Sekaria 10 - mzwDBL

Korowii ɛɛ nyiŋi Juda tena nɛɛ

¹ Hé soŋe Korowii o fel nɛ bwaala. Korowiirii dɛɛ ɛ baama aa nɛ bwaala. Onee ɡela bwaala nɛ dɛɛ tɛ nɛwɛnyina, koo kwaa ɛɛ do wer dɛɛ tɛ nomɛlbwa.

² Voɡa dɛ teŋe nyosone, voɡra waa baa dɛ na ɛ nyosone, deera mun baa dɛ baɡle la ta kasinteŋ ɛɛ, bolarawa baa kpɔa dɛɛ tɛ nɛra ɛ wesale. Anomanta, ba ɡelɔ nɛra nyoɡre kɛŋɔ peera aa wola teɡre dɔe, asɛ nɛra ɛɛ fiɡ ba.

³ Koranar Bwa Kooro ŋɔ, “N baah di nɛra baa do kɛ peteɡra la nɛ. Mɛɛ tɛr sitɔɔla la deŋnee, dɛkalkɛ, mɛɛ nyiŋi Juda dea tena baa do kɛ n peera la nɛɛ, dɛ́ ɡel ba do kɛ jaaɡɔ waa kpeɡa laa ta.

⁴ Juda dea tena binii nɛn waa do kɛ bwe baa kpɔ pa dea mun ɛɛ ba lee, o bee daa baa kpɔ baŋre tɛnte ɛɛ ba lee, to baa kpɔ yo laa le o be, ásɛ koranar ne nomonome bwa ɡe le o be.

⁵ Ba bwa ɛɛ doo kɛŋɔ banyoola, dɛ́ɛ tiɡri ba dɔma nɛɛ fɔɡbaahna laa ta. Men Korowii ja ba nɛɛ nomanta, baa yoo dɛ́ pɔ ba dɔma baa soɡe jaɡre ta, laa ta nɛ.

⁶ Mɛɛ ɡeloo Juda dea tena do kpeɡri dɛ́ lɛ Josef dea tena. Mɛɛ berɔɔ ba ba ne bela ba fa aa lole, dɛkalkɛ n dɔ tedoma tɛɛ ba. Baa doo kɛŋɔ nɛra n fa aa wola ban vɛɛh ken, dɛkalkɛ menee Korowii baa dɛ tom mɛ la. Mɛɛ dɛɛ chaŋ baa ba wesoŋa taa.

⁷ Israel tena ɛɛ doo kɛŋɔ banyoola, ásɛ ba sie lɛ kɛŋɔ nɛra aa nyɔ sen ba sie ɛɛ lɛ la. Ba bii ɛɛ nao ba sie lɛ, ásɛ ba hɛɡre waa Korowii aa ɛa wa.

⁸ Mɛɛ yer baa, dɛ́ boa ba nyoa. Kasinteŋ, mɛɛ lɛɛ baa dɛ́ ɡel ba warɛ ɡɛ ba fa aa doa wubwa la.

⁹ A lole kɛ n lɔ ba peɡre harɛre nɛra bini, kɛ báa ba lii n waa bojaŋ harɛre taa. Ba ne ba bii ɛɛ dɔ ba nyuu, ásɛ dɛ bwa berɛ ba dem.

¹⁰ Mɛɛ berɔɔ le ba ne Ijipt harɛ taa ba, dɛ́ boa ba nyoa le Asiiria harɛ ta. Mɛɛ kpɔ baa ba Gelead ne Lɛbanɔn harɛre ta, ásɛ ba warɛ harɛre la ta baa wola a taa jo.

¹¹ Wekpeɡa kohona bɛlbwa aa do kɛŋɔ mpo nehɛma dɛ ba ba nɛɛ aa, men Korowii ɛɛ sɔɔh a nyoaa, ásɛ Nael Moo vile bwa hweeh. Asiiria tena mbarafo nyoa ɛɛ sɔɔhnoo, ásɛ Ijipt harɛ kora kpeɡri nyoa ba harɛ.

¹² Mɛɛ tɛ n nɛra kpeɡrii, ásɛ baa tom mɛ dɛɛ no n wa. Men Korowiirii bola.”