Sekaria 5 - mzwDBL

Tɔn waa dɛ kile nyundua wepila

¹ Men Sekaria berɔ na tɔn waa dɛ kile nyundua wepila ta!

² Ate, Korowii nyundua torome la bɔɔ mɛ ŋɔ, “Bɔkwaa he na nɔ?” N chaŋe ŋɔ, “N na tɔn waa lɔ nyundua. O jaŋne lɔ naɡale fifraatoro, asɛ o paɡri ɡe naɡale fi dɛ anue.”

³ Anee o ŋɔ n be ŋɔ, “Ba chwerɛ nyotaahna waa do o ta aa kaa harɛ nɔ bwa ta. O baŋ bɛl dɛ baɡle kɛ nomɛlbwa waa ŋwɛ la, baa leo harɛ la taa, baŋ bɛl ɡe waa ɛɛ baɡle ŋɔ, nomɛlbwa waa teŋe nyosone dɛ ŋwɛɛ la, baa le o ɡee le harɛ la ta.”

⁴ Koranar Bwa Kooro ŋɔ, “Mɛɛ tomɛ tɔn nyotaahna aa lɔ o ta laanee o kaa dem bɛlbwa baa dɛ ŋwɛ ta, ne dem bɛlbwa baa teŋe nyosone dɛɛ ŋwɛɛ n sɔn ta. Wɛɛ ka do dem la taa dɛ́ taɡɔ ɡo, dɛ́ kuuɡi o daa bwa kwaraa.”

Haah bɛl waa lɔ wɛɡrɛ bini wepila

⁵ Ate, Korowii nyundua torome n ne waa dɛ bol waa la, balɔ dɛ ba ŋɔ n be ŋɔ, “Ha sie nyiŋi nyundua, dɛ́ na kon waa dɛ ba nɔ.”

⁶ Asɛ n bɔɔ ŋɔ, “Bɔkwa konee yɔ?” O chaŋe ŋɔ, “O ɛ wɛɡrɛ baa kpɔa dɛɛ maɡɛ kwa,” o berɛ ŋɔ, “o cheɡɔ tɛ harɛ nɔ ta bwa nɛra wechɔɡa.”

⁷ Dɛ wɛɡrɛ la dɔ tɔ, kpana nee ba ɛo. N nao kɛŋɔ waa pila, asɛ haah bɛl so o bini.

⁸ Korowii nyundua torome la ŋɔ, “Haah nɔ cheɡɔ tɛ nyubinikpeɡ.” Asɛ o berɛ taɡɔ do wɛɡrɛ la bini dɛ kwaa o tɔ la tɔ.

⁹ Ate, n berɛ ha sie nyiŋi, dɛ na haahna banɛ baa dɔ kena kɛŋɔ nyeŋɡboŋ dɛ ir dɛɛ ba n be, dɛ ba kpɔ wɛɡrɛ la ir kaa nyundua.

¹⁰ Ate, n bɔɔ Korowii nyundua torome la ŋɔ, “Leperaa haahna la kpɔ wɛɡrɛ la dɛɛ kaa lɔ?”

¹¹ O chaŋe ŋɔ, “Ba dɛ kaa o ne Babelɔn harɛ ta, dɛ́ ka ma dea dɛ́ kpɔ cheɡ o bini. Ba ma dea la tonaa, baa kpɔɔ cheɡ o bini dɛɛ tomɔ.”