Sɛɡla 28 - mzwDBL

¹ Nɛnchɔɡe dɛ chwa dɛ nomɛl aa on doŋi, kɛ nɛn o wa aa toɡra baah suu kɛŋɔ nyujente ken.

² Harɛ wechɔɡ-ɛɛra aa lɔ o ta la, o koranaree dɛɛ warɛ. Kɛ harɛ waa dɔ nomonome baa dɔ wejema la, dɛ do kpeɡri dɛ́ che kiŋkiŋ.

³ Kooro waa dɛ ɛ nyaara hɔhɔrɔwa la, do kɛŋɔ bwaala waa wola komɛlbwa kwaa ken.

⁴ Nɛra baa wola Mmara ta teŋɛ la, dɛ kpɛɛ nɛnchɔɡa. Kɛ nɛra baa dɛ teŋɛ Mmara ta la, hah nɛnchɔɡa.

⁵ Nɛnchɔɡaa wola waa aa ɛ kasinteŋ mun no, kɛ nɛra baa dɛ tomɛ Korowii te dɛ́ no a mun kɛrɛdɛ.

⁶ Nyaa o wa aa dɔ kasinteŋ la, o bɔ suuɡa te o wa aa doŋa.

⁷ Biwejeremee dɛɛ teŋɛ Mmara ta, kɛ onɔ la o ne nɛnsale aa dɛ valɛ la te, kpɔ sihiih dɛɛ kpo o mɛɛ.

⁸ Nɛn waa dɛ kemɛ nɛra suuɡa, dɛ lɛ a nee kohona dɛ dɔ kondɔɔh la, o lɛa dɛɛ tɛ nɛn waa dɛ na nyaara sum.

⁹ Dɛ he vɛh Mmara ta teŋa aa, Korowii kii he wesoŋa.

¹⁰ He neɡre nɛndɛɛɡe dɛɛ kaa wechɔɡa ŋwɛnɛ ta naa, a dɛ di he ɡbaɡba. Nɛn wobɛlbwa aa wola toole o nɛɛ la, na som kerekere.

¹¹ Suuɡa te dɛ lii o te wejereme, kɛ nyaa waa jemɛ waa la jemɛ ɡɛ naate aa doa.

¹² Nɛndɛɛɡa baa di nomonome aa, nomɛlbwa sie dɛ lɛ, kɛ nomonchɔɡa balaa, ɡɛɛ nomɛlbwa hɔrɔme.

¹³ Nɛn waa dɛ tɔ o wechɔɡa ta la aa wer do, kɛ nɛn waa wona bol o kwaa dɛ ɡel a ɛɛ la, Korowii dɛ́ na o sum.

¹⁴ Nɛn waa dɛ ɔmɛ Korowii la, o na som, kɛ deŋnekpeɡ te ɛɛ ba na waa taeh.

¹⁵ Nomonchɔɡe waa dɛ nyiŋi nɛŋɡwɛɡra la, o do kɛŋɔ nyujente kɛɛ sisire yon dɛɛ kɔɡre, dɛɛ nyin ola dɛ́ lawɛ la.

¹⁶ Kooro waa wola liire dɔe, o nyu bini do kpeɡri laanee dɛɛ fiiɡi o nɛra, kɛ onɔ la waa wola kafo nyin la dɛ́ dɔ mkpajaŋ.

¹⁷ Nɛn waa dɛ kpoo nɛra la, o ɡbaɡba bɔɔ wɛɛ kwi, bɛ on kah.

¹⁸ He waa bini wer aa, he dɛ dɔ he nyu, kɛ dɛ he waa bini ta toɡraa, he dɛ chole warane.

¹⁹ Paa waa swɛɛ siwi dɛɛ ɛ toma laanee, dɛɛ dɔ kondikwaa kohona, kɛ onɔ la waa teŋɛ wesale ta la te dɛ nya.

²⁰ Nɛn waa dɛ bol kasinteŋ la, o dɛ na som taeh, kɛ nɛn o siwi aa swɛɛra kɛ o dɔ kwaa warane la ne wahalaa.

²¹ Siebɔr nyiŋa dɛ́ pa bole aa were, kɛ bane dɛ che komɛl tama waa dɔ di la ta, dɛ yon ɛ wechɔɡa.

²² Nɛn o siwi aa dɛ beɡre kwaa dɔe ta la, waa saŋ nyae aa ba o nɛɛ la te lii.

²³ Nɛn waa bol waa baɡle o dɔŋ o charɛ la, o dɛ dɔ sɔndɛɛɡe ɡwaa nɛn waa kpɔ wobosoma dɛɛ neɡre o dɔŋ.

²⁴ Haa ŋwɛ he nya kɛɛ he mɛɛ komɛl, dɛ ŋɔ he ta ŋwɛɛ ɛɛ la, dɛ henee ŋwɛɛ tenten.

²⁵ Nɛn waa dɛ nyin kɛ o ɡbo ɛɛ dɔ la, dɛ́ ba wahala ne, kɛ nɛn waa kpɔ o te dawɛ Korowii nɛɛ la soɡa bini dɛ do wer.

²⁶ Nomɛlbwa waa kpɔ o te ɛɛ dawɛ o ɡbaɡba liire ta la ɡɛnɔ, kɛ nɛn waa dɛ teŋɛ wejerema waa ta dɛ́ dɔ o nyu.

²⁷ Nɛn waa dɛ cha nyaara la, komɛlbwa aa on nya, kɛ nɛn waa laa sie dɛɛ kpɔ ba nɛɛ la, dɛ́ dɔ nyotaahna taeh!

²⁸ Nomonchɔɡa baa di kora aa, ɡɛɛ nɛra hɔrɔme, ba le bela tenaa, dɛ nɛra ba wa aa toɡra dɔ bɔr dɛ di kora.