Sɛɡla 5 - mzwDBL

Jwamane jae wa

¹ N bie, cheɡ deŋne, dɛ́ no n wejema nɔ, no waa aa dɛ tɛ waa mun noe.

² Ásɛ dɛ che a ta dɔ dadɛɛɡe, ásɛ he wobol baɡle kɛŋɔ he dɔ wejema.

³ Hanjwamane nyoa wobol som kɛŋɔ tooh ken, o taa pwɛre ɡwaa no,

⁴ kɛ a habɔɔ la, waa waa doe a ta la kpeli kɛŋɔ ol kpela. O nyoa wobol dɛ do nɛn bol kɛŋɔ naŋɡɔse ken.

⁵ Wɛɛ kaa he ne seo taa, lalabwɛɛ ŋwɛnɛɛ wɛɛ kpɔ.

⁶ Waa ŋwɛnɛ waa dɛ tɛ mkpa la ta kpɔ, valaa o valɛ dɛɛ valɛ, waa jemɛ anɔ la waa dɛ ɛ.

⁷ N bii, hé berɛ no, hɛɛ berɛ waa maa dɛ bol he be nɔ soeh.

⁸ Haah waa do ɡɛ la, hé laa he te kpɔ o nɛ, he bɛ o doonyoa kwaraa fɛrɛ.

⁹ Gɛ laa aa, hɛɛ paŋɛ he bonɔɔne saŋ jirima he fa aa dɔa la nyubinikpeɡ tena nɔn taa.

¹⁰ Ásɛ nɛŋhɔɔhra ba kpɔ he kondɔɔh di, ásɛ kwaa haa ɛ toma dɛ dɔ la, bɛ nomɛl kwaa ba berɛ.

¹¹ Haa ba hwɛɛh la, he ba chɔ dɛɛ hime, ɡɛ saŋ he bwadabii bwa aa ɡwɛɡra la,

¹² ásɛ he ba ŋɔ, “N deŋnekpeɡ ne n waa bɛ noe, ne n bambikpeɡii tɛ mɛ.

¹³ N ta nɛra baa baɡ mɛ waa la be noɛ, n ta nɛra baa do mɛ la waa ta teŋɛ.

¹⁴ Asɛ buɡ nɔ ta mɛɛ ba ncho dii, nɛra bwa siwi ta nɔ.”

¹⁵ He ne he haah ɡbo ɛɛ chɔ, kɛŋɔ haa dɛ nyɔ he dem nee ɡbo la.

¹⁶ Bɛ fɔɡbaahna haahna ka nyin. Ba do kɛŋɔ nee aa wola were ne nyɔe.

¹⁷ Kpoŋe he haah ɡbo, he ne nomɛlbwa kon laa.

¹⁸ Gel he sie ɛɛ lɛ he bonɔɔne saŋ haah nɛ. Korowii swee andɛɛɡa tɛɛ he ne o chɔe bini.

¹⁹ O wer kɛŋɔ diɡi ken, o we-ɛɛla ɡe do wer, ɡel he sie ɛɛ lɛ o nɛ, hɛɛ nyinu kohona saŋ bɛlbwa.

²⁰ N bie, bɔkwaa ɡela he berɛ kpɔ he te tɛ hanfale bɛl jaɔ? Bɔkwaa ɡela hɛɛ sewɛ he dɔŋ bɛl haah nɛɛ jaɔ?

²¹ Korowii dɛ na wobɛlbwa haa dɛ ɛ, o jemɛ he vala bini bwa.

²² Nɛnchɔɡe wechɔɡa do kɛŋɔ bel dɛ tɛo, o dichɔɡaa dɛɛ lawɔ.

²³ Lawa waa wola won o te lawɛ laanee dɛ́ kpoo, o ɡɛnaa ɡela wɛɛ sewɛ.