Sekaria 9 - mzwDBL

Israel tena dɔma deŋnetɛra

¹ Waa aa le Korowii bee nɔ. O dɛ ba ba chɔɡ Hadrak harɛ ne bwɛjen Damaskɔs. Nɛra ne Israel deene bwa sie lɔ Korowii nɛ,

² ne Hamat o ne Damaskɔs aa do jwɛh, ne bwɛjena Taaya ne Sidon tena baa dɔ wejema la jao.

³ Taaya tena do dekpeɡa tɛ ba te, dɛ boa suuɡapoŋa nyoa kɛŋɔ teera, ne suuɡaswɛm kɛŋɔ doŋa aa chɔ fɔɡbaahna.

⁴ Kɛ Korowii ɛɛ laa Taaya kondɔɔh bwaa kpɔ, dɛ́ paa ka ta mpo ta, ásɛ nii fuh o bwa dɛɛboo ken.

⁵ Bwɛjen Askɛlɔn tena ɛɛ nao dɛ́ ɔmɛ, bwɛjen Gasa tena ɡe na ba bambile wee ba, ásɛ Ekron tena ɡe hwɛɡa bwa tonɛ. Gasa tena kooro ɛɛ le ba nɔn taa, ásɛ Askɛlɔn chɔ pɛɛ.

⁶ Hɔɔhraa dɛ́ ba kpɔ Asdɔd so, ásɛ n sɔɔh Filisti tena mbarafo nyoa.

⁷ Baa ol chal aa lɔ o ta, kɛɛ kondikwaa maa kia di. Banɔ la baa ka la, ɛ berɔ ɛ men Korowii nɛra, dɛ́ ɡe dɔ ba dea Juda harɛ ta, ásɛ Ekron tena ɡe berɛ ɛ n nɛra kɛ Jebus tena ken.

⁸ Kɛ mɛɛ daah n harɛɛ le laa tena nɔn ta, ba bɛ won ba bela. Nɛra baa dɛ fiiɡi nɛra aa won ba yo n nɛra kpa, dɛkalkɛ n ta dɛ daah ba.

Saayɔn kooro bala

⁹ Saayɔn tena, hé hɛɡre kohona, Jerusalam tena, hé moo ɡa. Hé nyiŋi na! He kooro dɛ ba he be, o waa toɡrɔ dɛ won nɛra lɛɛ, o pwɛre, o soɡe keeɡo bie ta, keeɡo bale taa o so.

¹⁰ Korowii ŋɔ, “Mɛɛ le laa torɔɡore nee Israel harɛ ta, dɛ́ le laa jaɡre ne Jerusalam, ásɛ dɛ kuuɡi laa tori bwa. He kooro ɛɛ bol deŋnesɔɔhna waa harɛre nɛra bee. Wɛɛ di koraa le mpo bɛl taa ba kaa bɛl ta, dɛ́ le Yufretis Moo ta kaa harɛ jaɡa.”

¹¹ Korowii ŋɔ, “Kɛ he te, kwaa haa kpoora dɛ ɛ saraha tɛ mɛ la, a chal nee n ne he fɔwɛ fɔo, anomanta, mɛɛ lawɛ he nɛraa le bɔɔ baa kaa do ba o bini nee aa wola toole bela la ta.

¹² Hé berɛ ba kaa, he nɛra baa lawɛ heyaa kaa bojaŋ harɛ ta, taraken he dɔ hwɛɡa, hé berɛ ba kaa he harɛ bosɔɔhna aa lɔ o ta. Taraken n dɛ ŋɔ he be, mɛɛ tɛ heyaa anɔ la haa paŋa la bele anɛɛ.

¹³ Mɛɛ ɡure Juda harɛɛ kɛŋɔ to ken, dɛ́ kpɔ Efrem ɛ hɛma. Dɛ́ kpɔ Saayɔn baala ɛ keri, dɛ́ ka yo Grik tena harɛ baala.”

Korowii ɛɛ bao

¹⁴ Korowii ɛɛ le nyunduaa dɛ́ ba o nɛra be, ásɛ o hɛm nyɛɡle kɛŋɔ bwaala nyɛɡla ken. Nemenɛ Korowii ɛɛ hoh laa bɛlaa, dɛ́ valɛ peujen bini kpeɡri ne le weekaŋle harɛbɔr ba.

¹⁵ Koranar Bwa Kooro ɛɛ tɔ o nɛra ɡbemɡbee. Baa chɔɡ ba dɔma vamtor bwea nee, dɛɛ moo laa ta kɛŋɔ sennyɔdɛɛra ken. Baa kpoo ba dɔmaa, ásɛ ba chal ɛɛ palɛ kɛŋɔ baa kpoo kwaa ɛ saraha, dɛ kpɔ a chale dɛɛ merɛ saraha kwaa loŋkoni ta la ken.

¹⁶ Tɔpere la telaa, Korowii baa dɛ tomɔ la ɛɛ lɛɛ baa, kɛŋɔ peteɡre aa lɛ peera le wahala ta. Baa dɛɛ nyɛɡle o harɛ taa, kɛŋɔ suuɡaswɛm kwaa aa pɛɡle kooɡbɛrɛ ta la.

¹⁷ Na ɡɛ harɛ la aa dɛ ba wer doe dɛ́ dɔ pɛla! Kondikwaa ne sen aa lɔ harɛ la ta la ɛɛ ɡeloo bonɔɔna ne toli kpeɡ, dɛ́ dɔ bokpeɡa.