Sekaria 3 - mzwDBL

Sɔfonomoa bɛl wepila wa

¹ Wepila ane ɡe ta, Korowii baɡle men Sekaria Sɔfonomoa Josua o che Korowii nyundua torome bɛl sie. Asɛ Bɔnsam ɡe ba che Josua diɡ ta dɛɛ ba waa kpɔe dawɛ o nɛ.

² Korowii nyundua torome la ŋɔ Bɔnsam be ŋɔ, “Bɔnsam, Korowiirii dɛ́ pae bolchɔɡe! Korowii waa le Jerusalam tɛ o te la, onee dɛ́ pae bolchɔɡe! Baa nɔ do kɛŋɔ nindaa baa keero le nii ta.”

³ Dɛ Josua cheɡɛ Korowii nyundua torome la sie dɛ do laaladoŋa.

⁴ Belaa Korowii nyundua torome la ŋɔ o bala baa cheɡɛ o sie la be ŋɔ, “Hé laa baa nɔ laaladoŋa la foo.” Dɛ ŋɔ Josua be ŋɔ, “Na, n laa he wechɔɡa kpɔ he nɛ, mɛɛ kpɔ laaladɛɛɡaa doe.”

⁵ Belaa o ŋɔ bá kpɔ yal baa kpɔa dɛɛ vɔwɛ nyu la ondɛɛɡe vɔwɔ, asɛ ba kpɔ vɔwɔ, dɛ doo laaladɛɛɡa, dɛ Korowii nyundua torome la cheɡɛ bela.

⁶ Ate, Korowii nyundua torome la bol Josua be ŋɔ

⁷ Koranar Bwa Kooro ŋɔ, “Hɛɛ dɛɛ teŋɛ n waa taa, dɛɛ ɛ waa maa dɛ nyin tenaa, mɛɛ kpɔ n Dea wobɛlbwaa do he nɔn ta, ásɛ hɛɛ nyiŋi o dembaahna bwa ta. Mɛɛ no he wesoŋaa, ɡɛ maa dɛ no nyundua toroma baa cheɡɛ he sie nɔ wesoŋa.

⁸ Sɔfonomoa Josua, he ne he bala sɔfore baa ja he nɛɛ la, hé no. He cheɡɔɔ tɛ wedɛɛɡa aa dɛ ba bala kerekere. N dɛ ba n bonɔɔ baa dɛ yerɔ Daa Kpale ne.

⁹ Hé na bwe maa kpɔa bil Josua sie. Baŋne anuanɛ lɔ bwe beŋkpoŋ la ta. Mɛɛ di ɡwinee dawɛ o taa, dɛ́ laa wechɔɡa aa lɔ harɛ nɔ ta kpɔ tɔpebeŋkpoŋ ɡbo. Men Koranar Bwa Kooroo bola.

¹⁰ Awola tɔpere la, he bini bɛlbwa ɛɛ yerɛ o dɔŋee he so deŋnesɔɔhna ta, ásɛ he ɡrepo ne he fiɡ daa kooni bar heya.”