Sekaria 1 - mzwDBL

Korowii yerɛ o nɛra ŋɔ bá berɛ ba o be

¹ Pɛɛsea Koojen Dareɔs aa di kora bennɛɛte korobie anuatoro ta la, Korowii bol waa o keame Sekaria waa ɛ Bɛrekea bibaa be. Sekaria nabaa sɔne Ido.

² Korowii Waa Ɛ Koranar Bwa Kooro ŋɔ Sekaria be ŋɔ ó bol nɛra la be ŋɔ on Korowii baah fa di o naawa nɛɛ taeh,

³ dɛ ŋɔ, “Dɛ he charɛ he liire dɛ berɛ ba n be naa, mɛɛ nyiŋi he nɛɛ.

⁴ He bɛ ɛ kɛŋɔ he naawa. Banee n keamere baa tɔ sie la bol n waa ba be ŋɔ bá charɛ ba liire le ba wechɔɡa ne wedoŋa ta, kɛ ba ta n be noɛ, kɛɛ dɛ kpɔ duure tɛ mɛ la.

⁵ He naawa sɛ taraken jaɔ? N keamere la ɡe ta lole ja aa?

⁶ N cheɡɛ n bonɔɔna baa ɛ n keamere nɛɛ dɛ kpɔ me Mmarare ne n waa tɛ he naawa dɛ ja ba, kɛ ba vɛah dɛ dɔ a deŋnetɛra. Belaa ba charɛ ba liire ŋɔ men Korowii Maa Ɛ Koronar Bwa Kooroo tɛr ba deŋne ɡɛ aa chɛa. Deŋnetɛra aa chɛ ba laanee ba dɔ le Korowii Waa Ɛ Koranar Bwa Kooro be ɡɛ waa ŋɔa wɛɛ ɛo la.”

Korowii keame Sekaria jaɡre ane waa naa wepila ta wa

⁷ Koojen Dareɔs aa di kora bennɛɛte, korobie fi dɛ beŋkpoŋ baa dɛ yerɔ Sebat, tɔpera fifraanɛ dɛ anaarɛ ta la, Korowii bol waa o keame Sekaria be jwaana. Kenii Sɛkaria bol Korowii waa la.

⁸ “Awola jwaana la, men Sekaria na baa bɛl wepila ta o so jaaɡɔswɛm ta. Dɛ o cheɡɛ daa ane baa dɛ yera mɛtel baah ta fɛlembɔjen bɛl bini, asɛ nɛra bane ɡe so jaaɡɔswɛɛma, ne jaaɡɔkɔla dɛ jaaɡɔpoŋa ta o habɔɔ.

⁹ Ate, n bɔɔro ŋɔ, ‘N dɔɔ, nɛra baa soɡe jaɡre ta nɔ munii ɛrɔɔ?’ Korowii nyundua torome la n ne waa dɛ bol waa la chaŋe ŋɔ, ‘Mɛɛ chaɡle a munii.’

¹⁰ Belaa baa waa soɡe jaaɡɔswɛm ta dɛ che daa la baah ta la ŋɔ, ‘Banee banɔ la Korowii aa toma ŋɔ bá ka ɡaaɡe harɛ nɔ bwa ta dɛ́ na waa aa dɛ chiɡ.’

¹¹ Ba balɔ dɛ ba ŋɔ Korowii nyundua torome la waa cheɡɛ daa la baah ta la be ŋɔ, ‘Ya laŋɔ ka ɡaaɡe harɛ nɔ ta bwa, dɛ na kɛ harɛ la sɔɔhnɔ o nɛra bwa ɡwɛɡre.’

¹² Ate, Korowii nyundua torome la ŋɔ, ‘Koronar Bwa Kooro, bene fifraanuanɛɛ nɔ he baah aa di Jerusalam ne Juda bwɛjena tena nɛ. Saŋ besoo hɛɛ ba ba sum nae yɔ?’

¹³ Belaa Korowii bol wobodɛɛɡa ne bolarawa waa o nyundua torome n ne waa bol waa la be.

¹⁴ Ate, Korowii nyundua torome la waa bol waa n be la ŋɔ ń ka bol Koranar Bwa Kooro waa waa ŋɔa ŋɔ, ‘N dɛ nyin Jerusalam n bwɛjen waa do ɡoroŋ la waa taeh,

¹⁵ kɛ n baah di harɛre a nɛra aa dɛ lii kɛŋɔ ba soɡe deŋnesɔɔhna ta la nɛɛ kohona. Dɛ n fe dɛ na n nɛra sum, kɛ ɡɛ harɛre la nɛra ɡelɔ n nɛra wahala ɡwaa kohona.

¹⁶ Mɛɛ sune Jerusalam tena nɛɛ, dɛ́ berɛ ba bela, ásɛ ba kwaa ma n Dea ne bwɛjen la bwa. Men Koranar Bwa Kooroo bola.’

¹⁷ Korowii nyundua torome berɔ ŋɔ kenii Koranar Bwa Kooro ɛɛ bol, ‘Mɛɛ ɡeloo n bwɛɛre la berɛ dɔ a te, ásɛ dɛ larawe n nɛra baa lɔ Jerusalam bwara, dɛ́ kpɔ bwɛjen la ɛ n kon.’

Nyeɡlare ane wa

¹⁸ Wepila ane ɡe ta, n na nabal nyeɡlare anaarɛ ane.

¹⁹ N bɔɔ Korowii nyundua torome la waa dɛ bol waa n be la ŋɔ, ‘Nyeɡlare nɔ ɡe munii ɛrɔɔ?’ O chaŋe ŋɔ, ‘Nyeɡlare nɔ cheɡɔ tɛ harɛre a nɛra aa kpeɡa, dɛ lɔ Juda ne Israel dɛ Jerusalam tena peɡre kaa harɛre ta la.’

²⁰ Belaa Korowii baɡ mɛ loɡra banaarɛ bane ɡe.

²¹ N bɔɔ ŋɔ, ‘Bɔkwaa baala nɔ ɛɛ ba ba ɛɔ?’ Asɛ Korowii nyundua torome la chaŋe ŋɔ, ‘Ba balɔ dɛ́ ba aah, dɛ́ doŋi harɛre a nɛra aa kpeɡa, dɛ ba chɔɡ Juda harɛ dɛ lɔ o ta nɛra bwa peɡre kaa harɛre ta la.’ ”