Sɛɡla 31 - mzwDBL

Waa aa le Kooro Lɛmoɛl be

¹ Waa aa hiah Kooro Lɛmoɛl, o nya bol baɡloo nɔ,

² “N bidɛɛɡe, n tea bini bie hen. N baɡɛ Korowii nyoa, dɛ lolɛ.

³ Bɛ he bokpeɡa chɔɡ haahna nɛ, ba ɡelɔ koranar ɛɛ chɔɡ.

⁴ Lɛmoɛl, a ta chɛ kɛŋɔ koranar nyɔ seŋkpeɡa, a ta chɛ kɛŋɔ ba pɛla do a ta.

⁵ A ɡelɔ baa soh mmarare aa lɔ ba harɛre ta, baa nyaara waa bolɛ dɛɛ tɛɛ ba aŋwɛnɛ ta.

⁶ Nɛn waa soɡe seo nyoa, kɛɛ nɛn waa dɛ di suna laanee chɛ kɛ o nyɔ seŋkpeɡa.

⁷ Banee chɛ kɛŋɔ ba nyɔa, dɛ́ soh ba nyae ne suna baa dɛ di.

⁸ Kɛ he te chɛ kɛŋɔ he bol waa dɛɛ tɛ nɛra baa wola wobol jemɛ, ne banɔ la baa wola nomɛlbwa dɔe bá bol ba waa tɛɛ ba aŋwɛnɛ ta la.

⁹ Bol waa dɛɛ tɛ a ɡɛ nɛra ŋwɛnɛdɛɛɡe ta, ásɛ dɛ ɛ nɛn waa bol waa dɛɛ pa bole aŋwɛnɛ ta.”

Handɛɛɡe kpɛɛra

¹⁰ Umee dɛ dɔ handɛɛɡe ɔ? O dɔe kpeɡri ɡwaa suuɡaswɛm nɔnloɡa ne baŋa kwa.

¹¹ O jaa yarada bwa lɔ o nɛ, waa ɡelɛ wobɛlbwa ɛɛ hiah o jaa.

¹² O dɛ ɛ o jaa kɛrɛdɛ, waa on wechɔɡa ɛ o soɡa bini bwa.

¹³ O swɛɛ siwi dɛɛ ta yabii ba kpɔ sɔh yal o do wer kɛrɛdɛ.

¹⁴ O dɛ la bojaŋ dɛ ka kpɔ kondikwa dɛɛ ba kɛŋɔ, stiimae yon la bojaŋ ka kpɔ bonadiire dɛɛ ba la.

¹⁵ O felo dɛɛ ir chɔmbibii, dɛɛ tɛ o dem tena kondikwa, dɛ́ berɛ baɡle o toli dem toma bá ɛ.

¹⁶ O dɛ nyin harɛ waa wera dɛ́ yawɛ, dɛ́ kpɔ o suuɡa yawɛ daa dɛɛ du.

¹⁷ O bwara kpeɡri o swɛɛ siwi dɛɛ ɛ toma kɛrɛdɛ.

¹⁸ O dɛ na kɛŋɔ o bonadii dɔ tɔnɔ, dɛ ɛ toma wee kaa jo, o yon choŋi kandea, waa chɔ warane.

¹⁹ O dɛ lawɛ jeremi dɛ́ ta yabi, dɛ́ sɔh o ɡbaɡba yal.

²⁰ Waa o ɡbo kon nyin, o dɛ ta tea dɛɛ tɛ nyaara ne nɛŋɡwɛɡra kwa.

²¹ Waa ɡelɛ waa ɛɛ kpo o dem tena waa saŋ. O dɛ tɔ ba yale.

²² O ɡbaɡbaa dɛ́ nyarɛ bombore dɛ́ kpɔ dɛɛ pa o chɔɔbɔr. O dɛ li yadɛɛɡa bwa soo siwi a yoɡ aa kpeɡa.

²³ O jaa ɡe soɡe bwɛɛ nomonome bini naa, nomɛlbwa dɛ duuru.

²⁴ O dɛ sɔh yapondɛɛɡa ne kirisore dɛ yoɡ dɛɛ tɛ bonadiire.

²⁵ O bwara kpeɡri o waa dɔ nyɛl, o bwara aa on hwah, o dɔ hwɛɡa saŋ bɛlbwa.

²⁶ O dɛ bol wejemwa, dɛɛ baɡle waa aa ɛ kasinteŋ.

²⁷ O dɛ do sie o dem tena nɛɛ saŋ bɛlbwa, o siwi ɛɛ swɛɛ wɛɛ nyin kwaa aa hiah ba.

²⁸ O bii swee andɛɛɡa dɛɛ tɛo, o jaa ɡe ɛɛ kpɛɛro.

²⁹ O jaa yon ŋɔ, “Handɛɛɡa lole te, kɛ he dɔŋ toole.”

³⁰ Tolwaa te dɛ neɡre nɛn, wer ɡe ɛɛ tu, kɛ haah waa dɛ ɔmɛ Korowii la chɛ kpɛɛra.

³¹ O chɛ kpɛɛra wobɛlbwa waa ɛ ta, ɡɛɛ a chɛ kɛŋɔ ó dɔ duure nomɛlbwa be.