡo dɛ dɔ wejema ɡwaa kooro bɛlbwa waa tɔ n sie dɛ ba di kora Jerusalam. N hweli ɡɛ wejema ne liire dɔe aa doa, dɛ jema kɛrɛdɛ.”

¹⁷ N siwi beɡrɔ n berɛ dɛɛ nyin ń jemɛ ɡɛ wejema ne ɡɛnewaa aa doa, dɛ na kɛ a bwa ɛ wepuu, dɛ do kɛŋɔ nɛn aa dɛ loo vii habɔɔ, dɛ ɡel o bini ken.

¹⁸ Dɛkalkɛ, wejema kohona dɔe, ne suna dii kohonaa dɛɛ valɛ, waa mun noe kohona ɡe ne bambichɔɡaa.