Sekaria 6 - mzwDBL

Laa torɔɡore anaarɛ ane wepila

¹ N berɔ na wepila ane ɡe aa ɛ kwaa aa do kɛŋɔ torɔɡore anaarɛ a le ayaawa bwejena anɛ ane baah ta dɛɛ ba.

² Ba kpɔ sitɔ torɔɡo la vɔwɛ jaaɡɔswɛɛma aa tɛɡro, dɛ kpɔ nɛɛte vɔwɛ jaaɡɔbiŋere aa tɛɡro,

³ dɛ kpɔ toorote vɔwɛ jaaɡɔpoŋa aa tɛɡro, dɛ kpɔ naarɛte ɡe vɔwɛ jaɡre a bwara aa lɛɡra aa tɛɡro.

⁴ N bɔɔ Korowii nyundua torome n ne waa dɛ bol waa la ŋɔ, “Nomoa, kwaa jaɡre nɔ aa dɛ tɛɡra nɔ munii ɛrɔɔ?”

⁵ O chaŋ mɛ ŋɔ, “A ɛ peu bele anaarɛ aa le nyundua Korowii waa ɛ harɛ nɔ bwa Dɔɔ be.

⁶ Kon baa vɔwa pɛl jaaɡɔbiŋere la sie chaɡɛ weekaŋle nyunduabɔr, Babelɔn harɛɛ a tɛɡre dɛɛ kaa. Onɔ la baa vɔwa pɛl jaaɡɔpoŋa la sie chaɡɛ wee cholibɔr, asɛ onɔ la baa vɔwa pɛl jaɡre a bwara aa lɛɡra la ɡe sie chaɡɛ weekaŋle harɛbɔr a bwa tɛɡre dɛɛ kaa.”

⁷ Jaɡre a bwara aa lɛɡra la leo, dɛ a bwara kpeɡri, a siwi beɡre kɛ a fee den kaa harɛ nɔ bwa ta. Anee Korowii nyundua torome la ŋɔ, “Hé le ka ɡaaɡe harɛ nɔ bwa, dɛ́ na waa aa dɛ chiɡ.” Asɛ a le dɛ kaa ɡaaɡe harɛ nɔ bwa ta.

⁸ Ate, Korowii nyundua torome la yer mɛ dɛ ŋɔ, “Jaɡre aa kpɔ sie chaɡɛ weekaŋle nyunduabɔr Babelɔn harɛ dɛ kaa la, kaa sɔɔh Korowii bandia nyoa.”

Josua kooɡbɛrɛ wa

⁹ Korowii bol waa n be ŋɔ,

¹⁰ “Ka lɛ suuɡapoŋa ne suuɡaswɛm le Hɛldae, ne Tobija dɛ Jedaya baa laɡ ba laa ta kaa bojaŋ harɛfale ta Babelɔn ba berɛ ba la be. Berɛ la Sefania bibaa Josia dem awola tenten.

¹¹ Kpɔ suuɡapoŋa ne suuɡaswɛm la kwaa kooɡbɛrɛ, dɛ́ kpɔ pi Jehosadak bibaa Sɔfonomoa Josua.

¹² Bol o be ŋɔ men Koranar Bwa Kooro ŋɔ, ‘N bonɔɔ waa do kɛ Daa Kpale la ɛɛ ta kpalee le bela waa lole, dɛ́ berɛ ba kwaa ma men Korowii Dea la.

¹³ Onee dɛ́ do n Dea la, ásɛ dɛ dɔ jirima dɛ́ so kookara ta di kora. Sɔfo bɛl ɡe ɛɛ che o kookara la jwɛɛh o ne wɛɛ ɛ toma. Ba bwa dɔ nyopɛo deŋnesɔɔhna do ba nɛra banɛ bwa baah ta.’

¹⁴ A chɛ kɛ he kpɔ kooɡbɛrɛ nɔ cheɡ n Dea bela, bá kpɔ dɛɛ lii Hɛldae, ne Tobija, ne Jedaya dɛ Sefania bibaa Josia.

¹⁵ Nɛra ɛɛ le bojaŋaa ba, dɛ́ ba cha bá kwaa ma Korowii Dea la. Ásɛ he jemɛ kɛ Koranar Bwa Kooroo tom mɛ he be. Dɛ hɛɛ teŋɛ waa Korowii haa dɛ tomɔ aa do heyaa a ta kɛrɛdɛ tenaa, ɡɛ waa nɔ ɛɛ ɛo.”