Sɛɡla 9 - mzwDBL

Wejema ne ɡɛnewa

¹ Wejema do kɛ haah waa ma o dem, asɛ dɛ ɛ pilare anuanɛ do o ta.

² O kpo ol dɛ kpɔ ɛ kondikonjena, dɛ kpɔ konsɔɔhsoma ane koo sen ta, dɛ pa chɔŋre teebur ta.

³ O tomɛ o toli ŋɔ bá la bwɛɛ la bela aa dawɛ deŋɡare ta ka yerɛ nɛra.

⁴ Dɛ ŋɔ, “Hé banɔ la he sie aa wola pile la ba,” dɛ berɛ ŋɔ ɡɛna ɡe be ŋɔ,

⁵ “Hé ba di kwaa dɛ́ nyɔ sen maa koo kwaa a ta nɔ ane.

⁶ Hé le he sie bɛ pila la ta, dɛ́ dɔ he nyu. Hé teŋɛ wejema ŋwɛnɛ ta.

⁷ He dɛ ja nɛn waa dɛ ɛ sisawa aa, chɛɡaa hɛɛ dɔ. He dɛ di wechɔɡ-ɛɛ ɡe kasinteŋ aa, waa hɛɛ dɔ.

⁸ Bɛ nɛn waa dɛ ɛ nɛra sisawaa kasinteŋ di o ba haeh, di wejereme kasinteŋ, ásɛ o nyini.

⁹ Hé dɛ ja wejereme aa, a ɡelɔ wɛɛ jemɛ waa kohona. Anɔ la bɛlbwa haa bol nɛn o wa aa toɡra be la, a dɛ ja o wejema ta.

¹⁰ Wejema mumparee Korowii ɔma, waa mun noe ɡe cheɡɛ Korowii Waa Do Goroŋ jema ta.

¹¹ Menee Wejema, he teŋɛ n nɛ aa, hɛɛ dɔ mkpajaŋee.

¹² He jemɛ wa aa, aa do werii tɛɛ, he vɛah ɡe aa, hɛɛ na waa.”

¹³ Gɛna do kɛŋɔ haah waa ɛ wobobala te, waa wola sihiih jemɛ.

¹⁴ O dem doonyoa kɛɛ bwɛɛ la deŋɡare taa o kara che wɛɛ so o ta,

¹⁵ dɛɛ yerɛ nɛra baa ba dɛ kaa, banɔ la baa teŋa baa kaa ba liire do ba waa ta.

¹⁶ Dɛ ŋɔ ɡɛna be ŋɔ, “Nɛra he sie aa wola pile, hé ba n be bonɔ.”

¹⁷ Dɛ berɛ ŋɔ, “Nee haa ŋwɛ nyɔ la som taeh, kondikwaa haa sɔh di la som.”

¹⁸ Nɛra waa dɛ lɛɛ ba la aa jemɛ kɛŋɔ ba la o dem aa, ba dɛ sewɛ. Banɔ la baa tɔ sie jo bela la, ba bwa serewɔ kaa lalabwɛ.