Sɛɡla 7 - mzwDBL

Hanjwamane jae wa

¹ N bie, dɛɛ teŋɛ n waa ta, dɛ́ɛ do liire waa maa dɛ doe a ta la ta.

² Dɛɛ no n waa dɛ́ dɔ mkpa, dɛ́ɛ nyiŋi waa maa dɛ baɡle la ta kɛrɛdɛ, kɛŋɔ he siwinyiŋi ken.

³ Kpɔa do kɛŋɔ noniseɡ, dɛ́ ɡel a do he bambile bini.

⁴ Kpɔ wejema kɛŋɔ he nimambie, dɛ́ kpɔ waa mun noe kɛŋɔ he dansom.

⁵ Aa lawɛɛ le hanjwamane, ne nomɛl haah o nyoa wobol aa soma nɛ.

⁶ Awola bɛl, n lɔ dea dɛ ha sie nyiŋi tokoro ta,

⁷ dɛ na bonɔɔna bane baa wola wobɛlbwa jemɛ, ba bini la, dɛ bɛl te ɛ ɡɛne tenten.

⁸ Baa dɛ kaa la, dɛ ɡɛne la te valɔ dɛɛ kpɔ bela hanjwamane la aa soɡa. Dɛɛ fɛrɛ haah la dem,

⁹ dɛ bɔr dɛ jo, bobɛlbwa ɛɛ bir.

¹⁰ Ate, haah la kpɔ o te dɛ ba cheme bonɔɔ la, dɛ haah la do jwamanlaala dɛɛ taaɡe sie.

¹¹ O ɛ haah o deŋne aa kpeɡa, waa sihiih jemɛ, dɛ do ɡaaɡa ɡbo ta,

¹² hɛɛ nao kɛŋɔ o cheɡɛ loŋkoni ta, kɛɛ fɔɡbaahna ane ta yawa ta, dɛ́ dɔ baa lawɛ.

¹³ Belaa haah la ba ɡbaa bonɔɔ la pɛl o te, dɛ kpɔ nɔɔra dawɛ o vaama ta, dɛ nyiŋi o siebɔr, dɛ ŋɔ o be ŋɔ,

¹⁴ “Fini n kpo kon dɛ ɛ deŋnesɔɔhna sarahare, asɛ a ka ola la ane.

¹⁵ Asɛ n le dɛ baa ɡaaɡe he bɔr, n nyin he bɔr asɛ dɛ nae la!

¹⁶ N kpɔ yadɛɛɡe Ijipt harɛ tena aa ɛo, o do wer kɛrɛdɛ pa n chɔɔbɔr.

¹⁷ Dɛ kpɔ korobo ne konsɔɔhsoma bwa soo siwi merɛ o ta.

¹⁸ Ba ya ka lɛ ya sie jwaana nɔ ne bwa, ya ka di ya bwara!

¹⁹ N jaa toole, o kaa bobɛl, bela jaŋne.

²⁰ O kpoŋe suuɡa kohona dɛ kaa, wɛɛ dɔ yawanyoa anɛɛ.”

²¹ Haah la kpɔ neɡra ŋwɛnɛ ne wobosoma dɛ dɔɔ kaa.

²² Buɡ la ta, bonɔɔ la den teŋɛ o nɛɛ kɛŋɔ nao baa tɛɡro dɛɛ la ka kpo la, kɛɛ kweɡla aa jo bel ta

²³ bela hɛm aa yaɡɔ dɛ́ kpoo la. O berɔ do kɛŋɔ jumbie aa toola dɛɛ kaa bel ta, waa wola jemɛ kɛŋɔ o dɛ ba sewa la.

²⁴ N bii, name hé no n be, hé cheɡ deŋne dɛ́ no n wa.

²⁵ Hé bɛ ɡel he pɛla do haah waa do ɡɛ nɔ nɛɛ ó ba neɡre heya, he bɛ bɛl nɛɛ teŋɛ bwa.

²⁶ Gɛ haah nɔ chɔɡ baala taeh, dɛ berɛ ɡel bane ɡe serewe baa wola won kur ba.

²⁷ He nakpala tire o dem aa, amɔ dɛ lalabwɛɛ ŋwɛnɛ taa he che la. Bela ne seo bori.