Sɛɡla 6 - mzwDBL

Gɛna wejaala ane

¹ N bie, a balɔ kɛŋɔ he di ajinamuu tɛ he dɔŋ, dɛ he baɡɛ nyoa waane ta tɛ nomɛl aa,

² amɔ dɛ he nyobaɡa la ɛ bel dɛ tɛɛ, waa haa bola la harɛ bel.

³ N bie, a ba ɡɛ naa, dɛ he nɔn lɔ he dɔŋ la nyoa, ɛ warane la o be dɛ́ ka soŋo, dɛ́ dɔ he te.

⁴ Bɛ kpoŋe so, bɛ kpɔ chɔ.

⁵ Ɛ warane kɛŋɔ welo aa na kpaah, dɛ laa o te kpɔ, kɛɛ jumbie aa na nɛn waa dɛ harɔ bel la.

⁶ Bɔhwaah bɛlbwa nyiŋi vaɡla we-ɛɛla, dɛ́ che a ta hweli wa.

⁷ A ta nomoa kɛɛ nyu te dɔe, a ta kooro dɔe,

⁸ kɛ a nyin a kondikwaa dɛɛ cheɡ hwel saŋ, dɛ kpɔ dɛɛ kpa bwaala nee saŋ.

⁹ Bɔhwaah, saŋ besoo hɛɛ nyin he chɔ ka tel, dɛ́ ir saŋ besoo?

¹⁰ He yon ŋɔ, “Chɔe tama, dom chuɡla tama, nɔɔra fɔɔla dɛ́ so onɛ tama.”

¹¹ He ne ŋɔe he ba jemɛ la, dɛ nyaa piɡri kɛŋɔ ŋwɛɛ aa kpoŋe dɔmkon dɛ́ ba che he nɛ.

¹² Nɛnsale baa ɛ ba te nɛnchɔɡaa vala dɛɛ teŋe nyosone.

¹³ Ba kpɔ sie ne nakpale dɛɛ bol wa, dɛ kpɔ nonie dɛɛ baɡle wa,

¹⁴ ba dɔ liichɔɡa ba nyu bini, dɛɛ vɔrɔwe wechɔɡa ba bambile ta. Wobochɔɡa lɔ ba nyoo baa ir nɛra bandia.

¹⁵ Anomanta, kerabeŋkpoŋii wekpeɡa ɛɛ ba ba nɛɛ bala, buɡ taa aa ba ba nɛɛ chiɡa, dɛ́ chɔɡ ba, ba chah kahonɛ.

¹⁶ Webele anumɛl kɛɛ anuanɛ ane lole Korowii haah kɔkɔkɔkɔ, anee,

¹⁷ nɛn waa nyiŋi nɛn dɛɛ vah, ne nyosonteŋni, ne nɛŋkpoa,

¹⁸ ne nɛn waa dɔ wechɔɡa vɔrɔwa o nyu bini, ne nɛn waa ɡbaŋa wechɔɡa ɛɛ ta,

¹⁹ ne dansewea dɛ nɛn wobochɔɡa aa lɔ o nyoa, dɛɛ ba peɡra ne o dem tena baah ta.

Jwamane jae wa

²⁰ N bie, dɛɛ no waa he mɛɛ aa dɛ doe a ta. Bɛ waa he nya aa dɛ baɡle vɛh.

²¹ Kpɔa ɛ kɛŋɔ baŋa kon, ɡel a ɛ he bambile wa.

²² Aa tɔ he siee bobɛlbwa haa dɛɛ la, he chɔe bini, aa nyiŋi he nɛ, ásɛ he iro ɡe aa, a tɛɛ liire.

²³ Webaɡla nɔ do kɛŋɔ kandea dɛɛ chaahne, wejaala nɔ ɛɛ won baɡle ɡɛ haa dɛ ba wona so.

²⁴ Aa won kee le hanchɔɡe nɛ, dɛ́ won ɡel he laa he te kpɔ haah o nyoa wobol aa soma, dɛ ɛ nomɛl haah nɛ.

²⁵ Bɛ o wer waa koh dɛ́ ɡel he sie do o nɛ, bɛ ɡel o kpɔ o tolsie neɡre.

²⁶ Hɛɛ won kpɔ kondikwaa tamaa ken dɔ hanjwamane. Kɛ dɛ he dɛ nyin nomɛl haah tenaa, komɛlbwa dɛ le he nɔn ta.

²⁷ Hɛɛ won pa ninhɔla kore, he laala aa wola fuah?

²⁸ Hɛɛ won valɛ ninhɔla ta, he napaala aa wola bwɛ aa?

²⁹ Gɛɛ a do, nomɛlbwa waa lawɛ o dɔŋ haah chɔ la, baa tɛr o deŋne.

³⁰ Dɛ nɛn dɛ chɔ lɔr, dɛ ka ŋwɛ kwaa di aa, he bɛ on hah, dɛɛ nyiŋi o nyubaah.

³¹ Kɛ dɛ ba lawɔ tenaa, a chɛ kɛŋɔ ó bɔ kwaa waa ŋwɛa la bele anuanɛ. Kwaa waa dɔa bwa ɛɛ le o nɔn taa.

³² Baa waa le o haah habɔɔ, dɛ kaa nyin hanfala la ta liire dɔe, o dɛ chɔɡ o ɡbaɡba.

³³ Waa duure dɔ, lɔɔraa chɔ le tɛo, sihiih aa o nɛɛ le bwa.

³⁴ Baa baah aa di kohona, nemenɛ o meera tɔpere o yon bɔ a kem ɡɛ bwa waa dɛ nyin.

³⁵ O sie aa larawa bɛlbwa ta lɛ, komɛlbwa toole he kpɔ tɛo o baah sɔɔh.