Sekaria 14 - mzwDBL

Korowii Kora ba dii wa

¹ Tɔpere Korowii aa lea cheɡ dɛ́ bol nɛra waa dɛ́ pa bole la dɛ ba. He dɔma ɛɛ ba pa he Jerusalam tena laala kɛ laa ta kwa, dɛ́ bɔna he siwi ta.

² Korowii ɛɛ boa harɛre nɛra nyoa bá ba yo bwɛjen Jerusalam tena, dɛ́ lɛ bwɛjen la dɔɔh. Baa jo ba deene, dɛ́ pa ba laala, dɛ́ ɡuɡri ba haahna chɔ. Baa lawɛ bwɛjen la pera nɛraa kaa bojaŋ harɛfale ta, dɛ́ ɡel ba kar bwɛjen la ta.

³ Korowii ɛɛ leo, dɛ́ ka yo a ɡɛ harɛre la nɛra ɡɛ waa dɛ yo saŋ la.

⁴ Awola tɔpere la, wɛɛ ka che Ɔlevere Bwejen la taa, Jerusalam wee leebɔr. Ásɛ Bwejen la bini bɔne anɛ le wee leebɔr ba kaa wee cholibɔr, dɛ́ ɡel fɛlembɔjen chɔ baah ta, ásɛ Bwejen la pera do weekaŋle nyunduabɔr, o pera ɡe do weekaŋle harɛbɔr.

⁵ Hɛɛ chwao kpɔ fɛlembɔjen waa bɔne Bwejen la binii kaa bwɛɛ bɛl baa dɛ yerɔ Asɛl ta. Hɛɛ chwao ɡɛ he naawa fa aa chwaa ɡɛ saŋ harɛ aa jiɡra dɛ Juda Kooro Ussia di kora la. Korowii maa dɛ tomɔ la ɛɛ bao, o nyundua toroma bwa ja o nɛ.

⁶ Awola tɔpere la, wee aa lɔ, waa aa ba, kwaa aa sɔɔh dɛ hel kɛŋɔ dombwea.

⁷ Gɛ tɔpere la dɔŋ ta balɛ bwa, webaŋa toole, jwaana ɡe toole, Korowii ɡboo jemɛ a ɡɛ tɔpere la wa. Hale jwaana kwara dɛ bɔr ta chaahnɔ.

⁸ Awola tɔpere la, nedɛɛɡe ɛɛ palɔɔ le Jerusalam, o pera kaa Yar Mpo ta, o pera berɛ kaa Mɛdetereenea Mpo ta bɔwɔb ne waa saŋ bwa.

⁹ Korowiirii dɛ́ ɛ kooro awola tɔpere la harɛ nɔ bwa ta. Nomɛlbwa ɛɛ dɛɛ tomɔɔ, dɛ́ jemɔ dɛɛ yerɛ o ɡbo sɔn.

¹⁰ Harɛ la bwa, dɛ le Geba kaa Remɔn waa lɔ Jerusalam weekaŋle harɛbɔr ɛɛ chɔɔ kaa Jɔɔdan Moo la ta. Ásɛ bela Jerusalam aa lole la dawɛ nyundua o buɡ ta, dɛ́ le Bɛnjamen Doonyoa dɛ́ kaa bela Doonyoa Waa Tɔ Sie la aa lole la, ne Loŋkora Doonyoa, dɛ́ teŋe kaa Hananɛl Dejaŋ, dɛ́ kaa bela baa dɛ harame kooro daa nɔna nee dɛ kpɔ dɛɛ ɛ sen la ta.

¹¹ Nɛra ɛɛ ba so Jerusalam deŋnesɔɔhna taa, nomɛlbwa aa wola won ba aah o nɛra dɛ́ chɔɡo kpa.

¹² Weechɔɡa Korowii aa dɛ ba kpɔe ba ta harɛre a nɛra aa ba yo Jerusalam tena laanee nɔ. Ba bwadabii ne ba sibie ne ba nyondoŋa ɛɛ pɔɔh, dɛ ba ta serewɛ.

¹³ Awola tɔpere la, Korowii ɛɛ kpɔ ɔmee kohonaa ba ta ba nɛ, á ɡel ba lawɛ dɔŋa nɔɔra, dɛɛ yo dɔŋa.

¹⁴ Juda tena ɡe ɛɛ ka cha Jerusalam tenaa yo. Baa pa harɛre aa baro la nɛra kondɔɔh, suuɡaswɛm ne suuɡapoŋa dɛ yale kohonaa.

¹⁵ A ɡɛ weechɔɡa la siwi ɛɛ ba jaɡre ne keeɡore, ne nyoɡmare dɛ kondɛɛra aa lɔ bela ba dɔma aa soɡa la bwa nɛɛ.

¹⁶ Harɛre ta nɛra baa ba yo Jerusalam tena ásɛ ba bini bane ka la, baa di Kukure Tɔpejen la Jerusalam benanyoa bɛlbwaa, dɛɛ tomɛ Kooro waa ɛ Koranar Bwa Kooro la.

¹⁷ Dɛ harɛ la bɛlbwa nɛra ta Jerusalam laŋɛ ka tomɛ Kooro Waa Ɛ Koranar Bwa Kooro la aa, bwaala aa ban nɛ.

¹⁸ Ijipt harɛ ta tena ta laŋɛ dɛ ɡe ka tomɛ aa, bwaala aa ban nɛ. Korowii ɛɛ kpɔ weechɔɡa waa kpɔ ta harɛre nɛra báa wola la ka di Kukure Tɔpejen la nɛɛ.

¹⁹ Waa nɔɔ dɛɛ ba deŋnetɛra ɛɛ, dɛ́ tɛ Ijipt tena ne harɛre nɛra la bwa baa wola la ka di Kukure Tɔpejen la.

²⁰ Awola tɔpere la, dorɔŋre baa kpɔ do jaɡre baŋa la, baa chwerɛ a taa ŋɔ, ‘A Do Goroŋ Tɛ Korowii’, ásɛ viine baa kpɔa dɛɛ daa saraha kwaa Korowii Dea la, á berɛ do kɛŋɔ loɡa aa do ɡoroŋ dɛ che kon baa dɛ ɛ saraha o ta la sie.

²¹ Vii bɛlbwa waa lɔ Jerusalam ne Juda ɛɛ do ɡoroŋee tɛ Koranar Bwa Kooro, ásɛ nɛra baa ba ɛ saraha la kpɔ viine la daa ba saraha kwa. Keenan tena bonadiire bɛlbwa aa Koranar Bwa Kooro Dea belaa do awola tɔpere.