Sɛɡla 3 - mzwDBL

Bonɔɔna ne toli jae waa ja

¹ N bie, bɛ waa maa baɡle nɔ soh, ɡel he liire do waa maa ŋɔa hɛɛ ɛ ta,

² aa ɡeloo he dɔ mkpajaŋ, dɛ́ berɛ ɡel he soɡa bini do wer.

³ Bɛ ɡel Korowii nyina ne nɛnnyin dɛ kasinteŋ paŋɛ. Kpɔa ɛ kɛŋɔ baŋa kon, ɡel a ɛ he bambile wa.

⁴ He ɛ ɡɛ naa, hɛɛ dɔ sɔndɛɛɡee Korowii ne nɛra bwa be.

⁵ Bɛ he te kpɔ dawɛ anɔ la haa jema ta, kpɔ he hwɛɡa bwa do Korowii nɛ.

⁶ Wobɛlbwa haa dɛ ɛ la, lii Korowii wa, ásɛ o baɡle ŋwɛnɛdɛɛɡe hé kpɔ o ta.

⁷ Bɛ he te wejereme kohona dɛɛ lii, ɔmɛ Korowii, dɛ ke he te wechɔɡa ta.

⁸ Dɛ he teŋɛ a ta naa, aa ɛo kɛŋɔ tɛɛɡa, dɛ́ do he bwara bini dɛɛ chaeh.

⁹ Kpɔ he kondɔɔh, ne he koo kondikonloɡla tɛ Korowii, dɛ́ kpɔ duuru.

¹⁰ Anee dɛɛ ba ɡela he dɔ mea kohona he dɔndɔŋ su, ásɛ dɛ berɛ dɔ senfala kohona, haa wola won dɔ kwaa dɛ́ do a bwa.

¹¹ N bie, dɛ Korowii dɛ tɛr he deŋne aa, bɛ an wesale lii. Dɛ o dɛ toɡre naa, bɛ ɡel a hwah he bwara.

¹² Nɛn Korowii aa dɛ nyin la, onee wɛɛ kah, kɛŋɔ mɛɛ yon dɛɛ toɡre o binyini la.

¹³ Nomɛlbwa waa dɔ wejema la, o na som. Nɛn waa dɛ no waa mun la,

¹⁴ a dɔ tɔnɔ dɛ ɡwaa suuɡapoŋ, a ɛ kondɔɔh ɡwaa suuɡaswɛm.

¹⁵ Wejema yoɡ kpeɡri, dɛ ɡwaa kwaa baa kpɔ suuɡaswɛm ɛa, he konnyini bɛlbwa toole he won kpɔ maɡɔ.

¹⁶ O dɛ tɛ mkpajaŋ, dɛ berɛ dɛɛ tɛ kondɔɔh ne jirima.

¹⁷ O ɡelɔ he soɡa bini ɛɛ do wer, dɛ́ berɛ ɡel hɛɛ dɔ bosɔɔhna.

¹⁸ Nɛra baa dɔ wejema la, ba na som, o dɛ tɛ mkpa kohona.

¹⁹ Wejema nee Korowii ta harɛ, waa mun noe taa o che, dɛ ta nyundua ɡe.

²⁰ O wejema taa o che, dɛ ta neerare aa palɛ, dɛ berɛ ta baama aa ɛ bwaala dɛɛ nɛ.

²¹ N bie, lawɛ he wejema ne waa mun noe bini, bɛ ɡel a paŋɛ.

²² Aa tɛɛ mkpaa, dɛ́ ɡel he soɡa bini do wer.

²³ Anee dɛɛ ba ɡela he valɛ wobɛlbwa ta sɔnɔnɔɔ, haa wola nachɔɡee lɔ.

²⁴ He chɔɔ waa haa ɔmɛ, dɛ́ chɔ domsoma.

²⁵ Haa wekpeɡa aa dɛ piɡri nɛn waa lii, kɛɛ wenaale aa dɛ ba wechɔɡ-ɛɛra nɛɛ laanee ɔmɛ.

²⁶ Korowii ɛɛ kpɔ nɔnee tɔ he nɛ, waa ɡel he jo waa ta.

²⁷ Gɛ haa dɛ ba wona ɛ tɛ nɛra aa hiah ba la ɛ, dɛ he dɔ a kpeɡri aa.

²⁸ Dɛ he dɔ komɛl dɛ́ tɛ he dɔŋ aa tɛo, bɛ ŋɔ ó kaa kere dɛ́ ba.

²⁹ Bɛ wechɔɡa lii tɛ he dɔŋ waa dɔ hwɛɡa he nɛɛ dɛ so bɛne.

³⁰ Bɛ waa kpɔ dawɛ he dɔŋ nɛɛ pɛɛpɛɛ, dɛ o ta hen waane ɛɛ.

³¹ Bɛ ɡel he sie beɡre nɛn waa dɛ nyin yoi kwaa ta, bɛ waa waa dɛ ɛ la ane ɛ.

³² Korowii kii nɛn o ŋwɛnɛre aa ɡola, o dɔ hwɛɡa tɛ nɛn o wa aa toɡra, dɛɛ bol o waa o be.

³³ Korowii nyotaahna lɔ wechɔɡ-ɛɛ dem, kɛ nɛn o wa aa toɡra dem te, o swee andɛɛɡa dɛɛ tɛo.

³⁴ Korowii dɛ mamɛ mbarafo tena baa dɛ mamɛ ba bala, dɛɛ sune nɛra baa dɛ pwɛr ba te la nɛ.

³⁵ Wejeremaa dɛɛ dɔ jirima, ɡɛna ɡee dɛɛ so sihiih ta.