Taetos 2 - mzwDBL

Korowii waa aa ɛ kasinteŋ

¹ He te, a chɛ kɛ hɛɛ baɡle Korowii waa aa ɛ kasinteŋ aŋwɛnɛ ta kɛrɛdɛ.

² Ŋɔ banjeni be báa lawɛ ba te, dɛɛ ɛ waa aa dɔ duure, dɛ́ dɔ nfɛrɛ, dɛɛ teŋɛ Korowii waa aa ɛ kasinteŋ kɛrɛdɛ la ta, dɛɛ nyin nɛn kɛrɛdɛ, dɛ́ dɔ bambile ɡe.

³ Ŋɔ hanjeni ɡe be báa ɔmɛ Korowii dɛ́ ɡel ba we-ɛɛla do kaih, dɛ bɛ nɛra dɛɛ ŋwalɛ, dɛ bɛ ɡel sen lɛ ba liire. Báa baɡle waa aa wera.

⁴ Dɛ ba dɛ ɛ ɡɛ naa, anee dɛ́ baɡle han-yala báa nyin ba jaranar ne ba bii,

⁵ dɛ́ dɔ nfɛrɛ kɛrɛdɛ, wedoŋa bɛlbwa aa wola toole ba nɛ, dɛ́ won ba dem tomare ɛɛ, dɛɛ ɛ nɛra wedɛɛɡa, dɛɛ no ba jaranar wa, ásɛ nomɛlbwa bɛ Korowii waa la wechɔɡe dɔ bol.

⁶ Ŋɔ bonɔɔna ɡe be ŋɔ bá dɔ nfɛrɛ wobɛlbwa ta.

⁷ Henee chɛ kɛ he ɡel he we-ɛɛla do wer wobɛlbwa ta, ásɛ ba nyiŋi dɛɛ hweli. Dɛɛ baɡle waa kasinteŋ ne, dɛɛ swɛɛ siwi a ta.

⁸ Gel a toɡre kɛrɛdɛ, nɛra bɛ a wobɛlbwa dɔ dɛ́ bol, ásɛ nɛra baa dɛ tɔŋle heyaa bɛ ya wechɔɡe bɛlbwa dɔ dɛ́ bol, ásɛ sihiih kpo ba.

⁹ Gel nɛra baa lɔ bane nɔn ta kɛŋɔ bonɔɔna kɛɛ toli la no kɛŋɔ báa no ba dɔɔranar wa. Bá ɡel ba wa ɛɛ lɛ ba sie wobɛlbwa ta, dɛ bɛ waa beɡre dɛɛ do ba nyoa,

¹⁰ dɛ bɛ ba kwaa dɛɛ ŋwɛ. Kɛ bá ɡel ba we-ɛɛla dɔ yarada kɛrɛdɛ ba dɔɔranar be. Gɛɛ dɛɛ ba ɡela ya Lɛɛ Korowii waa nɔ yaa dɛ baɡle nɔ che ba nɛɛ dɛ́ dɔ sɔn wobɛlbwa ta.

¹¹ Korowii pili suna waa dɛ sune nɛra nɛɛ taraken asɛ nɛra bwa jemɛ, o lɛɛ ba.

¹² Anomanta, ɡɛ dɛ baɡle kɛŋɔ a wer kɛ ya laa sie kpɔ wechɔɡa bɛlbwa ne harɛ nɔ ta pɛlchɔɡa la bwa ta, dɛ́ dɔ nfɛrɛ, dɛɛ ɛ waa aa toɡra, dɛɛ ɔmɛ Korowii ya bere nɔ ta,

¹³ dɛɛ kpa ɡɛ saŋ Yeesu Kristo aa ba o jirima ne ya nao la. Onee Korowijen ne ya Lɛɛ la. O bala taa ya dɔ hwɛɡa ne silɛɛ kɛrɛdɛ.

¹⁴ O koh ya waa dɛ sewɛ dɛ won lɛ yaa le wechɔɡa bɛlbwa ta, dɛ laa ya doŋa bwa kpɔ ya nɛ, dɛ kpɔ yaa ɛ o ɡbo nɛra yaa swɛɛ siwi wedɛɛɡa ɛɛ ta.

¹⁵ Baɡ ba ɡɛ waa nɔ bwa, dɛ́ kpɔ he kpeɡri do ba ɡbemba, dɛ́ ja ba, dɛ́ bɛ ɡel ba bɛlbwa nyiŋi he nyubaah.