Sekaria 11 - mzwDBL

Nomonome nyubinikpeɡ tena chola wa

¹ Lɛbanɔn harɛ, pili he ɡbeni ásɛ nii ba fuh he peleme daa bwa dɛ́ chɔɡa.

² Dadɛɛɡa, hé wi, dɛkalkɛ peleme cholo, dajena kwaraa bwa chɔɡɔ. Basan harɛ dajena, hé wi, ba teŋni kɔr la daa aa farɛ o bini bwa.

³ Hé no koranar baa do kɛ peteɡra la wii baa dɛ wi, ba jirima baa dɔa bwa tonɔ. Hé no nyujentena sii aa dɛ si kohona, kɔr o daa aa fara a do o bini Jɔɔdan Moo nyoa bwa chɔɡɔ.

Peteɡra banɛ bane wa

⁴ Kenii Korowii men Sekaria aa dɛ tomɔ la bol n be, “Ɛ kɛŋɔ peteɡre waa dɛ nyiŋi peera baa lea cheɡ dɛ́ ka kpoora la.

⁵ Nɛra baa dɛ yawa dɛɛ kpoora la aa deŋnetɛraa dɔ. Nɛra baa dɛ yoɡa dɛ bol ŋɔ, ‘Ya dɔ suuɡa, Kórowii jam!’ Hale nɛra baa dɛ teɡa la aa a nɛɛ sune.”

⁶ Korowii ŋɔ, “Maa nɛra baa lɔ harɛ la ta bɛlbwa sumii na. Mɛɛ le bɛlbwaa tɛ o dɔŋ ne o kooro. Baa fiiɡi ba harɛ la ta nɛraa, kɛ maa ban lɛ.”

⁷ Anomanta, men Sekaria nyiŋi peera baa lea cheɡ dɛ́ ka kpoora la nɛ, dɛ teɡa kaa dibɔr, anɔ la baa dɛ fiiɡa la fanfa. Asɛ dɛ kpɔ daŋɡbale anɛ, dɛ pa bɛl sɔn ‘Sum Nae’, asɛ bɛl ɡe ‘Nyopɛo’, dɛ nyiŋi peera la nɛ.

⁸ Korobibeŋkpoŋ ɡbo ta, n doŋi peteɡra batoro bane baa hah mɛ. Peera la chwao le n be, n mee le a wa.

⁹ Ate, n ŋɔ peera la be ŋɔ, “Maa won ɛ he teɡre kpa. Anɔ la aa sewɛ la, a sewɛ, anɔ la baa kpo la, ba kpoora, ásɛ anɔ la aa ka la di a bala ola.”

¹⁰ Ate, n kpɔ daŋɡbala maa pa o sɔn ‘Sum Nae’ la dɛ kuu, a baɡle kɛŋɔ n chɔɡ fɔo Korowii ne harɛre nɛra bwa aa fɔwa la.

¹¹ Fɔo la chɔɡɔ awola tɔpere, asɛ peera baa dɛ fiiɡa la ɛɛ nyiŋ mɛ, dɛ na kɛŋɔ Korowiirii bol ɡɛ waa maa ɛa la.

¹² Men Sekaria ŋɔ peyarawa la be ŋɔ, “A wer tɛ heya aa, hé bɔ mɛ a kem, a laa ɡe aa, hé ɡel.” Asɛ ba tɛ mɛ suuɡapoŋa fifraatoro.

¹³ Asɛ Korowii ŋɔ n be ŋɔ, “Kpɔ do kon baa kpɔ suuɡa dɛɛ do o bini n Dea bela la bini.” Asɛ n kpɔ suuɡapoŋa fifraatoro baa kpɔa tɛ mɛ, dɛɛ lii kɛŋɔ a kan kohona la ta kon la bini.

¹⁴ Ate, n berɛ ku daŋɡbanɛɛte maa pa o sɔn ‘Nyopɛo’ la, a baɡle kɛ n chɔɡ beŋkpoŋri waa lɔ Juda harɛ ne Israel harɛ baah la.

¹⁵ Ate, Korowii ŋɔ n be ŋɔ, “Berɛ ɛ ɡɛ peteɡre ɡɛne aa dɛ ɛ o toma ja.

¹⁶ N dɛ ba peteɡre bɛl ne harɛ la ta. Waa peera aa nyoɡra la bɔree ɡaaɡe, waa a bii nɛɛ nyiŋi, waa anɔ la baa doa bola laanee chah, waa anɔ la aa dɔ bokpeɡa la ɡe kondikwaa tɛ. Anɔ la aa do bwara la, wɛɛ kpoora dɛɛ chwe, hale dɛ́ teŋni a nafikokore dɛɛ ta.

¹⁷ Peteɡre ɡɛne waa chwa ɡel peera la, ó bwɛɛlɛ! Baa kpɔ keree ŋwɛnɛ o nɔn ne o diɡ siwi. O nɔn ɡe sewɛ, o diɡ siwi ɡe tɔ kwaraa.”