Sekaria 13 - mzwDBL

Wechɔɡa ne doŋa sɔe dɛ ta wa

¹ Nemenɛ Korowii ŋɔ, “Tɔpere bɛl ɛɛ bao, ásɛ nee bule dɛɛ le harɛ bini tɛ Kooro Devid ne o naanar, ne bwɛjen Jerusalam tena. Belaa baa ba laŋa, dɛ́ ka sɔ ba wechɔɡa baa ɛa, ne doŋa baa kaah bwa ta.

² Mɛɛ le voɡa aa lɔ harɛ la ta la nee awola, baa wola a sɔnaa lii kpa. Mɛɛ le keame nyosonteŋna la nee, ásɛ dɛ ɡel ba pɛla le voɡa toma ta.

³ Dɛ nomɛl dɛ teŋe nyosone ŋɔ waane ɛɛ chiɡuu kerekere aa, naate nya ne o mɛɛ ŋɔ o be ŋɔ, ‘A chɛ kɛŋɔ hé sewɛ, dɛkalkɛ he teŋe nyosone Korowii sɔn ta.’ O ta teŋɔ dɛɛ bol aa, o nya ne o mɛɛ ɡbaɡba tɔɡɔ kere kpo.

⁴ Awola tɔpere la, sihiih ɛɛ kpo keame bɛlbwa waa ŋɔa o dɛ na chaahnaa. Waa keamere batakaaree do dɛ́ neɡre nɛra kpa.

⁵ Wɛɛ ŋɔɔ, ‘N ta keame ɛɛ, paaree men, n bonɔɔne saŋ bwaa n le dɛɛ parɛ.’

⁶ Dɛ nomɛl bɔɔ bɛlbwa kon la aa ɡela pɛl dawɛ o bwara ta naa, wɛɛ chaŋoo ŋɔ, bolii ba doo o damanar dem.”

Ba kpo peteɡre la asɛ peera la lɔ peɡre

⁷ Koranar Bwa Kooro ŋɔ, “Mɛɛ ir n keree dɛ́ kpo n peteɡre waa dɛ tom mɛ la. Kpo peteɡre la ásɛ peera la lɔ peɡre ń dɔ bɔr kpoo a bii la.”

⁸ Korowii ŋɔ, “Harɛ la ta bwa ba bɔne ba bini bɔre atoro naa, baa kpɔ kerii kpoo bɔre anɛ nɛra á ba ka bɔrbeŋkpoŋ nɛra.

⁹ Bɔrbeŋkpoŋ nɛra nɔɔ mɛɛ ba kpɔe kpɔ nii ta kɛŋɔ baa kpɔ suuɡapoŋ ne suuɡaswɛm do nii ta dɛ laa a doŋa dɛɛ kpɔ a ta la. Baa yerɛ n sɔnee, ásɛ n ɡe sɛh ba be. Mɛɛ ŋɔɔ, ‘N nɛraa ban,’ ásɛ ba ŋɔ, ‘Korowii yaa dɛ tomɔɔ laanee la.’ ”