Sekaria 8 - mzwDBL

Korowii baɡɛ Jerusalam tena nyoa

¹ Koranar Bwa Kooro bol waa men Sekaria be ja ŋɔ,

² “N dɛ nyin Jerusalam waa taeh, n sie beɡrɔ kohona mɛɛ mee o wa.

³ Mɛɛ berɔɔ ba Jerusalam, bela n Saayɔn Bwejen aa lole dɛ́ ba so. Baa yerɛ Jerusalamee Kasinteŋ Bwɛjen, ásɛ dɛɛ yerɛ men Koranar Bwa Kooro Bwejen la Bwejen Waa Do Goroŋ.”

⁴ Koranar Bwa Kooro ŋɔ, “Banjeni ne hanjeni ta ɛɛ kpoŋe daŋɡbalee, dɛ́ so Jerusalam fɔɡbaahna.

⁵ Bibaala ne bihaahna ɛɛ su bwɛjen la fɔɡbaahnaa, dɛɛ hɛlɛ.

⁶ Nɛra baa ba ka ɡɛ saŋ la ɛɛ ŋɔɔ aa won maɡre, n te be te, aa kpeɡe.

⁷ Mɛɛ lɛ n nɛra baa laɡ ba kaa wee leebɔr ne wee cholibɔr harɛre ta laanee.

⁸ Mɛɛ berɔ ba bane ba so Jerusalam, ásɛ ba ɛ n nɛra, n ɡe ɛ Korowii baa dɛ tom mɛ, ásɛ n nyiŋi ba nɛɛ kasinteŋ ne waa aa toɡra ne.

⁹ He banɔ haa lole taraken nɔ, waa haa dɛ no nɔ ɛ waa n keamere fa aa bola ɡɛ saŋ baa pa n Dea la mun la, he do ɡbemba, ásɛ dɛ ma n Dea la.

¹⁰ Mɔɔ ba ɛ men Korowii Dea la toma la, dɛ nɛn ɛ toma kɛɛ ba kpɔ kondɛɛre ɛ toma aa, kembɔr toole. Dɛ dɔma nomanta, deŋnesɔɔhna toole, menee ba yoi ne nɛn ne o dɔŋ baah ta.

¹¹ Kɛ taraken te, ɡɛ nɛra nɔ ba bini bane aa kaa nɔ, maa ban ɛ ɡɛ n fa aa ɛ banɔ la kpa.

¹² Koo kondikwa ɛɛ do werii kɛrɛdɛ, ɡrepo daa ɛɛ nɔnɔɔ kohona, komɛlbwa do wer harɛ la ta, ásɛ bwaala nɛ kohona. Gɛ kwaa nɔ bwaa mɛɛ ba kpɔe tɛ he nɛra haa kaa la kɛ kapɛrɛ kwa.

¹³ Gɛ baa taah he Juda ne Israel tena harɛre ta la, ɡɛɛ mɛɛ ba heyaa lɛɛ, ásɛ nɛra che he nɛɛ dɛ́ dɔ wedɛɛɡa. He bɛ ɔmɛ, hé dɔ ɡbemba.”

¹⁴ Koranar Bwa Kooro ŋɔ, “Gɛ he naawa fa aa ɡela n baah di n lii kɛŋɔ mɛɛ ɛɛ baa wechɔɡaa maa wola ba nɛɛ sune la,

¹⁵ ɡɛɛ taraken n lii kɛŋɔ ń swee Jerusalam ne Juda tena bwa andɛɛɡa. He bɛ ɔmɛ.

¹⁶ Waa aa chɛ kɛ he ɛ laanee nɔ, hé bol kasinteŋ dɛɛ tɛ dɔŋa, dɛ nomɛl ne o dɔŋ dɔ waa kɔɔto aa, hé bol a kasinteŋ a ba deŋnesɔɔhna ne,

¹⁷ he bɛ wechɔɡa lii dɛɛ tɛ dɔŋa, he bɛ ɡel he sie ɛɛ lɛ ŋwɛɛra aa wola kasinteŋ ɛɛ ta. N hah a ɡɛ waa nɔ bwa. Men Nemenɛ Korowiirii bola.”

¹⁸ Koranar Bwa Kooro bol waa men Sekaria be ja ŋɔ,

¹⁹ “Nyoa haa dɛ vɔwɛ korobinaarɛ, ne korobinue, ne korobinuanɛ dɛ korobifi ta la, hé kpɔ ɛ tɔpejena dii silɛɛ aa lɔ a ta, dɛ́ tɛ Juda tena. Anomanta, hɛɛ nyin kasinteŋ ne deŋnesɔɔhna.”

²⁰ Koranar Bwa Kooro berɔ bol ja ŋɔ, “Nɛra ɡalɡa ne nɛra baa soɡe bwɛjena ta ɛɛ bao tɔpebɛl,

²¹ ásɛ bwɛjen bɛl nɛra la bwɛjen bɛl tena be ka ŋɔ, ‘Hé ɡel ya kaa warane ka tomɛ Koranar Bwa Kooro, dɛ́ soŋo ó swee yaa andɛɛɡa. Hé ɡel ya pɛ kaa.’

²² Nɛra ɡalɡa ne harɛre a nɛra baa dɔ kpeɡri ɛɛ ba Jerusalamee, dɛ́ ba tomɛ Koranar Bwa Kooro, dɛ́ soŋo ó swee ba andɛɛɡa.

²³ A ɡɛ saŋ la, baala fi ɛɛ le harɛre wobol bɛlbwa binii, dɛ́ ba lawɛ Juu te beŋkpoŋ batakaare nyoa dɛ́ ŋɔ, ‘Gel ya ne he kaa, ya noɔ kɛ Korowii ja he nɛ.’ ”