Sekaria 2 - mzwDBL

Baa bɛl waa kpoŋe ŋwɛn baa kpɔa dɛɛ maɡɛ bɔr

¹ Wepila ane ɡe ta, men Sekaria na bonɔmbii bɛl waa kpoŋe ŋwɛn baa kpɔa dɛɛ maɡɛ bɔr.

² N bɔɔro ŋɔ, “Leperaa hɛɛ kaalɔ?” O chaŋe ŋɔ, “N dɛ la ka maɡɛ Jerusalam dɛ́ na ɡɛ o paɡri ne o jaŋne aa doa.”

³ Belaa Korowii nyundua torome la n ne waa bol waa la le dɛɛ kaa, asɛ o dɔŋ ba chemo,

⁴ dɛ ŋɔ o be ŋɔ, “Chwa la ka ŋɔ bonɔmbii la be ŋɔ bɔr toole bá ma danjwɛɛ bar Jerusalam kpa, dɛkalkɛ nɛra ne kondɛɛra warɛ o ta.

⁵ Korowii ŋɔ wɛɛ ɛo kɛŋɔ nii, dɛ́ bar bwɛjen la kɛŋɔ danjwɛɛ ken, dɛɛ daah bwɛjen la, ásɛ dɛ so o baah ta o jirima ne.”

⁶ Korowii berɔ ŋɔ o nɛra be ŋɔ, “Hé ba warane. Hé chwa le weekaŋle nyunduabɔr harɛ la ta ba, dɛkalkɛ menee lɔ heyaa peɡre harɛ nɔ ta bobɛlbwa. Men Korowiirii bola.

⁷ Saayɔn tena, hé chwa le ba Jerusalam, he banɔ la baa lawɛ heyaa laa ta kaa bojaŋ Babelɔn harɛ ta la.

⁸ He waa hiah mɛ kɛŋɔ n siwinyiŋi ken, anomanta, dɛ nomɛlbwa leɡe heyaa kɛɛ dɛ ɛ heyaa waane aa, dɛ menee o ɛ la.

⁹ Men Korowii ɡbabirii dɛ́ yoo ba, ásɛ n nɛra ba fa aa ɛɛ ba yoma la pa ba laala kɛ laa ta kwaa kaa.” Anɔ bwa chiɡaa, hɛɛ jemɔ kɛŋɔ Koranar Bwa Kooroo tomɛ men Sekaria.

¹⁰ Korowii ŋɔ, “Jerusalam tena, hé ɡel he sie lɛ hɛɛ ɡo yela! N dɛ ba dɛ́ ba so he baah ta.”

¹¹ Harɛre ɡalɡa nɛra ɛɛ ba Korowii bee a ɡɛ saŋ, dɛ́ ba ɛ o nɛra. Wɛɛ so he baah taa, ásɛ he jemɛ kɛŋɔ Koranar Bwa Kooroo tom mɛ he be.

¹² Korowii ɛɛ berɔ ba kpɔ Juda harɛ ɛ o kon waa dɛ nyinu kohona, harɛ waa do ɡoroŋ la ta, dɛ́ nyin bwɛjen Jerusalam ɡwaa bwɛɛ bɛlbwa.

¹³ Nɛwɛnyina bwa hel Korowii sie, dɛkalkɛ o iro le o boɡoroŋ bela waa lole.