Sɛɡla 25 - mzwDBL

Solomɔn sɛɡla ane ja

¹ Solomɔn sɛɡla ane Juda Kooro Hɛsɛkea karakere aa nyiŋi a ta dɛ chwerɛɛ nɔ.

² Ya kpɔ duure dɛɛ tɛ Korowii sɔeh waa kpɔ waane sɔh yaa, ɡɛɛ koranar ɡe dɔ duure pila baa pili waa dɛɛ nyiŋi a bini.

³ Gɛ haa wola won jemɛ nyundua jaŋne, ne harɛ bini luŋri la, ɡɛɛ haa wola won jemɛ kooro liire.

⁴ Laa doŋa kpɔ suuɡapoŋ ta, ásɛ nɛn waa jemɛ a toma kpɔ kwaa kondɛɛɡe.

⁵ Nɛnchɔɡa le kooro jwɛh aa, o kora ɛɛ cheo, toɡra o wa aa toɡra la wa.

⁶ Bɛ he te ɡɔɔ kooro sie, bɛ sobɔr nyin nɛnjena baah.

⁷ A wer kɛŋɔ kooro la ŋɔ, “Ba so n jwɛh,” ɡwaa kɛŋɔ waa iri, dɛ kpɔ he sobɔr tɛ nɛn waa ɡwaale. Waa he ɡbaɡba aa naa la,

⁸ bɛ too dɛ́ kpɔ kaa kɔɔto, ɡɛ laa dɛ he dɔŋ kaa di danseɛ bɔe naa, hɛɛ di sihiih.

⁹ Dɛ he ne he dɔŋ dɔ waane aa, he ne o ɡbo bola, dɛ bɛ ɡel a le baŋ.

¹⁰ A ba ɡɛ naa, baa bol he bwara wechɔɡaa, ásɛ nyanyini haa dɔa la tonɛ.

¹¹ Wobol aa wera dɛ maɡre la, do kɛŋɔ suuɡaswɛm baa kpɔa di suuɡapoŋ ɡwini ken.

¹² Nɛn waa dɛ no nɛn waa jemɛ waa wejaala la, a ɡwaa kwaa baa kpɔ suuɡaswɛm tenten ɛa.

¹³ Torome baa tomɔ o la dɛ baa bol kasinteŋ nɛn waa tomɔ be la, do kɛŋɔ nee aa dɛ sɔɔh baah, kwaa koma saŋ bɔr aa wɔba la ken.

¹⁴ Nɛn waa baɡɛ nyoa kɛ wɛɛ tɛ komɛlee waa wola tɛ la, o do kɛŋɔ baama ne peu aa wola bwaala ne ba ken.

¹⁵ Bambile dɔe ne tahaah won nomonjen liire bera, ɡɛɛ a won wekpeɡa ɡe sɔɔhna.

¹⁶ He dɔ tooh naa, di anɔ la aa maɡre he ne, a kohona dii ɛɛ ɡeloo he dɔ weela.

¹⁷ Dɔŋ dem laŋa kohona dɛ peo, a che a ta o berɛ haeh kwara.

¹⁸ Nɛn waa di dansewea dɛɛ dawɛ o dɔŋ nɛɛ la, o do kɛŋɔ ɡuli kɛɛ kere kɛɛ hɛm waa nyɛɡa ken.

¹⁹ Dɛ he dɔ waa dɛɛ hwɛɡɛ he dam haa wola hwɛɡa o nɛɛ dɔe yaa, a do kɛŋɔ he nyen haa wola won kpɔ chaŋe kwa, kɛɛ he nakpala haa wola won valɛ o ta.

²⁰ Nɛn waa aa puu o loo ku, ba ɡo yela dɛ larawe o bwara la, o dɛ naa kɛŋɔ haa laa o yal wur waa saŋ, kɛɛ haa kpɔ tɛɛɡa aa dɛ we do o ŋwɛr ta la.

²¹ He dɔm chɔ lɔr aa, tɛo kondikwaa ó di. O ta nee dɔe dɛ́ nyɔ aa tɛo ane.

²² He ɛ ken aa, sihiih dɛ ba o kpoe o baŋa ɡole, Korowii tɛɛ a kembɔr.

²³ Gɛ dɔŋ bwara waa bola aa dɛ ba bandia ne la, ɡɛɛ peu waa taa le bobɛl dɛɛ ba bwaala nee ne la do.

²⁴ He ɡbo soɡe saldoa bɔ kɛ he ne hannaɡrenyini aa pɛ dem.

²⁵ Gɛ he yon no amanesoma le bojaŋ a do he som la, ɡɛɛ nesɔn aa dɛ kpo nyɔɡre la ɡe do.

²⁶ Dɛ nɛn o wa aa toɡra kpɔ o te tɛ wechɔɡ-ɛɛraa, a do kɛŋɔ haa kpɔ doŋa do nee waa pala baa kaa ta ken.

²⁷ Tooh kohona dii aa were, ɡɛɛ aa wola were kɛ he nyin sɔn kohona.

²⁸ Nɛn waa wola won bambile lawɛ la, o do kɛŋɔ bwɛjen baa ma danjwɛɛ baro o kuuɡi la ken.