Sɛɡla 8 - mzwDBL

Wejema yera waa dɛ yerɛ

¹ Hɛɛ no, wejema do kɛŋɔ haah dɛɛ yerɛ, o do kɛŋɔ nɛn waa dɔ liire, dɛɛ no waa mun, o taa che chiŋ.

² O cheɡɛ ŋwɛnɛ nyoa deŋɡarere ta, o lɔ ŋwɛnɛ chɛchɛre ta.

³ O cheɡɛ bwɛjen doonyoo, bela baa kpɔa dɛɛ jo o bini, o lɔ bela dɛɛ yerɛ.

⁴ O ŋɔ, “N dɛ yerɛ nomɛlbwa, nɛra baa lɔ harɛ nɔ ta bwaa mɛɛ yerɛ.

⁵ He sie ta pilaa, hé hweli sipila wa. He ɡɛnaa, hé hweli wejemwa.

⁶ Hɛ́ɛ no, n waa nɔ wer taeh, anɔ la bwa maa dɛ bol he be la toɡrɔ.

⁷ Kpelaa mɛɛ bol, maa nyosone teŋe bwa.

⁸ Wobɛlbwa maa bol la bwa ɛ kasinteŋ, a bɛlbwa toole dɛ ɛ nyosone kɛɛ neɡra.

⁹ Nɛn waa dɛ no waa mun la, a bwa bini chɔɔ tɛo, dɛ berɛ toɡre tɛ banɔ la baa dɔ wejema.

¹⁰ Hé kpɔ waa maa kpɔa dɛɛ ja heya dɛ́ ɡel suuɡapoŋ, hé kpɔ wejema ɡwaa suuɡaswɛm tenten.

¹¹ Menee Wejema, n ɡwaa kwaa baa kpɔ suuɡaswɛm ɛa, haa won kpɔ he bambile ta komɛlbwa maɡ mɛ.

¹² Menee Wejema, n sie pilo, n jemɛ waa dɛɛ no waa mun.

¹³ Nomɛlbwa waa dɛ ɔmɛ Korowii kii wechɔɡa, anomanta, n kii mbarafo ne maŋkurae we-ɛɛla, ne wechɔɡa ŋwɛnɛre, dɛ nyosone.

¹⁴ N dɛ baɡle nɛra waa bá kpɔ ɛ toma aa cha ba, n ɡelɔ baa no waa mun, dɛ́ dɔ kpeɡri.

¹⁵ N cha koranar baa di kora, ásɛ nomonome won mmarare aa wera doe.

¹⁶ Nomonjena ba wa aa toɡra cheɡɛ n nɛɛ dɛɛ di kora, dɛ́ won bol waa dɛɛ pa bole aŋwɛnɛ ta.

¹⁷ N dɛ nyin nɛra baa dɛ nyin mɛ, nomɛlbwa waa dɛ nyin n bɔr dɛ́ na mɛ.

¹⁸ Menee dɔ kondɔɔh ne jirima dɛ kpɔ dɛɛ tɛ, dɛ soɡa bini wer doe dɛ ka tonɛ.

¹⁹ Kon haa dɔ le n be la ɡwaa suuɡaswɛm baa laa doŋa kpɔ o ta, dɛ ɡwaa suuɡapoŋ tenten.

²⁰ Waa aa toɡraa mɛɛ ɛ, dɛɛ teŋɛ kasinteŋ ta,

²¹ dɛɛ tɛ banɔ la baa dɛ nyin mɛ kondɔɔh, ba deremi ɛɛ su kohona.

²² Men Wejema, menee Korowii tɔ sie ta, mɔɔ dɛ pa mun ta komɛlbwa.

²³ Menee Korowii tɔ sie ta mumpar la, mɔɔ dɛ ta harɛ nɔ.

²⁴ O ta mɛ mɔɔ dɛ ta mpore, ne nee nyuune.

²⁵ Waa wola bwejena tae mɔɔ la, dɛ n lole, mɔɔ o kpɔ deŋɡarere ba cheɡ la, dɛ ba lol mɛ.

²⁶ Waa wola harɛ ne kpɔɡ bini kɛɛ harɛ nɔ ta teera kwaraa tae mɔɔ la, dɛ n lole.

²⁷ N siwi taa Korowii ta nyundua, dɛ pe mpo ne nyundua chenchema,

²⁸ ɡɛ saŋ waa kpɔ baama do nyundua, dɛ ta neerare a palɛ kaa jo mpo ta la.

²⁹ N lole o maɡɛ bela mpo aa dɛɛ jaɡɛ, dɛ ŋɔ o bɛ bela ba ɡarɛ, ne ɡɛ saŋ waa pe harɛ mun.

³⁰ Dɛ n lɔ Korowii jwɛɛh ya bwa pɛ dɛɛ ɛ toma, dɛ n dɛ ɛ waa o bambile aa dɛ nyin tɔpere bɛlbwa, n sie ɛɛ lɛ o be saŋ bɛlbwa.

³¹ Asɛ n sie lɛ toma yaa pɛa ɛ la ta, n tea too nɛwɛnyina bwa nɛ.

³² N bii, name hé no n be, nomɛlbwa waa dɛ teŋɛ n waa ta la, o na som.

³³ Hé no anɔ la maa dɛ do heyaa a ta, he bɛ an vɛh, ásɛ dɛ jemɛ wa.

³⁴ Nɛn waa dɛ no n waa la, o na som, nɛn waa dɛ so n dem doonyoa kɛɛ dɛɛ kpa bela la, o na som.

³⁵ Nomɛlbwa waa na mɛ la dɔ mkpa, Korowii tea ɛɛ too o nɛɛ.

³⁶ Nomɛlbwa waa wola men nae la, o ɛ o te, nomɛlbwa waa hah mɛ la pɛla lawɛ seo.”