Sɛɡla 26 - mzwDBL

¹ Gɛ ɡɛne aa wola kpɛɛra chɛɛ la, ɡɛɛ dombwea kɛɛ bwaala aa wola kwaa koma saŋ hiaeh.

² Nyotaahna aa wola hen chɛɛ la, do kɛŋɔ jumbii aa dɛ ɡah aa wola daa ta joŋi la ken.

³ Chweema chɛ jaaɡɔ ne keeɡo, ɡɛɛ ɡɛne chɛ lɔɔra.

⁴ Bɛ he nyoa kpɔ do ɡɛne waa ta, ásɛ dɛ bɛ ba do kɛ on.

⁵ Chaŋe ɡɛne o ɡɛnewaa ta, ásɛ o jemɛ kɛŋɔ o ta wejereme ɛɛ.

⁶ He tomɛ ɡɛne aa, he nakpalee dɛɛ sɔɔhne, he bambile te aa hen sɔɔh.

⁷ Gɛ boobi aa wola won valɛ la, ɡɛɛ ɡɛne aa wola jemɛ sɛɡle.

⁸ He kpɛɛ ɡɛne aa, waa jemɛ. A do kɛŋɔ haa vɔwɛ bwe ne taya tɔn pɛ, he ta bwe laa, waa kaa.

⁹ Gɛ sennyɔɔ aa wola won laa sɔɔh kpɔ o nɔn ta la, ɡɛɛ a do kpeɡri tɛ ɡɛne kɛ ó won sɛɡle.

¹⁰ Dɛ he bɔ ɡɛne waa ba dɛ kaa o bobɛl paa aa, dɛ a do kɛŋɔ nɛn aa ta hɛma ta bobɛlbwa, dɛ do nɛra bola ken.

¹¹ Gɛ nyoate yon uɡe dɛ berɛ kaa dia la, ɡɛɛ ɡɛne teŋɛ dɛɛ ɛ ɡɛnewa.

¹² Nɛn waa ɡɛna kohona la, hwɛɡa lɔ o nɛɛ ɡwaa nɛn waa dɛ lii kɛ o jemɛ wa, kɛ o ɡe aa jemɛ.

¹³ Bɔhwaahree yon ŋɔ, “Nyujente lɔ ŋwɛnɛ ta, o lɔ fɔɡbaahna.” Anomanta, waa le.

¹⁴ Gɛ ɡbera aa cheɡɛ njinasoɔre ta dɛ ya dɛɛ tɔ la, ɡɛɛ bɔhwaah chɔ kalaŋ ta dɛɛ beɡre o te.

¹⁵ Nɛra bane bɔhwaah ɡwaa ba nɛɛ kɛ bá won kpɔ kondikwaa kwaraa la nyoa.

¹⁶ Bɔhwaah dɛ lii o te wejereme, kɛŋɔ o ɡwaa nɛra banuanɛ baa dɛ ba wona tɛ liidɛɛɡa.

¹⁷ Nɛn waa kpɔ o nyoa ɛɛ do nɛra waa aa wola o waa ɛɛ ta la, o do kɛŋɔ waa la fɔɡbaah, dɛ ka lawɛ nyoate deŋne.

¹⁸ Choɡla te waa dɛ ta hɛma nii naa lɔ a nyoa dɛɛ kpoo nɛra la,

¹⁹ do kɛŋɔ nɛn waa dɛ neɡre o dɔŋ dɛ́ yon berɛ ŋɔ, hɛlaa wɛɛ hɛlɛ.

²⁰ Gɛ nindaa hɔɔ tonaa, nii yon dime la, ɡɛɛ nɛn ŋwala ɡe toole naa, naɡra toole.

²¹ Gɛ hɔla aa dɔ nii, damara ɡe ɡel nii ɛɛ hɔ la, ɡɛɛ naɡrenyini ɡe ɛɛ ba naɡra ne.

²² Nɛn ŋwala som, a do kɛŋɔ kondikonsoma aa dɛ jo tea.

²³ Nɛn dɛ bol o dɔŋ bwara wedɛɛɡe kɛ dɛ dɔ o liichɔɡaa, a do kɛŋɔ baa ɛ suuɡapoŋ bɔle vii habɔɔ la.

²⁴ Nɛn o nyoa wobol aa soma, kɛ dɛ dɔ liichɔɡa la dɛ́ neɡre nɛra.

²⁵ O wobol la dɛ do som, kɛ bɛ on yarada, liichɔɡa bwa soo siwii lɔ o nyu bini.

²⁶ O ɛ o te kɛŋɔ ba bɛ on hah aa, o wechɔɡa ɛɛ le baŋee nɛra bwa na.

²⁷ He kwi nafuɡe aa, he ɡbaɡbaa dɛɛ le o bini. He ɡbili bwe ŋɔ he ta he dɔŋ nɛ aa, wɛɛ berɔ ba he nɛ.

²⁸ Nyosonteŋni hah nɛra waa teŋe nyosone dɛɛ dawɛ ba nɛ, ɡɛɛ neɡra wobol ɛɛ ba wechɔɡa ɡbo ne.