Sɛɡla 4 - mzwDBL

Wejema kan taeh

¹ N bii, hɛɛ no waa he mɛɛ aa dɛ baɡle, hé cheɡ deŋne dɛɛ no, ásɛ dɛɛ no waa mun.

² Wedɛɛɡaa mɛɛ baɡle heyaa la, hé ɡel a do he liire bini.

³ N fa aa lɔ n nya ne n mɛɛ sie, dɛ ɡbo ɛ bibaa dɛ ta ɛ bechala la,

⁴ n mɛɛ fa yon bol waa dɛɛ baɡ mɛ dɛ ŋɔ, “Gel waa nɔ ɛɛ liire dɛ bɛ soh. Dɛɛ teŋɛ a ta ásɛ dɛ biɡri.

⁵ Kpɔ wejema dɛɛ no waa mun, do liire a ta, dɛ bɛ waa maa bola la ta le.

⁶ Bɛ wejema vɛh, ásɛ o nyiŋi he nɛ. Nyinu he bambile bwa, ásɛ o kpɔ nɔn tɔ he nɛ.

⁷ Wejema kan taeh, anomanta, hwelu. Waa mun noe ɡwaa komɛlbwa haa dɔa.

⁸ Duu wejema, ásɛ o ɛɛ nɛnjen, kpɔ he te pɛlo, ásɛ o tɛɛ jirima.

⁹ Wɛɛ kpɔ jirimaa sime kɛŋɔ botidɛɛɡe, dɛ́ kpɔ pii kɛŋɔ kooɡbɛrɛ he dɔ jirima.”

¹⁰ N bie, no n be, dɛ́ do sie a ta kɛrɛdɛ, ásɛ dɛ dɔ mkpajaŋ.

¹¹ N baɡle wejema, n kpɔe cheɡ ŋwɛnɛdɛɛɡe haa kpɔ o ta dɛ́ so.

¹² Dɛ he dɛ valɛ wejema ne naa, wobɛlbwa toole dɛ́ tɔe ŋwɛnɛ, he dɛ chwa kwaraa naa, haa nakpalaa lɔ.

¹³ Lawɛ waa haa hwela la bini saŋ bɛlbwa, dɛ bɛ ɡel a le he nɔn ta, nyiŋi a ta kɛrɛdɛ, anee he mkpa.

¹⁴ Bɛ bela nɛnchɔɡa aa dɛ la la, bɛ ba waa dɔŋa ɛ.

¹⁵ Dɛɛ ke he te, bɛ ɡɛ ŋwɛnɛ la ta kpɔ, ke o ta, dɛ́ kpɔ he ŋwɛnɛ.

¹⁶ Gɛ nɛra la aa won chɔ, dɛ ba ta wechɔɡa ɛɛ, baa won haŋre, dɛ ba ta wechɔɡa dii.

¹⁷ Nyubinikpeɡ ne yoi we-ɛɛlaa ɛ ba kondikwaa ne sen.

¹⁸ Nɛra ba wa aa toɡra waa do kɛŋɔ, bɔr aa chaahna chɔmbibii ka tel kɛŋɔ wee aa baŋa.

¹⁹ Kɛ nɛnchɔɡa ŋwɛnɛ te do kɛŋɔ, bɔr aa bira kpirkpir ken, baa kon baa lɔ naa o ta na.

²⁰ N bie, cheɡ deŋne dɛɛ no waa maa bol baɡle, dɛɛ no n be kɛrɛdɛ.

²¹ Bɛ ɡel a le he liire ta, ɡel a do he nyu bini.

²² A ɛ mkpa dɛ tɛ banɔ la baa dɛ no a mun, dɛ berɛ dɛɛ tɛɛ ba bokpeɡa.

²³ He dɛ lii wa aa, dɛɛ nyiŋa kɛrɛdɛ, waa haa dɛ lii la, anee hɛɛ ɛ.

²⁴ Bɛ waa aa wola kpela ɛɛ bol bwa, laa he te kpɔ neɡra wobol ta.

²⁵ Do sie dɛɛ ɛ waa haa dɛ ɛ, do sie a ta, dɛ bɛ bobɛlbwa nyiŋi.

²⁶ Nyiŋi he vala bini kɛrɛdɛ, ásɛ dɛ che kiŋkiŋ bela haa dɛ kaa.

²⁷ Laa he te kpɔ wechɔɡa ta, dɛ́ ɡel he ŋwɛnɛ toɡre. Bɛ ŋwɛnɛdɛɛɡe la ta le.