Sɛɡla 30 - mzwDBL

Waa aa le Aɡur be

¹ Waa aa le Jake bibaa Aɡur be laanee nɔ. “Korowii kpɔ mɛ ta, n ta lɛɛ dɔe.

² Dɛ n fa do kɛŋɔ kpɔɡ bini ol, n ta nɛn liire dɔe.

³ Dɛ n ta wejema hwele, kɛɛ dɛ jemɛ Korowii Waa Do Goroŋ la wa.

⁴ Nomɛl la Korowii doa dɛ berɛ ba kaa? Umee lawɛ peu kpoŋe o nɔmpaa bini kaɔ? Umee ɡbaa nee aa lɔ harɛ ta bwa do yal ta, kɛɛ umee kpɔ jwɛhre bil harɛ nɔ ta nyoa ɔ? Umee jemɛ naate ɔ? O sɔne ɛrɔɔ? O bie sɔne ɛrɔɔ? He jemɔ waa, baɡ mɛ!

⁵ Korowii dɛ teŋɛ o nyobaɡa ta. O dɛ tɔ nomɛlbwa waa ba o be ɡbemɡbe.

⁶ Bɛ waa Korowii aa wola bolɛ la kpɔ ja o waa ta, ásɛ o ba kaeh dɛ́ yerɛ nyosonteŋni.”

⁷ Aɡur ŋɔ, “N Naa Korowii, webele anɛɛ mɛɛ nyin he be mɔɔ dɛ́ sewɛ, bɛ men vɔmɛ.

⁸ Lɛɛ mɛ le wesale ne nyosone ta kwaraa, bɛ ɡel ń nya kɛɛ dɛ́ dɔ kondɔɔh kohona. Tɛ mɛ anɔ la maa dɛɛ di tɔpere bɛlbwa.

⁹ Dɛ n dɔ kohona naa, mɛɛ soh he waa, dɛ́ ŋɔ, ‘Korowiirii ume o?’ N berɔ nya kwaraa ɡe aa, ŋwɛɛ mɛɛ ba ŋwɛɛ dɛ́ ɡel he sɔn chɔɡ.

¹⁰ Bɛ bonɔɔ sɔn ba chɔɡ tɛ o dɔɔ, ásɛ o ba taahne á dɔe.

¹¹ Nɛra bane dɛ taah ba mɛɛnanar, baa andɛɛɡa sweerɛ dɛɛ tɛ ba nyare.

¹² Ba dɛ lii kɛŋɔ wechɔɡa toole ba nɛ, kɛ dɛ ba senɛ wechɔɡa ta.

¹³ Nɛra bane dɛ ɛ mbarafo, dɛɛ nyiŋi nɛra nyubaahna.

¹⁴ Nɛra bane dɔ kpeɡri dɛ kpɔ dɛɛ fiiɡi nyaara ne nɛŋɡwɛɡra, dɛɛ lɛ kwa, a ɛ ŋwɛnɛ baa kpɔa so, dɛ́ chɔɡ ba le nɛra bini.

¹⁵ A do kɛŋɔ kpanjeɡ aa dɔ bihaahna banɛ, a sɔne ‘Tɛ mɛ!’ Kombele atoro ane lole aa vaɡɛ bwa, naarɛte lole waa wola ŋɔ, ‘A maɡrɔ!’

¹⁶ Anee nɔ, lalabwɛ ne hambara, ne harɛ waa wola vaɡɛ dɛɛ nyin ne, dɛ nii aa dɛ lawɛ baa wola won dima.

¹⁷ Nɛn o siwi aa wola o mɛɛ tɔɡɛ wɛɛ mamɔ, dɛ berɛ nyiŋi o nya dɛɛ vah la, ɛɡreree dɛ́ foromi o sibie, ásɛ kokosakire di o ola.

¹⁸ Kombele atoro ane waa dɔ nyokpoa kɛrɛdɛ n be, naarɛte ɡe maa o mun no.

¹⁹ Anee kɛŋɔ, ɡɛ kee aa dɛ ɡah nyundua, harɛkon won bwetal ta kpɔe, ɡbera won nee sie kpɔe, asɛ baa ne haah yon dɛɛ nyin dɔŋa la.

²⁰ Ŋwɛnɛ haah waa wola kasinteŋ dɔe tɛ o jaa, aa dɛ kpɔ o taa nɔ. O yon le o jaa habɔɔ ka kpɔ banfale dɛ berɛ sɔ ne, dɛ ŋɔ, ‘N ta wechɔɡa ɛɛ.’

²¹ Webele atoro ane lole yaa wola won kpoŋe, naarɛte ɡe ɡɛ.

²² Anee kɛŋɔ, yom waa bera di kora, ne ɡɛne waa dɔ kondikwa kohona dɛ di.

²³ Ne haah nomɛlbwa aa wola on nyin o berɛ ba dɔ jaa, ne yomhaah waa lɛ haah waa lɔ o sie tolo jaa.

²⁴ Kombele anaarɛ ane lɔ harɛ nɔ ta, dɛ do jeɡrejeɡre ken, kɛ dɛ ɡe jemɛ waa taeh.

²⁵ Anee vaɡla, aa kpeɡe kɛ a dɛ nyin a kondikwaa hwel saŋ cheɡ, dɛ kpɔ dɛɛ kpa bwaala nee saŋ.

²⁶ Kukubanere aa wola kpeɡe nomanta, a jemɛ waa dɛɛ chɔ bwebɔɔne bini.

²⁷ Tontombɛ ta sitɔɔ dɔe, kɛ a bwa pɛo dɛ ir dɛɛ kaa.

²⁸ Hɛɛ won lawɛ ɡer he nɔn ta, kɛ koodemii hɛɛ nao.

²⁹ Kombele atoro ane lole a vala do wer, ɡɛɛ naarɛte ɡe do.

³⁰ Bɛlee puadɔɔ, o bwara kpeɡri ɡwaa ola bwa, waa komɛlbwa ɔmɛ kpɔɡ baah,

³¹ ne bombala, ne jabala aa laa nyuune pa, ne koranar ba nɛra aa bar ba cheme.

³² Dɛ he ɛ ɡɛne haa dɛɛ maŋkura he te, dɛɛ vɔrɔwe wechɔɡa aa, ɡel dɛɛ lii wa.

³³ He lɔ sooma aa, noo dɛ le a ta, he lɔ he dɔŋ mee ta naa, chal dɛ le, ɡɛɛ he muɡli he dɔŋ baah aa, hɛɛ ba naɡra ne.”