Sɛɡla 27 - mzwDBL

¹ Bɛ waa haa ɛ kere kpɔ dɛɛ bol wa, haa jemɛ ɡɛ tɔɔ aa dɛ ba he pera.

² Bɛ he te kpɛɛ, ɡel nɛra kpɛɛre.

³ Bwe ne hɛŋle bwa tɔɡre te, kɛ waa ɡɛne aa dɛ ba a ne la ɡwaa a bwa.

⁴ Nɛn o baah aa dɛ di wɛɛ tɔ waa wel la, o nyu bini kpeɡri dɛɛ chɔɡ wa, kɛ bɔweela te ɡwaalo.

⁵ A wer kɛŋɔ he di nɛn kasinteŋ nɛra baah. A bɔ kɛŋɔ haa dɛ nyin o wa, he ta ɡelɛ o jemɛ.

⁶ He damdɛɛɡe dii kasinteŋ bɔ, kɛŋɔ he dɔm aa kpɔ nɔn dawɛ he vam ta.

⁷ Nɛn di kwaa vaɡɛ o tea aa, o waane laa tooh wa, ɡɛɛ nɛn lɔr aa dɛ kpoo la, koŋkpela ɛɛ do o som.

⁸ Gɛ jumbie yon ir le o kɔr ta dɛ kaa la, ɡɛɛ nɛn waa jo pua kaa dɛ ɡel o dem la do.

⁹ Konsɔɔhsoma sɔɔh ɡelɔ nɛn sie ɛɛ lɛ, ɡɛɛ dansom tenten ɡe liire waa tɛɛ la do.

¹⁰ Bɛ he chamenate kɛɛ he mɛɛ chamenate chwa. He dam waa bɛne la ɡwaa lole waa lɔ bojaŋ, anomanta, dɛ waane pui naa, haa won la he lole be ŋɔ ó chae.

¹¹ N bie, hweli waa dɛ jemɛ wa, ásɛ n baŋa pa, ń dɔ waa dɛ bol nɛra baa dɛ ɛɛ mɛ nɛnsala la be.

¹² Nɛn waa dɔ nfɛrɛ la, dɛ na waa aa lɔ sie dɛɛ ba, dɛ yon ke o te. Nɛn waa wola liire dɔe yon so nyiŋi a ba diu.

¹³ Lɛ nɛn waa cheɡɛ hɔɔh kem nyoa la yal bil, dɛ o di haah waa wola he bini bɛl ɛɛ ajinamuu aa, lɛ o yal bil.

¹⁴ Dɛ he felo chɔmbibi dɛ kpɔ takpeɡ chɔɔ he dɔŋ aa, a dɛ berɛ chɛɡa tɛ nɛn haa chɔɔro la.

¹⁵ Hannaɡrenyini do kɛŋɔ, bwaala aa dɛ wiri waa wola ɡel bwa.

¹⁶ Gɛ haa wola won kpoŋe peu, kɛɛ noo a mwɛɛ nɔn ta la, ɡɛɛ haa wola won larawe a ɡɛ haah la ó ɡel naɡra.

¹⁷ Gɛ buni aa dɛ sar buni la, ɡɛɛ chamene tena hweli waa dɛɛ le dɔŋa be.

¹⁸ Dɛ he nyiŋi fiɡ daa ta kɛrɛdɛ naa, he dɔ o nɔna dɛɛ di, ɡɛɛ dɛ bonɔɔ tomɛ o dɔɔ kɛrɛdɛ naa, wɛɛ dɔ sɔn.

¹⁹ Gɛ nɛn nyiŋi nee ta o yon na ɡɛ o siebɔr aa doa la, ɡɛɛ o liire ɡe ɛɛ baɡle o nɛnsoo.

²⁰ Gɛ nɛwɛnyini pɛla kwa aa wola tonɛ bwa la, ɡɛɛ lalabwɛɛ ɡe aa wola su bwa.

²¹ Nii taa ba kpɔ suuɡapoŋ ne suuɡaswɛm do dɛ́ jemɛ kɛ a wer, ɡɛɛ a che nɛn kpɛɛra ta, baa jemɛ o nɛnsoo.

²² Nɛn waa ɡɛna te, he lɔɔro ɡɛ bɛlbwa kwara noo, o ɡɛna ta lɔ o nɛ.

²³ Nyiŋi he kondɛɛra ta kɛrɛdɛ, dɛɛ do sie a nɛ,

²⁴ dɛkalkɛŋɔ suuɡa dɔe aa ɡɛ ka, ɡɛɛ kooɡbɛrɛ aa wola le chɔe dɛɛ tɛ naanar saŋ bɛlbwa.

²⁵ Dɛ he kɛ kondɛɛra kondikwaa cheɡ, dɛ berɛ kɛ kpɔɡa aa lɔ deŋɡarere ta, mɔɔ anfala ɛɛ moɡaa,

²⁶ anee dɛ́ ɡel he dɔ yal tɔ le he peera ta, dɛ́ berɛ dɔ suuɡa le he boohna ta yawɛ harɛ.

²⁷ Dɛ dɔ na-elnee kohona dɛɛ he haah ne bii, dɛ he toli, ba bwara do wer.